ନୂଆଦିଲ୍ଲୀ/ୱାସିଂଟନ, ୧୨ ଜୁଲାଇ(ଉଦୟ): ରୁଷଠାରୁ ଅଶୋଧିତ ତୈଳ ଏବଂ ପ୍ରାକୃତିକ ଗ୍ୟାସ୍ ଆମଦାନୀ କରୁଥିବା ଦେଶଗୁଡ଼ିକ ଉପରେ ଚାପ ପ୍ରୟୋଗ କରିବା ପାଇଁ ଆମେରିକା ଏକ ବଡ଼ ଏବଂ କଠୋର ଆଭିମୁଖ୍ୟ ଗ୍ରହଣ କରିଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶାସନର ସହମତି କ୍ରମେ ଆମେରିକା ସିନେଟ୍ର ଚାରି ଜଣ ପ୍ରଭାବଶାଳୀ ସଦସ୍ୟ ରୁଷ ବିରୋଧୀ କଟକଣାକୁ ନେଇ ଏକ ନୂତନ ବିଲ୍ ଆଗକୁ ବଢ଼ାଇବାକୁ ଘୋଷଣା କରିଛନ୍ତି। ଏହି ପ୍ରସ୍ତାବିତ ଆଇନ ଚୀନ୍ ସହିତ ଭାରତକୁ ମଧ୍ୟ ବେଶ୍ ପ୍ରଭାବିତ କରିବ ବୋଲି ଆଶଙ୍କା କରାଯାଉଛି, କାରଣ ୟୁକ୍ରେନ ଯୁଦ୍ଧ ପରଠାରୁ ଭାରତ ନିରନ୍ତର ଭାବେ ରୁଷରୁ ଶକ୍ତି ଆମଦାନୀ ଜାରି ରଖିଛି।
ରାଷ୍ଟ୍ରପତି ଟ୍ରମ୍ପଙ୍କ ଅତ୍ୟନ୍ତ ଘନିଷ୍ଠ ସହଯୋଗୀ ଭାବେ ଜଣାଶୁଣା ରିପବ୍ଲିକାନ୍ ସେନେଟର ଲିଣ୍ଡସେ ଗ୍ରାହାମ୍ ଏବଂ ରୋଜର ୱିକରଙ୍କ ସମେତ ଡେମୋକ୍ରାଟିକ୍ ସେନେଟର ରିଚାର୍ଡ ବ୍ଲୁମେନ୍ଥଲ୍ ଓ ଜିନ୍ ଶାହିନ ଏକ ମିଳିତ ବିବୃତିରେ ଏହି ସୂଚନା ଦେଇଛନ୍ତି। ସେମାନଙ୍କ କହିବା ଅନୁଯାୟୀ, ୟୁକ୍ରେନରେ ସାଧାରଣ ନାଗରିକଙ୍କ ଉପରେ ରୁଷର ସାମରିକ ଆକ୍ରମଣ ଜାରି ରହିଛି। ଏଭଳି ସ୍ଥିତିରେ ଯେଉଁ ଦେଶଗୁଡ଼ିକ ରୁଷଠାରୁ ତୈଳ ଏବଂ ଗ୍ୟାସ୍ କ୍ରୟ କରି ତାର ଅର୍ଥନୀତିକୁ ସମର୍ଥନ ଯୋଗାଉଛନ୍ତି, ସେମାନଙ୍କ ଉପରେ ଆର୍ଥିକ ଚାପ ପକାଇବା ବର୍ତ୍ତମାନ ସମୟର ସବୁଠାରୁ ବଡ଼ ଆବଶ୍ୟକତା।
୫୦୦ ପ୍ରତିଶତ ପର୍ଯ୍ୟନ୍ତ ଶୁଳ୍କ ଲଗାଇବାକୁ ଥିଲା ପ୍ରସ୍ତାବ
ପ୍ରସ୍ତାବିତ ‘୨୦୨୫ ଋଷିଆ ପ୍ରତିବନ୍ଧକ ଆଇନ’ ଅନୁଯାୟୀ, ରୁଷଠାରୁ ତେଲ, ପ୍ରାକୃତିକ ଗ୍ୟାସ୍, ୟୁରାନିୟମ କିମ୍ବା ଅନ୍ୟ ପେଟ୍ରୋଲିୟମ ଉତ୍ପାଦ କିଣୁଥିବା ଦେଶଗୁଡ଼ିକର ସାମଗ୍ରୀ ଏବଂ ସେବା ଉପରେ ଆମେରିକା ଭାରି ପରିମାଣର ଶୁଳ୍କ (Taxes) ଲଗାଇବାକୁ ଯୋଜନା କରିଛି। ବିଲ୍ର ପ୍ରାରମ୍ଭିକ ଖସଡ଼ାରେ ଏହି ସୀମା ୫୦୦ ପ୍ରତିଶତ ପର୍ଯ୍ୟନ୍ତ ରଖିବାକୁ ପ୍ରସ୍ତାବ ଦିଆଯାଇଥିଲା। ତେବେ ବ୍ୟାପକ ଆଲୋଚନା ପରେ ଶୁଳ୍କ ବ୍ୟବସ୍ଥାକୁ କିଛିଟା କୋହଳ କରାଯାଇଛି।
ସଂଶୋଧିତ ବିଲ୍ର ଚୂଡ଼ାନ୍ତ ରୂପରେଖ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ। କିନ୍ତୁ ଏଥିରେ ଏକ ବିଶେଷ ପ୍ରାବଧାନ ରହିଛି ଯେ, ଯଦି କୌଣସି କ୍ଷେତ୍ରରେ ଆମେରିକାର ଜାତୀୟ ସୁରକ୍ଷା ସ୍ୱାର୍ଥ ଜଡ଼ିତ ଥାଏ, ତେବେ ଆମେରିକା ରାଷ୍ଟ୍ରପତି ସଂପୃକ୍ତ ଦେଶକୁ ୧୮୦ ଦିନ ପର୍ଯ୍ୟନ୍ତ ପ୍ରତିବନ୍ଧକରୁ ଛାଡ଼ (Waiver) ପ୍ରଦାନ କରିପାରିବେ।
ଟାର୍ଗେଟ୍ରେ ଭାରତ ଓ ଚୀନ୍
ଏହି ପ୍ରସ୍ତାବିତ ବିଲ୍ରେ ପୂର୍ବରୁ ଭାରତର ନାମ ସ୍ପଷ୍ଟ ଭାବେ ଉଲ୍ଲେଖ କରାଯାଇ ସାରିଛି। ଜୁନ୍ ୨୦୨୫ରେ ସେନେଟର ଲିଣ୍ଡସେ ଗ୍ରାହାମ ସୋସିଆଲ ମିଡିଆରେ ଭାରତ ଏବଂ ଚୀନ୍କୁ ସିଧାସଳଖ ଚେତାବନୀ ଦେଇ କହିଥିଲେ ଯେ, ଯଦି ଏହି ଦୁଇ ଦେଶ ରୁଷଠାରୁ ଆମଦାନୀ ଜାରି ରଖି ମସ୍କୋକୁ ସହାୟତା କରିବେ, ତେବେ ସେମାନଙ୍କୁ ଏହାର ଗମ୍ଭୀର ପରିଣାମ ଭୋଗିବାକୁ ହେବ।
ପାଶ୍ଚାତ୍ୟ ଦେଶଗୁଡ଼ିକର ଅନେକ ପ୍ରତିବନ୍ଧକ ସତ୍ତ୍ୱେ ଭାରତ ରୁଷଠାରୁ ରିହାତି ଦରରେ ବିପୁଳ ପରିମାଣର ଅଶୋଧିତ ତୈଳ କ୍ରୟ କରିଆସୁଛି। ଇରାନ ବିବାଦ ସମୟରେ ଆମେରିକା କିଛି ସମୟ ପାଇଁ ରୁଷଠାରୁ ଶକ୍ତି କ୍ରୟ ନିମନ୍ତେ ଏକ ସାଧାରଣ ଲାଇସେନ୍ସ ଜାରି କରି ଏହାକୁ ପ୍ରତିବନ୍ଧକ ମୁକ୍ତ କରିଥିଲା, ମାତ୍ର ସେହି ସମୟ ସୀମା ମଧ୍ୟ ଗତ ଜୁନ୍ ୧୭ ତାରିଖରେ ଶେଷ ହୋଇଯାଇଛି।
୮୪ ଜଣ ସିନେଟ୍ ସଦସ୍ୟଙ୍କ ସମର୍ଥନ
ଏହି ଶକ୍ତିଶାଳୀ ବିଲ୍କୁ ଆମେରିକା ସିନେଟ୍ର ୮୪ ଜଣ ସଦସ୍ୟଙ୍କର ବ୍ୟାପକ ସମର୍ଥନ ମିଳିଛି। ରାଷ୍ଟ୍ରପତି ଟ୍ରମ୍ପ ମଧ୍ୟ ରୁଷ ଉପରେ ଚାପ ବଢ଼ାଇବା ପାଇଁ ଏହି ଆଇନର ବ୍ୟବହାର କରାଯାଇପାରେ ବୋଲି ସଂକେତ ଦେଇଛନ୍ତି। ତେବେ ଆଶ୍ଚର୍ଯ୍ୟର କଥା ହେଉଛି, ଏହାକୁ ଏକ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ବିଲ୍ଟି ଏପର୍ଯ୍ୟନ୍ତ ସମ୍ପୂର୍ଣ୍ଣ ଭାବେ ପାରିତ ହୋଇପାରି ନାହିଁ।
ଆଗକୁ କଣ ହେବ?
ଯଦି ଆମେରିକା ସିନେଟ୍ରେ ଏହି ବିଲ୍ ସଫଳତାର ସହ ପାରିତ ହୁଏ, ତେବେ ରୁଷଠାରୁ ଶକ୍ତି ଆମଦାନୀ କରୁଥିବା ଦେଶଗୁଡ଼ିକ, ବିଶେଷ କରି ଭାରତ ଏବଂ ଚୀନ୍ ପାଇଁ ନୂତନ କୂଟନୈତିକ ତଥା ଅର୍ଥନୈତିକ ସଙ୍କଟ ସୃଷ୍ଟି ହେବ। ତେବେ ଏହାର ଚୂଡ଼ାନ୍ତ ପ୍ରଭାବ ବିଲ୍ର ଶେଷ ଡ୍ରାଫ୍ଟ ଏବଂ ଆମେରିକା ପ୍ରଶାସନ ରିହାତି ବ୍ୟବସ୍ଥାକୁ କିଭଳି ଭାବେ ପ୍ରୟୋଗ କରୁଛି, ତାହା ଉପରେ ହିଁ ନିର୍ଭର କରିବ।
Leave a Reply