କଳକାରଖାନା ପାଇଁ ମରୁଛି ଟିକିରା-ବ୍ରାହ୍ମଣୀ; ପ୍ରଦୂଷଣରେ ଅସ୍ତବ୍ୟସ୍ତ ଜନଜୀବନ
କଣିହାଁ: ଦିନେ ଥିଲା ଟିକିରା ଓ ବ୍ରାହ୍ମଣୀ ନଦୀର ପାଣି ସ୍ଥାନୀୟ ଲୋକଙ୍କ ପାଇଁ ଆଶୀର୍ବାଦ ସଦୃଶ। ସ୍ୱଚ୍ଛ ଓ ନିର୍ମଳ ଜଳରେ ନଦୀ ଦୁଇଟି ଅଞ୍ଚଳବାସୀଙ୍କ ଜୀବନ ଓ ଜୀବିକାର ମୁଖ୍ୟ ଆଧାର ଥିଲା। କିନ୍ତୁ ସମୟ ବଦଳିବା ସହ କଣିହାଁ ଅଞ୍ଚଳରେ ଜଙ୍ଗଲ ନଷ୍ଟ କରି କଳକାରଖାନା ଗଢ଼ିଉଠିବା ପରେ ଏହି ଦୁଇ ନଦୀର ଅବସ୍ଥା ଦୟନୀୟ ହୋଇପଡ଼ିଛି।
କଳକାରଖାନା ଯୋଗୁଁ ଲୋକଙ୍କୁ ନିଯୁକ୍ତି ମିଳିଛି ସତ, ହେଲେ ଏହାର ପ୍ରତିକୂଳ ପ୍ରଭାବ ସ୍ଥାନୀୟ ଲୋକଙ୍କ ଜୀବନଜୀବିକା ଉପରେ ପଡ଼ିଛି ବୋଲି ଅଭିଯୋଗ ହେଉଛି। ଏବେ ଟିକିରା ଓ ବ୍ରାହ୍ମଣୀ ନଦୀ ଯେପରି ଗ୍ରାମବାସୀଙ୍କୁ ସର୍ବହରା କରିଦେବାକୁ ବସିଛି। ପ୍ରଦୂଷଣର ବିଷ ଜ୍ୱାଳାରେ ଅଞ୍ଚଳବାସୀ ଅଣନିଃଶ୍ୱାସୀ ହୋଇପଡ଼ିଥିବା ଅଭିଯୋଗ ହୋଇଛି।
କଳକାରଖାନାରୁ ବାହାରୁଥିବା ବର୍ଜ୍ୟବସ୍ତୁ, କୋଇଲା ଓ ପାଉଁଶ ଗୁଣ୍ଡ ନଦୀ ଜଳରେ ମିଶୁଥିବା ଅଭିଯୋଗ ରହିଛି। ଏହାସହ ସହରର ନର୍ଦ୍ଦମା ଜଳ ମଧ୍ୟ ନଦୀରେ ମିଶୁଛି। ବର୍ଷ ବର୍ଷ ଧରି ସହର ଓ ଶିଳ୍ପାଞ୍ଚଳର ଦୂଷିତ ପାଣି ଟିକିରା ନଦୀ ଦେଇ ବ୍ରାହ୍ମଣୀରେ ମିଶିବା ଫଳରେ ନଦୀଜଳର ପ୍ରଦୂଷଣ ବଢ଼ିଚାଲିଛି।
କଣିହାଁ ଅଞ୍ଚଳରେ ଗୋଟିଏ ପରେ ଗୋଟିଏ କଳକାରଖାନା ଗଢ଼ିଉଠୁଥିବା ବେଳେ ସେଗୁଡ଼ିକର ବର୍ଜ୍ୟବସ୍ତୁ ନଦୀ ଜଳକୁ ପ୍ରଦୂଷିତ କରୁଥିବା ଅଭିଯୋଗ ହେଉଛି। ଫଳରେ ନଦୀକୂଳରେ ବସବାସ କରୁଥିବା ଲୋକେ ଏହାର ପ୍ରତ୍ୟକ୍ଷ ପ୍ରଭାବ ଭୋଗୁଛନ୍ତି।
ପୂର୍ବରୁ ଟିକିରା ଓ ବ୍ରାହ୍ମଣୀ ନଦୀର ଅବବାହିକା ଗ୍ରାମବାସୀଙ୍କ ପାଇଁ ବରଦାନ ସଦୃଶ ଥିଲା। ନଦୀର ପାଣି ଉପରେ ଚାଷବାସ ଓ ଅନ୍ୟାନ୍ୟ ଜୀବିକା ନିର୍ଭର କରୁଥିଲା। ହେଲେ ଏବେ ନଦୀପଠାରେ କାଶତଣ୍ଡି, ବେଣାଘାସ ଭଳି ଗଛ ବଢ଼ି ନଦୀଶଯ୍ୟା ପୋତି ହେବାକୁ ବସିଲାଣି।
ନଦୀ ପ୍ରଦୂଷଣ ଓ ଅଞ୍ଚଳରେ ମଶାବଂଶ ବୃଦ୍ଧି ଯୋଗୁଁ ଲୋକେ ମ୍ୟାଲେରିଆ ଭଳି ଜ୍ୱରରେ ଆକ୍ରାନ୍ତ ହେଉଥିବା ମଧ୍ୟ ଅଭିଯୋଗ ହୋଇଛି। ଜଳସମ୍ପଦର ଉପଯୁକ୍ତ ବିନିଯୋଗ ପାଇଁ ସରକାର ବିଭିନ୍ନ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚ କରୁଥିବା ସତ୍ତ୍ୱେ ନଦୀ ପ୍ରଦୂଷଣ ରୋକିବାରେ ସଫଳତା ମିଳୁନଥିବା ଅଭିଯୋଗ ହୋଇଛି।
ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଜିଲ୍ଲା ପ୍ରଦୂଷଣ ନିୟନ୍ତ୍ରଣ ବୋର୍ଡ କେବଳ ନୀରବ ଦର୍ଶକ ସାଜିଛି। ବାରମ୍ବାର ଚେତାବନୀ ଦିଆଯାଉଥିଲେ ମଧ୍ୟ ପ୍ରଦୂଷଣ ରୋକିବା ଦିଗରେ ଦୃଢ଼ ପଦକ୍ଷେପ ନିଆଯାଉନଥିବା ଅଭିଯୋଗ ରହିଛି।
ନଦୀର ଜଳ ପ୍ରଦୂଷଣ ରୋକିବା ସହ ନଦୀପଠା ପୁନରୁଦ୍ଧାର, ଅବବାହିକାର ସୁରକ୍ଷା ଏବଂ କଳକାରଖାନାର ବର୍ଜ୍ୟବସ୍ତୁ ନିୟମ ଅନୁଯାୟୀ ପରିଚାଳନା କରିବାକୁ ଗ୍ରାମବାସୀ ଦାବି କରିଛନ୍ତି। ଲୋକଙ୍କ ଜୀବନଜୀବିକା ଓ ପରିବେଶକୁ ଦୃଷ୍ଟିରେ ରଖି କଠୋର ନିୟମ ପାଳନ ସହ ତୁରନ୍ତ ପଦକ୍ଷେପ ନିଆଯାଉ ବୋଲି ଦାବି ହେଉଛି।
