ମହାପ୍ରଭୁ ଶ୍ରୀଜଗନ୍ନାଥଙ୍କ ଆନିମେଟେଡ୍ ଫିଲ୍ମ ମୁକ୍ତିଲାଭ ଉପରେ ରୋକ୍ ଲଗାଇବାକୁ ସୁପ୍ରିମକୋର୍ଟଙ୍କ ମନା
ନୂଆଦିଲ୍ଲୀ / ଭୁବନେଶ୍ୱର: ମହାପ୍ରଭୁ ଶ୍ରୀଜଗନ୍ନାଥଙ୍କୁ ନେଇ ନିର୍ମିତ ଆନିମେଟେଡ୍ ଚଳଚ୍ଚିତ୍ର “ମହାପ୍ରଭୁ ଜଗନ୍ନାଥ”ର ମୁକ୍ତିଲାଭ (ରିଲିଜ୍) ଉପରେ ରୋକ୍ ଲଗାଇବାକୁ ସୁପ୍ରିମକୋର୍ଟ ବୁଧବାର ସ୍ପଷ୍ଟ ମନା କରିଦେଇଛନ୍ତି । ବିଚାରପତି ବି.ଭି. ନାଗରତ୍ନା ଏବଂ ବିଚାରପତି ଆର୍. ମହାଦେବନ୍ଙ୍କୁ ନେଇ ଗଠିତ ଖଣ୍ଡପୀଠ ଶ୍ରୀମନ୍ଦିର ପ୍ରଶାସନ ପକ୍ଷରୁ ଦାୟର ଆବେଦନକୁ ଖାରଜ କରିଦେଇଛନ୍ତି । “କଳା କୃତି ଉପରେ କୋର୍ଟ ବିଚାରପତି ସାଜି ନିଷ୍ପତ୍ତି ଶୁଣାଇପାରିବେ ନାହିଁ” ବୋଲି ଶୀର୍ଷ ଆଦାଲତ କହିଛନ୍ତି ।
ଅଦାଲତ କହିଛନ୍ତି, “ଗତ ଜୁଲାଇ ୧୭ ତାରିଖରେ ଆମେ ଏହି ଫିଲ୍ମ ରିଲିଜ୍ ପାଇଁ ଅନୁମତି ଦେଇ ସାରିଛୁ । ଯଦି ଏହିପରି ଆଦେଶ ଉପରେ ରୋକ୍ ଲଗାଯାଏ, ତେବେ ଟେଲିଭିଜନରେ ପ୍ରସାରିତ ହେଉଥିବା ରାମାୟଣ ଓ ମହାଭାରତ ଭଳି ସମସ୍ତ ପୌରାଣିକ ସିରିଏଲ୍ ବନ୍ଦ ହୋଇଯିବ ।”
“ଡୋରେମନ୍ କିମ୍ବା ସ୍ପାଇଡରମ୍ୟାନ୍ ନୁହଁନ୍ତି ଜଗନ୍ନାଥ”
ଶ୍ରୀମନ୍ଦିର ପ୍ରଶାସନ ପକ୍ଷରୁ ମାମଲା ପରିଚାଳନା କରୁଥିବା ଓଡ଼ିଶାର ଆଡଭୋକେଟ୍ ଜେନେରାଲ୍ ପୀତାମ୍ବର ଆଚାର୍ଯ୍ୟ କୋର୍ଟରେ ପକ୍ଷ ରଖି କହିଥିଲେ ଯେ, ଏହି ଚଳଚ୍ଚିତ୍ରଟି କୋମଳମତି ଶିଶୁମାନଙ୍କ ପାଇଁ ଉଦ୍ଦିଷ୍ଟ ଏବଂ ଏଥିରେ ମହାପ୍ରଭୁଙ୍କ ବିକୃତ ରୂପ ପ୍ରଦର୍ଶନ କରାଯାଇଛି । “ମହାପ୍ରଭୁ ଜଗନ୍ନାଥ କୌଣସି ‘ଡୋରେମନ୍’ କିମ୍ବା ‘ସ୍ପାଇଡରମ୍ୟାନ୍’ ନୁହଁନ୍ତି । ତାଙ୍କର ଏକ ସମୃଦ୍ଧ ପରମ୍ପରା ଓ ଆଧ୍ୟାତ୍ମିକ ଐତିହ୍ୟ ରହିଛି । ଏଭଳି ଚିତ୍ରାୟନ ଦ୍ୱାରା ଶିଶୁମାନଙ୍କ ମାନସିକତା ଉପରେ କୁପ୍ରଭାବ ପଡ଼ିବ ।”
ଏହାର ଜବାବରେ ସୁପ୍ରିମକୋର୍ଟ ଖଣ୍ଡପୀଠ କହିଥିଲେ ଯେ, ଏହି ଆନିମେସନ୍ ଫିଲ୍ମ ଦ୍ୱାରା ଜଗନ୍ନାଥ ସଂସ୍କୃତି ପ୍ରତି ଥିବା ଭକ୍ତି ଓ ଶ୍ରଦ୍ଧା ଆଦୌ ପ୍ରଭାବିତ ହେବ ନାହିଁ । ଖଣ୍ଡପୀଠ କହିଥିଲେ, “ଦୁଇ କିମ୍ବା ତିନି ଜଣ ବ୍ୟକ୍ତିଙ୍କ ମନୋଭାବ କ୍ଷୁଣ୍ଣ ହେଉଛି ବୋଲି ଏଭଳି ଆବେଦନ କୋର୍ଟକୁ ଆସୁଛି । ଯଦି ଆପଣ ଚାହାଁନ୍ତି, ତେବେ ଆମେ ଏକ କଠୋର ଆଦେଶ ପାରିତ କରିବୁ ଯେ ହିନ୍ଦୁ ଦେବଦେବୀଙ୍କୁ ନେଇ କୌଣସି ସୃଜନଶୀଳତା, କଳା କିମ୍ବା ଭାସ୍କର୍ଯ୍ୟ ନିର୍ମାଣ ହୋଇପାରିବ ନାହିଁ ।”
କ୍ରୋନୋଲୋଜି: ହାଇକୋର୍ଟଙ୍କ ରୋକ୍ରୁ ସୁପ୍ରିମକୋର୍ଟଙ୍କ ଅନୁମତି
ଜୁଲାଇ ୧୫: ହାଇକୋର୍ଟଙ୍କ ଅନ୍ତରୀଣ ରୋକ୍
ଓଡ଼ିଶା ହାଇକୋର୍ଟ ଫିଲ୍ମ ରିଲିଜ୍ ଉପରେ ସ୍ଥଗିତାଦେଶ ଜାରି କରି କହିଥିଲେ ଯେ, ସମ୍ବିଧାନର ଧାରା ୧୯(୧)(ଏ) ଅଧୀନରେ ମିଳୁଥିବା ଅଭିବ୍ୟକ୍ତିର ସ୍ୱାଧୀନତା ଏବଂ ଧାରା ୧୯(୨) ର ନିୟନ୍ତ୍ରଣ ମଧ୍ୟରେ ସନ୍ତୁଳନ ରହିବା ଆବଶ୍ୟକ । ଧାର୍ମିକ ଭାବନାକୁ ଆଘାତ ପହଞ୍ଚାଉଥିବା କୌଣସି ବିଷୟବସ୍ତୁକୁ ଅନୁମତି ଦିଆଯାଇପାରିବ ନାହିଁ ।
ଜୁଲାଇ ୧୭: ସୁପ୍ରିମକୋର୍ଟଙ୍କ ସଂଶୋଧିତ ଆଦେଶ
ହାଇକୋର୍ଟଙ୍କ ଆଦେଶକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ରଥଯାତ୍ରା ସମୟରେ ପ୍ରବଳ ଶ୍ରଦ୍ଧାଳୁଙ୍କ ଭିଡ଼ ଓ ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ସୁପ୍ରିମକୋର୍ଟ ଜୁଲାଇ ୨୮ (ରଥଯାତ୍ରା ସମାପ୍ତ) ପରେ ଫିଲ୍ମ ରିଲିଜ୍ କରିବାକୁ ଅନୁମତି ଦେଇଥିଲେ ।
ଜୁଲାଇ ୨୫: CBFC କୁ ଶ୍ରୀମନ୍ଦିର ପ୍ରଶାସନର ଚିଠି
ଶ୍ରୀମନ୍ଦିର ପ୍ରଶାସନ ସେନ୍ସର ବୋର୍ଡ (CBFC) ନିକଟରେ ଚଳଚ୍ଚିତ୍ରର ସେନ୍ସର ପ୍ରମାଣପତ୍ରର ପୁନଃସମୀକ୍ଷା ପାଇଁ ଆବେଦନ କରିଥିଲା, ମାତ୍ର ସୁପ୍ରିମକୋର୍ଟଙ୍କ ଆଦେଶ ଯୋଗୁଁ CBFC କୌଣସି ନିଷ୍ପତ୍ତି ନେଇପାରିନଥିଲା ।
ଜୁଲାଇ ୨୯: ପୁନଃଆବେଦନ ଖାରଜ
ସୁପ୍ରିମକୋର୍ଟ ଶ୍ରୀମନ୍ଦିର ପ୍ରଶାସନର ପୁନଃଆବେଦନକୁ ସମ୍ପୂର୍ଣ୍ଣ ରୂପେ ଖାରଜ କରି ଫିଲ୍ମ ରିଲିଜ୍ ପଥ ସୁଗମ କରିଛନ୍ତି ।
ପ୍ରଯୋଜକ ସଂସ୍ଥା ଓ CBFCଙ୍କ ସପକ୍ଷ ଯୁକ୍ତି
ଫିଲ୍ମ ପ୍ରଯୋଜକ ସଂସ୍ଥା ‘ଏଲ୍ଇ ଏଲିମେସନ୍ସ ପ୍ରାଇଭେଟ୍ ଲିମିଟେଡ୍’ (Ele Animations Pvt. Ltd.) ପକ୍ଷରୁ ବରିଷ୍ଠ ଆଇନଜୀବୀ ଦେବଦତ୍ତ କାମାତ କୋର୍ଟରେ ଦର୍ଶାଇଥିଲେ ଯେ, କେନ୍ଦ୍ରୀୟ ଫିଲ୍ମ ସେନ୍ସର ବୋର୍ଡ (CBFC) ରୁ ପ୍ରମାଣପତ୍ର ମିଳିସାରିବା ପରେ ଫିଲ୍ମ ଉପରେ ରୋକ୍ ଲଗାଇବା ଯୁକ୍ତିଯୁକ୍ତ ନୁହେଁ ।
ଏହି ଚଳଚ୍ଚିତ୍ରଟି ସମ୍ପୂର୍ଣ୍ଣ କାଳ୍ପନିକ । ଏଥିରେ ‘ବଳରାମ’ ନାମକ ଜଣେ ଶିଶୁ ଭକ୍ତ ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ କାହାଣୀ ସ୍ଥାନ ପାଇଛି । ଏହାପୂର୍ବରୁ ଟେଲିଭିଜନ୍ରେ ଏହି ସିରିଏଲ୍ ସଫଳତାର ସହ ପ୍ରସାରିତ ହୋଇସାରିଛି । ହନୁମାନ, ରାମ ଓ ମହାଭାରତ ଉପରେ ନିର୍ମିତ ଅନ୍ୟାନ୍ୟ ଆନିମେସନ୍ ଫିଲ୍ମ ଭଳି ଏହା ମଧ୍ୟ କଳାର ଏକ ମାଧ୍ୟମ, ଯାହା ସୃଜନଶୀଳତାକୁ ପ୍ରତିଫଳିତ କରେ ।
ସୂଚନାଯୋଗ୍ୟ ଯେ, ଆଗାମୀ ଅଗଷ୍ଟ ୫ ତାରିଖରେ ଓଡ଼ିଶା ହାଇକୋର୍ଟରେ ଏହି ଫିଲ୍ମ ସମ୍ପର୍କିତ ଅନ୍ୟ କେତେକ ପିଟିସନ୍ର ଶୁଣାଣି ହେବାର କାର୍ଯ୍ୟକ୍ରମ ରହିଛି ।
