‘ଡ୍ରଗ୍ସ ରୁଲ୍ସ’ରେ ସଂଶୋଧନ, ଏଣିକି ସିଡ୍ୟୁଲ H-1 ଅଧୀନରେ ବିକ୍ରି ହେବ ଆଲକୋହଲଯୁକ୍ତ କଫ୍ ସିରପ୍ ଓ ଟନିକ୍

ନୂଆଦିଲ୍ଲୀ, ୧୧/୭(ଉଦୟ): ଦେଶରେ ଆଲ୍‌କୋହଲଯୁକ୍ତ ଔଷଧର ବଢ଼ୁଥିବା ଦୁରୁପଯୋଗକୁ ରୋକିବା ପାଇଁ କେନ୍ଦ୍ର ସରକାର ଏକ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଏଥିପାଇଁ ଐତିହାସିକ ‘ଡ୍ରଗ୍ସ ରୁଲ୍‌ସ, ୧୯୪୫’ (Drugs Rules, 1945) ରେ ଗୁରୁତ୍ୱପୂର୍ଣ୍ଣ ସଂଶୋଧନ କରାଯାଇଛି। ନୂତନ ନିୟମ ଅନୁଯାୟୀ, ଯେଉଁ ସବୁ ଖାଇବା ଔଷଧରେ ୧୨ ପ୍ରତିଶତରୁ ଅଧିକ ଇଥାଇଲ୍ ଆଲକୋହଲ୍ (Ethyl Alcohol) ରହିଛି ଏବଂ ସେଗୁଡ଼ିକ ୩୦ ମିଲିଲିଟରରୁ ବଡ଼ ବୋତଲରେ ବିକ୍ରି ହେଉଛି, ସେ ସମସ୍ତକୁ ଏଣିକି ‘ସିଡ୍ୟୁଲ୍ ଏଚ୍-୧’ (Schedule H-1) ବର୍ଗଭୁକ୍ତ କରାଯାଇଛି। ସରକାରଙ୍କ ପକ୍ଷରୁ ଏକ ଗେଜେଟ୍ ବିଜ୍ଞପ୍ତି ପ୍ରକାଶ ପାଇବା ସହ ଏହି ନୂଆ ନିୟମ ଲାଗୁ ହୋଇଛି।

ନିୟମିତ ଯାଞ୍ଚ ଓ କଡ଼ାକଡ଼ି କଟକଣା

ବଜାରରେ ମିଳୁଥିବା କେତେକ କଫ୍ ସିରପ୍, ଶରୀର ବର୍ଦ୍ଧକ ଟନିକ୍ ଏବଂ ଅନ୍ୟାନ୍ୟ ତରଳ ଔଷଧରେ ଆଲକୋହଲର ମାତ୍ରା ଅଧିକ ରହୁଥିବାରୁ, ଅନେକ ସମୟରେ ଲୋକେ ଏହାକୁ ନିଶା ଭାବେ ବ୍ୟବହାର କରୁଥିବା ଅଭିଯୋଗ ହେଉଥିଲା। ବିଶେଷ କରି ଡାକ୍ତରଙ୍କ ବିନା ପରାମର୍ଶ (Prescription) ରେ ଏବଂ କୌଣସି ତଦାରଖ ବିନା ଏହି ଔଷଧଗୁଡ଼ିକ ସହଜରେ ମିଳୁଥିବାରୁ ଏହାର ଅପବ୍ୟବହାର ବଢ଼ିବାରେ ଲାଗିଥିଲା। ଏହାକୁ ଦୃଷ୍ଟିରେ ରଖି ସରକାର ଏହି ଔଷଧଗୁଡ଼ିକୁ ଏଚ୍-୧ ଶ୍ରେଣୀରେ ସାମିଲ କରିଛନ୍ତି, ଯାହାଦ୍ୱାରା ଏହାର ପ୍ରସ୍ତୁତି ଓ ବିକ୍ରି ଉପରେ ସିଧାସଳଖ ନଜର ରଖାଯାଇପାରିବ। ଏହିପରି ଔଷଧ ପ୍ରସ୍ତୁତି ପାଇଁ ଏଣିକି ସ୍ୱତନ୍ତ୍ର ଲାଇସେନ୍ସ ବାଧ୍ୟତାମୂଳକ କରାଯାଇଛି।

ରୋଗୀଙ୍କ ପାଇଁ ସୁରକ୍ଷିତ, କିନ୍ତୁ ଖୋଲା ବଜାରରେ ବିକ୍ରି ମନା

ସରକାର ସ୍ପଷ୍ଟ କରିଛନ୍ତି ଯେ, ଏହି କଟକଣାର ଅର୍ଥ ଏହା ନୁହେଁ ଯେ ଔଷଧଗୁଡ଼ିକ ରୋଗୀଙ୍କ ପାଇଁ ବିପଜ୍ଜନକ କିମ୍ବା ଏହାକୁ ନିଷେଧ କରାଯାଇଛି। ରୋଗୀମାନେ ପୂର୍ବଭଳି ଏହାର ବ୍ୟବହାର କରିପାରିବେ, ମାତ୍ର ଏଥିପାଇଁ ଡାକ୍ତରଙ୍କ ଉପଯୁକ୍ତ ପରାମର୍ଶ ଓ ପ୍ରେସକ୍ରିପସନ ଆବଶ୍ୟକ ହେବ। ମୁକ୍ତ ଭାବେ କାଉଣ୍ଟରରେ ଏଣିକି ଏହି ଔଷଧ ମିଳିବ ନାହିଁ।

ଫାର୍ମାସିଷ୍ଟ ଓ କମ୍ପାନୀଙ୍କ ପାଇଁ ନୂଆ ଗାଇଡଲାଇନ:

ନୂଆ ସଂଶୋଧନ ଅନୁଯାୟୀ ଔଷଧ ଦୋକାନୀ ଏବଂ କମ୍ପାନୀଗୁଡ଼ିକୁ କେତେକ କଡ଼ା ନିୟମ ମାନିବାକୁ ପଡ଼ିବ:

ବୈଧ ପ୍ରେସକ୍ରିପସନ: ପଞ୍ଜୀକୃତ ଡାକ୍ତରଙ୍କ ଲିଖିତ ପ୍ରେସକ୍ରିପସନ ଦେଖିବା ପରେ ହିଁ ଫାର୍ମାସିଷ୍ଟମାନେ ଏହି ଔଷଧ ବିକ୍ରି କରିପାରିବେ।
ସ୍ୱତନ୍ତ୍ର ରେଜିଷ୍ଟର: ପ୍ରତ୍ୟେକ ବିକ୍ରିର ସମ୍ପୂର୍ଣ୍ଣ ତଥ୍ୟ ଏକ ସ୍ୱତନ୍ତ୍ର ରେଜିଷ୍ଟରରେ ଲିପିବଦ୍ଧ କରିବାକୁ ହେବ।
୩ ବର୍ଷ ପର୍ଯ୍ୟନ୍ତ ରେକର୍ଡ ସଂରକ୍ଷଣ: ଔଷଧ ବିକ୍ରିର ରେକର୍ଡ ଏବଂ ଡାକ୍ତରଙ୍କ ପ୍ରେସକ୍ରିପସନର କପିକୁ ଅନ୍ୟୂନ ୩ ବର୍ଷ ପର୍ଯ୍ୟନ୍ତ ସୁରକ୍ଷିତ ରଖିବାକୁ ହେବ, ଯେପରି ସରକାରୀ ଅଧିକାରୀମାନେ ଯେକୌଣସି ସମୟରେ ଏହାର ନିୟମିତ ଯାଞ୍ଚ କରିପାରିବେ।

ସୂଚନାଯୋଗ୍ୟ ଯେ, ପୂର୍ବରୁ ବିଭିନ୍ନ ଶକ୍ତିଶାଳୀ ଆଣ୍ଟିବାୟୋଟିକ୍ସ, ଆଣ୍ଟି-ଟ୍ୟୁବରକୁଲୋସିସ୍ (ଯକ୍ଷ୍ମା) ଔଷଧ ଏବଂ ଅଧିକ ବିପଦ ଜନକ ଔଷଧଗୁଡ଼ିକ ପାଇଁ ଏହି ସିଡ୍ୟୁଲ ଏଚ୍-୧ ନିୟମ ପ୍ରଚଳିତ ରହିଥିଲା। ବର୍ତ୍ତମାନ ଏହି ତାଲିକାରେ ଅଧିକ ଆଲକୋହଲ ଥିବା ସିରପ୍ ଓ ଟନିକକୁ ସାମିଲ କରାଯାଇ ଦେଶରେ ଔଷଧ ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବାକୁ ଲକ୍ଷ୍ୟ ରଖାଯାଇଛି।