ନିଦ ଆସୁନାହିଁ କି? ଆରାମ ପାଇଁ ଜାଣନ୍ତୁ କିଛି ସହଜ ଉପାୟ
ଶରୀର ଓ ମନକୁ ସୁସ୍ଥ ରଖିବାରେ ପର୍ଯ୍ୟାପ୍ତ ନିଦ୍ରାର ଗୁରୁତ୍ୱ ରହିଛି। ନିଦ୍ରା ସମୟରେ ଶରୀର ନିଜକୁ ପୁନର୍ଗଠିତ କରିବା ସହ ଦିନସାରା ହୋଇଥିବା ଶାରୀରିକ ଓ ମାନସିକ କ୍ଲାନ୍ତିରୁ ଆରାମ ପାଇଥାଏ। କିନ୍ତୁ ଅନେକଙ୍କ କ୍ଷେତ୍ରରେ ରାତିରେ ବିଛଣାକୁ ଯିବା ପରେ ମଧ୍ୟ ସହଜରେ ନିଦ ଆସିନଥାଏ।
ଏପରି ସ୍ଥିତିରେ କେତେକ ଲୋକ ଆକ୍ୟୁପ୍ରେସର୍ ପଦ୍ଧତିକୁ ଏକ ସହାୟକ ବିକଳ୍ପ ଭାବେ ଗ୍ରହଣ କରନ୍ତି। କେତେକ ଅଧ୍ୟୟନ ଓ ରିପୋର୍ଟ ଅନୁସାରେ, ଶରୀରର କିଛି ନିର୍ଦ୍ଦିଷ୍ଟ ସ୍ଥାନରେ ହାଲୁକା ଚାପ ଦେବା ଦ୍ୱାରା ମନ ଶାନ୍ତ ହେବା ସହ ଚାପ ଓ ଉଦ୍ବେଗ କମିବାରେ ସାହାଯ୍ୟ ମିଳିପାରେ। ଯଦିଓ ଏହାକୁ ସମସ୍ତଙ୍କ ପାଇଁ ନିଶ୍ଚିତ ଚିକିତ୍ସା ବୋଲି କୁହାଯାଇପାରିବ ନାହିଁ।
ମଣିବନ୍ଧର ଭିତର ପାର୍ଶ୍ୱରେ ଥିବା ପଏଣ୍ଟ:
କାଣୀ ଆଙ୍ଗୁଠି ତଳ ଭାଗରେ ମଣିବନ୍ଧର ଭିତର ପାର୍ଶ୍ୱରେ ଥିବା ସ୍ଥାନରେ ବୁଢ଼ା ଆଙ୍ଗୁଠି ସାହାଯ୍ୟରେ ୨ରୁ ୩ ମିନିଟ୍ ପର୍ଯ୍ୟନ୍ତ ହାଲୁକା ଗୋଲାକାର ଭାବେ ଚାପ ଦେଇ ମାଲିସ୍ କରାଯାଇପାରେ। ପରେ ଅନ୍ୟ ହାତରେ ମଧ୍ୟ ସମାନ ପ୍ରକ୍ରିୟା ଅନୁସରଣ କରନ୍ତୁ। ଏହା ଶରୀରକୁ ଆରାମ ଅନୁଭବ କରାଇପାରେ।
ଇନର୍ ଫ୍ରଣ୍ଟିୟର୍ ଗେଟ୍ ପଏଣ୍ଟ:
ହାତକୁ ସିଧା ରଖି ମଣିବନ୍ଧ ଉପରେ ତିନୋଟି ଆଙ୍ଗୁଠି ରଖନ୍ତୁ। ଏହାର ଠିକ୍ ତଳ ଭାଗରେ ଥିବା ସ୍ଥାନରେ ବୁଢ଼ା ଆଙ୍ଗୁଠି ସାହାଯ୍ୟରେ ହାଲୁକା ଚାପ ଦେଇ ଧୀରେ ଧୀରେ ମାଲିସ୍ କରନ୍ତୁ। ଏହା ମାନସିକ ଚାପ କମାଇବା ଓ ମନକୁ ଶାନ୍ତ କରିବାରେ ସହାୟକ ହୋଇପାରେ।
ମୁଣ୍ଡ ଓ ବେକର ସଂଯୋଗ ସ୍ଥାନ:
ମୁଣ୍ଡ ଓ ବେକ ମିଳୁଥିବା ସ୍ଥାନରେ ଉଭୟ ବୁଢ଼ା ଆଙ୍ଗୁଠି ସାହାଯ୍ୟରେ ହାଲୁକା ଚାପ ଦେଇ ଗୋଲାକାର ଭାବେ ମାଲିସ୍ କରନ୍ତୁ। ଏହି ସମୟରେ ଧୀରେ ଧୀରେ ଗଭୀର ଶ୍ୱାସ ନେଇ ଛାଡ଼ିବା ଦ୍ୱାରା ଶରୀର ଅଧିକ ଆରାମ ଅନୁଭବ କରିପାରେ।
ସାବଧାନତା ମଧ୍ୟ ରଖନ୍ତୁ
- ଆକ୍ୟୁପ୍ରେସର୍ କରିବା ବେଳେ କୌଣସି ସ୍ଥାନରେ ଅତ୍ୟଧିକ ଚାପ ପ୍ରୟୋଗ କରନ୍ତୁ ନାହିଁ। ସବୁବେଳେ ହାଲୁକା ମାଲିସ୍ କରନ୍ତୁ।
- ରାତିରେ ଶୋଇବା ପୂର୍ବରୁ ମୋବାଇଲ୍ ଫୋନ୍, ଲ୍ୟାପଟପ୍ କିମ୍ବା ଅନ୍ୟ ସ୍କ୍ରିନ୍ର ବ୍ୟବହାର ଯଥାସମ୍ଭବ କମ୍ କରନ୍ତୁ।
- ଶୋଇବା ଘରକୁ ଶାନ୍ତ ଓ ଆରାମଦାୟକ ରଖନ୍ତୁ ଏବଂ ପ୍ରତିଦିନ ସମାନ ସମୟରେ ଶୋଇବାର ଅଭ୍ୟାସ ଗଢ଼ି ତୋଳନ୍ତୁ।
- ପ୍ରତିଦିନ କିଛି ସମୟ ଧ୍ୟାନ, ପ୍ରାଣାୟାମ କିମ୍ବା ଗଭୀର ଶ୍ୱାସ-ପ୍ରଶ୍ୱାସ ଅଭ୍ୟାସ କଲେ ମାନସିକ ପ୍ରଶାନ୍ତି ବଢ଼ିପାରେ।
ସୂଚନା: ଯଦି ଦୀର୍ଘ ସମୟ ଧରି ନିଦ୍ରାହୀନତା ସମସ୍ୟା ଲାଗି ରହୁଛି କିମ୍ବା ଏହା ଦୈନନ୍ଦିନ ଜୀବନକୁ ପ୍ରଭାବିତ କରୁଛି, ତେବେ ନିଶ୍ଚିତ ଭାବେ ଜଣେ ଯୋଗ୍ୟ ଡାକ୍ତର କିମ୍ବା ନିଦ ବିଶେଷଜ୍ଞଙ୍କ ପରାମର୍ଶ ନିଅନ୍ତୁ।
ଭଲ ନିଦ ପାଇଁ ଶୋଇବା ପୂର୍ବରୁ ମୋବାଇଲ୍ ଓ ଅନ୍ୟ ଇଲେକ୍ଟ୍ରୋନିକ୍ ସ୍କ୍ରିନ୍ର ବ୍ୟବହାର କମାଇବା ଉଚିତ। ଶୋଇବା ଘରର ପରିବେଶ ଶାନ୍ତ ରଖିବା ସହ ପ୍ରତିଦିନ ଏକ ନିର୍ଦ୍ଦିଷ୍ଟ ସମୟରେ ଶୋଇବାର ଅଭ୍ୟାସ କରିବା ମଧ୍ୟ ଜରୁରୀ। ଏହା ସହ ଧ୍ୟାନ ଓ ଗଭୀର ଶ୍ୱାସ-ପ୍ରଶ୍ୱାସ ଭଳି ଅଭ୍ୟାସ ମାନସିକ ଚାପ କମାଇବାରେ ସହାୟକ ହୋଇପାରେ।
ଦୀର୍ଘ ସମୟ ଧରି ନିଦ୍ରା ସମସ୍ୟା ଲାଗି ରହିଲେ ନିଜେ କୌଣସି ଚିକିତ୍ସା ପଦ୍ଧତି ଉପରେ ନିର୍ଭର ନକରି ଡାକ୍ତରଙ୍କ ପରାମର୍ଶ ନେବା ଉଚିତ।
