ଓଡିଶା

ନୂଆଦିଲ୍ଲୀ ; ଜାମ୍ମୁ କାଶ୍ମୀରରେ ପ୍ରଥମ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବର ଉଦଘାଟନୀ ସମାରୋହରେ ‘ବନ୍ଦେ ମାତରମ୍’ ଗାଇବାକୁ ନେଇ ରାଜନୈତିକ ବିବାଦ ଦେଖାଦେଇଛି । ଏହି କାର୍ଯ୍ୟକ୍ରମରେ ଜାତୀୟ ସଙ୍ଗୀତର ସମସ୍ତ ୬ଟି ପଦ ଗାନ କରାଯାଇଥିଲା, ଯେଉଁଥିରେ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏବଂ ନ୍ୟାସନାଲ କନଫରେନ୍ସ ସଭାପତି ଫାରୁକ୍ ଅବଦୁଲ୍ଲାଙ୍କ ସମେତ ଅନେକ ବିଶିଷ୍ଟ ନେତା ପ୍ରାୟ ୩ ମିନିଟ୍ ୧୦ ସେକେଣ୍ଡ ପର୍ଯ୍ୟନ୍ତ ଠିଆ ହୋଇଥିଲେ । ତେବେ କଂଗ୍ରେସକୁ ପୁରା ବନ୍ଦେ ମାତରମ୍ ଗାଇବା ପସନ୍ଦ ନଥିଲା ଏବଂ ଦଳ ଜାମ୍ମୁ କାଶ୍ମୀରରେ ଏହାର ସହଯୋଗୀ ଦଳକୁ ଏହି ପ୍ରସଙ୍ଗରେ ପରାମର୍ଶ ଦେଇଥିଲା । କଂଗ୍ରେସର ଆପତ୍ତି ପରେ ବିଜେପି ମଧ୍ୟ ଏହାର ଜବାବ ଦେଇ ଅଭିଯୋଗ କରିଛି ଯେ, କଂଗ୍ରେସ ଏକବିଂଶ ଶତାବ୍ଦୀର ମୁସଲିମ୍ ଲିଗ୍ ପାଲଟିଛି । ଜାମ୍ମୁ କାଶ୍ମୀରରେ, ଯେଉଁଠାରେ ଆଞ୍ଚଳିକ ରାଜନୈତିକ ଦଳ ୨୦୧୯ ପୂର୍ବରୁ ଧାରା ୩୭୦ ପ୍ରସଙ୍ଗରେ ସ୍ୱର ଉତ୍ତୋଳନ କରୁଥିଲେ, ବର୍ତ୍ତମାନ ସେହି କେନ୍ଦ୍ରଶାସିତ ଅଞ୍ଚଳରେ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବର ଉଦଘାଟନୀ ଉତ୍ସବରେ ବନ୍ଦେ ମାତରମର ସମସ୍ତ ୬ଟି ପକ୍ତିଂ ଗାନ କରାଯାଇଥିଲା । ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଏବଂ ସରକାରଙ୍କ ଅନ୍ୟ ପ୍ରମୁଖ ନେତାଙ୍କ ଉପସ୍ଥିତିରେ ଏହି ଉତ୍ସବରେ ଜାତୀୟ ସଙ୍ଗୀତ ଗାନ କରାଯାଇଥିଲା । ଏହି ଘଟଣାର ଭିଡିଓ ସାମ୍ନାକୁ ଆସିବା ପରେ କଂଗ୍ରେସ ଏହା ଉପରେ ଆପତ୍ତି ଉଠାଇଛି । କଂଗ୍ରେସ କହିଛି ଯେ, ଏହାର ସହଯୋଗୀମାନେ ସ୍ୱାଧୀନତା ସଂଗ୍ରାମୀଙ୍କ ଚିନ୍ତାଧାରା ଏବଂ ନିଷ୍ପତ୍ତିକୁ ସମ୍ମାନ ଦେବା ଉଚିତ୍ । ସ୍ୱାଧୀନତା ସଂଗ୍ରାମୀମାନେ ଗ୍ରହଣ କରିଥିବା ବନ୍ଦେ ମାତରମର କେବଳ ୨ଟି ସଂସ୍କରଣ ଗାନ କରାଯାଉ ବୋଲି ଦଳ ନିବେଦନ କରିଛି ।