ACF ସୌମ୍ୟରଞ୍ଜନ ମୃତ୍ୟୁ ମାମଲାରେ ବଡ଼ ମୋଡ଼: କୋର୍ଟରେ ଆତ୍ମସମର୍ପଣ କଲେ ତତ୍କାଳୀନ DFO ସଂଗ୍ରାମ କେଶରୀ ବେହେରା

ପାରଳାଖେମୁଣ୍ଡି, (୨୭।୭): ବହୁଚର୍ଚ୍ଚିତ ACF ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ଆସିଛି ଏକ ବଡ଼ ଆଇନଗତ ମୋଡ଼। ଦୀର୍ଘ ଦିନର ଚର୍ଚ୍ଚା ଓ ଆଇନଗତ ପ୍ରକ୍ରିୟା ପରେ ପାରଳାଖେମୁଣ୍ଡିର ତତ୍କାଳୀନ ଡିଏଫଓ (DFO) ସଂଗ୍ରାମ କେଶରୀ ବେହେରା ଅଦାଲତରେ ଆତ୍ମସମର୍ପଣ କରିଛନ୍ତି। ସେ ପାରଳାଖେମୁଣ୍ଡି SDJM କୋର୍ଟରେ ସରେଣ୍ଡର କରିଥିବା ଜଣାପଡ଼ିଛି। DFOଙ୍କ ଆତ୍ମସମର୍ପଣ ପରେ ଏହି ସମ୍ବେଦନଶୀଳ ମାମଲା ପୁଣି ଥରେ ରାଜ୍ୟସାରା ହଇଚଇ ସୃଷ୍ଟି କରିଛି।

କ’ଣ ଥିଲା ପୂରା ଘଟଣା?

୨୦୨୧ ମସିହା ଜୁଲାଇ ୧୧ ତାରିଖରେ ପାରଳାଖେମୁଣ୍ଡିସ୍ଥିତ ନିଜ ସରକାରୀ କ୍ୱାର୍ଟର୍ସରେ ସହାୟକ ବନ ସଂରକ୍ଷକ (ACF) ସୌମ୍ୟରଞ୍ଜନ ମହାପାତ୍ର ସନ୍ଦେହଜନକ ଭାବେ ନିଆଁରେ ପୋଡ଼ି ହୋଇ ଗୁରୁତର ଆହତ ହୋଇଥିଲେ। ପରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଏହା କୌଣସି ସାଧାରଣ ଦୁର୍ଘଟଣା ନୁହେଁ, ବରଂ ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ସୌମ୍ୟରଞ୍ଜନଙ୍କ ପରିବାର ଲୋକେ ପ୍ରାରମ୍ଭରୁ ଅଭିଯୋଗ କରି ନିରପେକ୍ଷ ତଦନ୍ତ ଦାବି କରିଆସୁଥିଲେ।

ତିନି ଜଣଙ୍କ ନାଁରେ ରୁଜୁ ହୋଇଥିଲା ମାମଲା:

ସୌମ୍ୟରଞ୍ଜନଙ୍କ ପରିବାର ପକ୍ଷରୁ ସଂଗ୍ରାମ ବେହେରା ଓ ସୌମ୍ୟରଞ୍ଜନଙ୍କ ପତ୍ନୀ ବିଦ୍ୟାଭାରତୀ ପଣ୍ଡାଙ୍କ ଉପରେ ସିଧାସଳଖ ଅଭିଯୋଗ ଅଣାଯାଇଥିଲା। ପରବର୍ତ୍ତୀ ସମୟରେ ଏହି ମାମଲାରେ ତିନି ଜଣଙ୍କ ନାଁରେ ମାମଲା ରୁଜୁ ହୋଇଥିଲା।

1. ତତ୍କାଳୀନ DFO ସଂଗ୍ରାମ କେଶରୀ ବେହେରା
2. ମୃତ ACFଙ୍କ ପତ୍ନୀ ବିଦ୍ୟାଭାରତୀ ପଣ୍ଡା
3. ସରକାରୀ ବାସଭବନର ରୋଷେୟା ମନ୍ମଥ କୁମ୍ଭ

ନ୍ୟାୟ ଅପେକ୍ଷାରେ ପରିବାର:

ତତ୍କାଳୀନ DFO ସଂଗ୍ରାମ ବେହେରାଙ୍କ ଆତ୍ମସମର୍ପଣ ପରେ ଏବେ ଆଗାମୀ ଆଇନଗତ ପ୍ରକ୍ରିୟାରେ ମାମଲାର ବିଚାର କରାଯିବ। ଅଦାଲତଙ୍କ ଆଗାମୀ ନିର୍ଦ୍ଦେଶ କ’ଣ ରହୁଛି, ତାହା ଉପରେ ସମସ୍ତଙ୍କ ନଜର ରହିଛି। ଦୀର୍ଘ ଦିନର ବ୍ୟବଧାନ ପରେ ACF ସୌମ୍ୟରଞ୍ଜନଙ୍କ ପରିବାରକୁ ନ୍ୟାୟ ମିଳିବା ନେଇ ପୁଣି ଥରେ ଆଶା ଜାଗ୍ରତ ହୋଇଛି।