ଜାତୀୟ

ନୂଆଦିଲ୍ଲୀ, (ପିପିଏସ୍): ପାକିସ୍ତାନକୁ ଭାରତର ପ୍ରତିରକ୍ଷା ସମ୍ପର୍କିତ ଗୁପ୍ତ ତଥ୍ୟ ଯୋଗାଉଥିବା ଅଭିଯୋଗରେ ଭାରତୀୟ ବାୟୁସେନାର ଜଣେ ୱିଙ୍ଗ  କମାଣ୍ଡରଙ୍କୁ ଦିଲ୍ଲୀ ପୁଲିସ ଗିରଫ କରିଛି। ଅଧିକାରୀ ଜଣଙ୍କ ବିରୋଧରେ ଆଇନ ଅନୁଯାୟୀ ଏକ ମାମଲା ରୁଜୁ କରାଯାଇଛି ଏବଂ ସେ ବର୍ତ୍ତମାନ ଜେଲ୍‌ରେ ଅଛନ୍ତି।ଦିଲ୍ଲୀ ପୁଲିସର ସୂଚନାନୁଯାୟୀ ୱିଙ୍ଗ କମାଣ୍ଡରଙ୍କୁ ଏକ ଫିଲ୍ଡ ୟୁନିଟରେ ନିଯୁକ୍ତ କରାଯାଇଥିଲା। ଏହି ସମୟରେ ହନି ଟ୍ରାପ୍ ମାଧ୍ୟମରେ ତାଙ୍କୁ ଟାର୍ଗେଟ କରାଯାଇଥିଲା। ପାକିସ୍ତାନ ଗୁଇନ୍ଦା ସଂସ୍ଥା ସହ ଜଡ଼ିତ ଜଣେ ମହିଳା ସାମାଜିକ ଗଣମାଧ୍ୟମ ଜରିଆରେ ତାଙ୍କ ସହିତ ଯୋଗାଯୋଗ ଏବଂ କଥାବାର୍ତ୍ତା ଆରମ୍ଭ କରିଥିଲେ। ମହିଳା ଜଣକ ଧୀରେ ଧୀରେ ବାୟୁସେନା ଅଧିକାରୀଙ୍କ ବିଶ୍ୱାସ ହାସଲ କରି ଭିଡିଓ କଲ୍ ଏବଂ ଚାଟ୍ ମାଧ୍ୟମରେ ସାମରିକ କାର୍ଯ୍ୟକଳାପ ଏବଂ ସୈନ୍ୟ ମୁତୟନ ସମ୍ପର୍କରେ ସୂଚନା ମାଗିବା ଆରମ୍ଭ କରିଥିଲେ। ବାୟୁସେନା ଅଧିକାରୀଜଣକ ଡିଜିଟାଲ୍ ମାଧ୍ୟମରେ ମହିଳାଙ୍କୁ ବିଭିନ୍ନ ଫଟୋଗ୍ରାଫ୍, ଭିଡିଓ ଏବଂ ଅନ୍ୟାନ୍ୟ ସମ୍ବେଦନଶୀଳ ଡକ୍ୟୁମେଣ୍ଟ ଏବଂ ତଥ୍ୟ ପ୍ରଦାନ କରିଥିବା ଅଭିଯୋଗ ହୋଇଛି।ତଦନ୍ତ ସମୟରେ ପୁଲିସ ଏହା ମଧ୍ୟ ଜାଣିବାକୁ ପାଇଛି ଯେ ଅଧିକାରୀ ଜଣକ ନିଜର ଜଣେ ସହଯୋଗୀ ଅଧିକାରୀଙ୍କ ମୋବାଇଲ୍ ଫୋନରେ ଏକ ସନ୍ଦିଗ୍ଧ ଆପ୍ ଇନଷ୍ଟଲ୍ କରିଥିଲେ। ଏହି ଆପ୍ ସ୍ପାଏୱେର୍ କିମ୍ବା ରିମୋଟ୍-ଆକ୍ସେସ୍ ମାଲୱେର୍ ଭାବରେ କାର୍ଯ୍ୟ କରିପାରେ, ଯାହା ଡିଭାଇସ୍ ଡାଟା ହାସଲ କରିବା, ଲୋକେସନ ଟ୍ରାକ୍ କରିବା କିମ୍ବା କଥାବାର୍ତ୍ତା ଅଟକାଇବା ପାଇଁ ବ୍ୟବହାର କରାଯାଇପାରିବ। ପୁଲିସ ଏବେ କେତେ ଡାଟା ଲିକ୍ ହୋଇଛି ଏବଂ ଏହାକୁ କିପରି ବ୍ୟବହାର କରାଯାଇଛି ତାହାର ତଦନ୍ତ କରୁଛି।ପୁଲିସ କହିଛି ଯେ, ସାମାଜିକ ଗଣମାଧ୍ୟମ ମାଧ୍ୟମରେ ସଂପୃକ୍ତ ବାୟୁସେନା ଅଧିକାରୀଙ୍କୁ ଯୋଗାଯୋଗ କରିଥିବା ମହିଳା ପାକିସ୍ତାନର ହ୍ୟାଣ୍ଡଲରଙ୍କ ନିର୍ଦେଶରେ କାର୍ଯ୍ୟ କରୁଥିଲେ। ପୁଲିସ ଅଭିଯୁକ୍ତ ଅଧିକାରୀ ଏବଂ ମହିଳାଙ୍କ ମଧ୍ୟରେ ହୋଇଥିବା ଚାଟ୍, ଭିଡିଓ କଲ୍ ଏବଂ ଅନ୍ୟାନ୍ୟ ଡିଜିଟାଲ୍ ଯୋଗାଯୋଗର ରେକର୍ଡ ଯାଞ୍ଚ୍ କରୁଛି। ଅଧିକାରୀ କେତେ ପରିମାଣର ସମ୍ବେଦନଶୀଳ ସାମରିକ ସୂଚନା ସେୟାର କରିଥିଲେ ଏବଂ ଏହି ନେଟୱାର୍କରେ ଅନ୍ୟ ବ୍ୟକ୍ତିମାନେ ସାମିଲ ଅଛନ୍ତି ତାହାର ତଦନ୍ତ ମଧ୍ୟ କରାଯାଉଛି। ଭାରତୀୟ ବାୟୁସେନାର ଗୁଇନ୍ଦା ବିଭାଗ ଏହି ମାମଲା ସହିତ ଜଡିତ ଗୁରୁତ୍ୱପୂର୍ଣ୍ଣ ସୂଚନା ଦିଲ୍ଲୀ ପୁଲିସକୁ ପ୍ରଦାନ କରିଥିଲା। ଏହାପରେ ୱିଙ୍ଗ କମାଣ୍ଡରଙ୍କୁ ମେ’ ୩୧ ରାତିରେ ଗିରଫ କରାଯାଇଥିଲା। ସଂପୃକ୍ତ ବାୟୁସେନା, ଅଧିକାରୀଙ୍କ ଉପରେ ପୂର୍ବରୁ ନଜର ରଖାଯାଇଥିଲା।