ଭୁବନେଶ୍ୱର: ଦୈନନ୍ଦିନ ଜୀବନରେ ବୈଦ୍ୟୁତିକ ଉପକରଣର ବ୍ୟବହାର ବୃଦ୍ଧି ପାଇବା ସହ ଅସାବଧାନତା ହେତୁ ବିଦ୍ୟୁତ୍ ଆଘାତ (Electric Shock)ର ବିପଦ ମଧ୍ୟ ବଢ଼ିବାରେ ଲାଗିଛି। ଘରେ କିମ୍ବା ବାହାରେ କାହାକୁ କରେଣ୍ଟ ଲାଗିଲେ ପ୍ରାଥମିକ ଚିକିତ୍ସା (First Aid) ଏବଂ ସଠିକ୍ ପଦକ୍ଷେପ ଜଣା ନଥିବା ଯୋଗୁଁ ଅନେକ ସମୟରେ ଜୀବନ ଚାଲିଯାଏ। ବିଦ୍ୟୁତ୍ ଆଘାତ ସମୟରେ କେଉଁ ସାବଧାନତା ଅବଲମ୍ବନ କରିବା ଜରୁରୀ ।
ସେ ସମ୍ପର୍କରେ ଆସନ୍ତୁ ଜାଣିବା:
୧. ସର୍ବପ୍ରଥମେ ନିଜର ସୁରକ୍ଷା ନିଶ୍ଚିତ କରନ୍ତୁ
- ପ୍ରଥମେ ପାୱାର୍ ଅଫ୍ କରନ୍ତୁ: ଯଦି କାହାକୁ କରେଣ୍ଟ ଲାଗୁଥିବାର ଦେଖନ୍ତି, ତେବେ ସର୍ବପ୍ରଥମେ ମେନ୍ ସ୍ୱିଚ୍ (Main Switch) ବନ୍ଦ କରନ୍ତୁ କିମ୍ବା ସମ୍ପୃକ୍ତ ପ୍ଲଗ୍କୁ ବୋର୍ଡରୁ ବାହାର କରିଦିଅନ୍ତୁ।
- ଆହତ ବ୍ୟକ୍ତିଙ୍କୁ ସିଧାସଳଖ ଛୁଅନ୍ତୁ ନାହିଁ: କରେଣ୍ଟ ଲାଗିଥିବା ବ୍ୟକ୍ତିଙ୍କ ଶରୀରରେ ବିଦ୍ୟୁତ୍ ପ୍ରବାହିତ ହେଉଥାଇପାରେ। ସେଥିପାଇଁ ତାଙ୍କୁ ଖାଲି ହାତରେ ଛୁଇଁବା ଆପଣଙ୍କ ପାଇଁ ବିପଜ୍ଜନକ ହୋଇପାରେ।
- ଶୁଖିଲା କାଠ କିମ୍ବା ପ୍ଲାଷ୍ଟିକ୍ ବ୍ୟବହାର କରନ୍ତୁ: ଯଦି ପାୱାର୍ ଅଫ୍ କରିବା ସମ୍ଭବ ନୁହେଁ, ତେବେ ଏକ ଶୁଖିଲା କାଠ ବାଡ଼ି, ପ୍ଲାଷ୍ଟିକ୍ ସାମଗ୍ରୀ କିମ୍ବା ରବର ମାଧ୍ୟମରେ ଆହତ ବ୍ୟକ୍ତିଙ୍କୁ ବିଦ୍ୟୁତ୍ ତାରରୁ ଦୂରେଇ ଦିଅନ୍ତୁ। ନିଜେ ଚପଲ ପିନ୍ଧି ରହିବା ଆବଶ୍ୟକ।
୨. ପ୍ରାଥମିକ ଚିକିତ୍ସା ଓ ଜରୁରୀ ପଦକ୍ଷେପ
- ଆମ୍ବୁଲାନ୍ସକୁ ଫୋନ୍ କରନ୍ତୁ: ଆହତଙ୍କୁ ବିଦ୍ୟୁତ୍ ସଂଯୋଗରୁ ବିଚ୍ଛିନ୍ନ କରିବା ମାତ୍ରେ ତୁରନ୍ତ ୧୦୮ ଆମ୍ବୁଲାନ୍ସ କିମ୍ବା ନିକଟସ୍ଥ ଡାକ୍ତରଖାନାକୁ ଖବର ଦିଅନ୍ତୁ।
- ଶ୍ୱାସକ୍ରିୟା ଯାଞ୍ଚ କରନ୍ତୁ: ଯଦି ବ୍ୟକ୍ତିଜଣକ ଅଚେତ ହୋଇପଡ଼ିଛନ୍ତି, ତେବେ ତାଙ୍କ ନିଶ୍ୱାସ-ପ୍ରଶ୍ୱାସ ଏବଂ ନାଡ଼ି (Pulse) ଚାଲୁଛି କି ନାହିଁ ଦେଖନ୍ତୁ।
- CPR ଦିଅନ୍ତୁ (ଆବଶ୍ୟକ ସ୍ଥଳେ): ଯଦି ନିଶ୍ୱାସ ବନ୍ଦ ଥାଏ ଏବଂ ଆପଣଙ୍କୁ ସିପିଆର୍ (CPR) ଦେବା ଜଣାଥାଏ, ତେବେ ତୁରନ୍ତ ଛାତି ଉପରେ ଚାପ ଦେଇ ସିପିଆର୍ ଆରମ୍ଭ କରନ୍ତୁ।
- ଆହତଙ୍କୁ ସିଧା ଶୁଆଇ ରଖନ୍ତୁ: ରୋଗୀଙ୍କୁ ସମତଳ ସ୍ଥାନରେ ଶୁଆଇ ଦିଅନ୍ତୁ ଏବଂ ତାଙ୍କ ଗୋଡ଼କୁ ସାମାନ୍ୟ ଉପରକୁ ଟେକି ରଖନ୍ତୁ, ଯାହାଦ୍ୱାରା ମସ୍ତିଷ୍କକୁ ରକ୍ତସଞ୍ଚାଳନ ସଠିକ୍ ଭାବେ ହୋଇପାରିବ।
୩. କ’ଣ କରିବେ ନାହିଁ?
- ଆହତ ବ୍ୟକ୍ତିଙ୍କୁ କୌଣସି ପାଣି, ଖାଦ୍ୟ କିମ୍ବା ଔଷଧ ଖାଇବାକୁ ଦିଅନ୍ତୁ ନାହିଁ।
- ବିଦ୍ୟୁତ୍ ଆଘାତ ଯୋଗୁଁ ଶରୀରର କୌଣସି ସ୍ଥାନ ପୋଡ଼ିଯାଇଥିଲେ, ସେଠାରେ ବରଫ, ତେଲ କିମ୍ବା ମଲମ ଲଗାନ୍ତୁ ନାହିଁ। ସେହି ସ୍ଥାନକୁ ସଫା ଓ ଶୁଖିଲା କପଡ଼ାରେ ଘୋଡ଼ାଇ ରଖନ୍ତୁ।
ସାବଧାନତା: କରେଣ୍ଟ୍ ଆଘାତ ସାମାନ୍ୟ ଜଣାପଡ଼ୁଥିଲେ ମଧ୍ୟ ଥରେ ଡାକ୍ତରଙ୍କ ଦ୍ୱାରା ପରୀକ୍ଷା କରାଇନେବା ଉଚିତ୍, କାରଣ କେତେକ ସମୟରେ ଆଭ୍ୟନ୍ତରୀଣ ଅଙ୍ଗପ୍ରତ୍ୟଙ୍ଗ କ୍ଷତିଗ୍ରସ୍ତ ହୋଇଥାଏ।
