ନୂଆଦିଲ୍ଲୀ: ପ୍ରତିଯୋଗିତାମୂଳକ ପରୀକ୍ଷା ପ୍ରସ୍ତୁତି ପାଇଁ ଛାତ୍ରଛାତ୍ରୀଙ୍କୁ ମାଗଣା ଅନଲାଇନ୍ କୋଚିଂ ସୁବିଧା ଯୋଗାଇବା ନେଇ ବଡ଼ ପଦକ୍ଷେପ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସ୍ୱାଧୀନତା ଦିବସ ଅବସରରେ ଲାଲକିଲ୍ଲାରୁ ଦେଶବାସୀଙ୍କୁ ସମ୍ବୋଧନ କରି ସେ କହିଛନ୍ତି, ମହଙ୍ଗା କୋଚିଂ ବ୍ୟବସ୍ଥା ଯୋଗୁଁ ବିଶେଷକରି ମଧ୍ୟବିତ୍ତ ପରିବାର ଉପରେ ଆର୍ଥିକ ଚାପ ବଢ଼ୁଛି।
ପ୍ରଧାନମନ୍ତ୍ରୀଙ୍କ ଅନୁସାରେ, ସାମାଜିକ ଚାପ ଏବଂ ପ୍ରତିଯୋଗିତାରେ ପଛରେ ପଡ଼ିଯିବାର ଭୟରେ ଅନେକ ଅଭିଭାବକ ନିଜ ପିଲାଙ୍କୁ ବାଧ୍ୟ ହୋଇ କୋଚିଂ ସେଣ୍ଟରକୁ ପଠାଉଛନ୍ତି। ଏଥିପାଇଁ ପରିବାରଗୁଡ଼ିକୁ ବହୁ ପରିମାଣର ଅର୍ଥ ଖର୍ଚ୍ଚ କରିବାକୁ ପଡ଼ୁଛି।
ଡିଜିଟାଲ୍ ମାଧ୍ୟମରେ ମାଗଣା ପ୍ରସ୍ତୁତି
ଏହି ସମସ୍ୟାର ସମାଧାନ ପାଇଁ ବିଭିନ୍ନ ପ୍ରତିଯୋଗିତାମୂଳକ ପରୀକ୍ଷା ନିମନ୍ତେ ଦେଶବ୍ୟାପୀ ମାଗଣା ଅନଲାଇନ୍ କୋଚିଂ ନେଟୱର୍କ ଗଠନ କରାଯିବ ବୋଲି ମୋଦୀ ଘୋଷଣା କରିଛନ୍ତି। ଏହା ମାଧ୍ୟମରେ ଆର୍ଥିକ ସମସ୍ୟା ଯୋଗୁଁ ମହଙ୍ଗା କୋଚିଂ ନେଇପାରୁନଥିବା ଛାତ୍ରଛାତ୍ରୀ ମଧ୍ୟ ଗୁଣାତ୍ମକ ପ୍ରସ୍ତୁତିର ସୁଯୋଗ ପାଇପାରିବେ।
ଭାରତ ପାଖରେ ଆବଶ୍ୟକ ଡିଜିଟାଲ୍ ଭିତ୍ତିଭୂମି ସହ ବହୁ ପ୍ରତିଭାବାନ ଶିକ୍ଷକ ରହିଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି। ଏହି ଡିଜିଟାଲ୍ ସୁବିଧା ଏବଂ ଶିକ୍ଷକଙ୍କ ଦକ୍ଷତାକୁ ଏକାଠି କରି ଦେଶର କୋଣ ଅନୁକୋଣରେ ଛାତ୍ରଛାତ୍ରୀଙ୍କ ପାଖରେ ମାଗଣା କୋଚିଂ ପହଞ୍ଚାଇବା ଲକ୍ଷ୍ୟ ରଖାଯାଇଛି।
ମଧ୍ୟବିତ୍ତ ପରିବାରକୁ ମିଳିବ ଆଶ୍ୱସ୍ତି
କୋଚିଂ ପାଇଁ ଗରିବ ଓ ମଧ୍ୟବିତ୍ତ ପରିବାର ପ୍ରତିବର୍ଷ ହଜାର ହଜାର କୋଟି ଟଙ୍କା ଖର୍ଚ୍ଚ କରୁଥିବାରୁ ସରକାର ଏହାକୁ ନେଇ ଚିନ୍ତିତ ବୋଲି ମୋଦୀ କହିଛନ୍ତି। ମାଗଣା ଅନଲାଇନ୍ କୋଚିଂ ବ୍ୟବସ୍ଥା ଆରମ୍ଭ ହେଲେ ଏହି ଆର୍ଥିକ ବୋଝ କିଛି ମାତ୍ରାରେ କମିବା ସହ ଅଧିକ ଛାତ୍ରଛାତ୍ରୀ ସମାନ ସୁଯୋଗ ପାଇପାରିବେ।
