ଅସ୍ତରଙ୍ଗରେ କେମିକାଲ କ୍ଷୀରର ମାୟାଜାଲ: ପାଉଡର ଗୋଳି ବିକ୍ରି ହେଉଛି ‘ଧଳା ବିଷ’
ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଅଞ୍ଚଳରେ ଅସାଧୁ ବ୍ୟବସାୟୀଙ୍କ ଦ୍ୱାରା ପ୍ରସ୍ତୁତ ନକଲି ଓ ମିଶ୍ରିତ କ୍ଷୀର କାରବାର ବୃଦ୍ଧି ପାଉଥିବା ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସାଧାରଣ କ୍ଷୀର ପାଉଡରକୁ ପାଣି ଓ ବିଭିନ୍ନ ରାସାୟନିକ ଦ୍ରବ୍ୟ ସହ ମିଶାଇ ‘ଖାଣ୍ଟି ଗାଈ କ୍ଷୀର’ ନାମରେ ବିକ୍ରି କରାଯାଉଥିବା ଅଭିଯୋଗ ହୋଇଛି।
ତରାସାହି ପରେ ଏବେ ଆଳସାହି କାରବାରର କେନ୍ଦ୍ରବିନ୍ଦୁ
ସୂଚନା ଅନୁସାରେ, କିଛି ମାସ ତଳେ ତରାସାହି ଅଞ୍ଚଳରେ ଜଣେ ଅସାଧୁ ବ୍ୟବସାୟୀ ଧରାପଡ଼ିବା ପରେ ଏବେ ଆଳସାହିକୁ ଏହି କାରବାର ସ୍ଥାନାନ୍ତରିତ ହୋଇଛି। ପ୍ରତ୍ୟେକ ଦିନ ଭୋର ୪ଟାରୁ ପାଉଡର ଓ କେମିକାଲ ଗୋଳା ଯାଇ ଦୈନିକ ପ୍ରାୟ ୨୦୦ ରୁ ୩୦୦ ଲିଟର ନକଲି କ୍ଷୀର ତିଆରି ହେଉଛି। ଏହି କ୍ଷୀର ଅସ୍ତରଙ୍ଗ ବ୍ଲକର ବିଭିନ୍ନ ପଞ୍ଚାୟତ ସମେତ ସ୍ଥାନୀୟ ଚା’ ଦୋକାନ, ମିଠା ଦୋକାନ ଓ ହୋଟେଲଗୁଡ଼ିକୁ ଯୋଗାଇ ଦିଆଯାଉଛି। ଲିଟର ପିଛା ପ୍ରାୟ ୨୦ ଟଙ୍କା ଅଧିକ ଲାଭ ରଖି ଅସାଧୁ ବ୍ୟବସାୟୀମାନେ ଜନସାଧାରଣଙ୍କ ସ୍ୱାସ୍ଥ୍ୟ ସହ ଖେଳଉଛନ୍ତି।
ସ୍ୱାସ୍ଥ୍ୟ ପ୍ରତି ଗୁରୁତର ବିପଦ
କ୍ଷୀରରେ ମାତ୍ରାଧିକ ସୋଡା, ୟୁରିଆ ଓ ଡିଟରଜେଣ୍ଟ ଭଳି କ୍ଷତିକାରକ ରାସାୟନିକ ପଦାର୍ଥ ମିଶାଯାଉଥିବା ନେଇ ଡାକ୍ତରମାନେ ଉଦ୍ବେଗ ପ୍ରକାଶ କରିଛନ୍ତି।
- ଛୋଟ ଶିଶୁଙ୍କ ଲିଭର ଓ କିଡନୀ ନଷ୍ଟ ହେବାର ଆଶଙ୍କା ରହିଛି।
- ଗର୍ଭବତୀ ମହିଳା ଓ ବୃଦ୍ଧବୃଦ୍ଧାଙ୍କ ସ୍ୱାସ୍ଥ୍ୟ ପାଇଁ ଏହା ଅତ୍ୟନ୍ତ ମାରାତ୍ମକ।
ଖାଦ୍ୟ ସୁରକ୍ଷା ବିଭାଗର ନୀରବତାକୁ ନେଇ ପ୍ରଶ୍ନ
ଅଞ୍ଚଳରେ ଏପରି କାରବାର ବ୍ୟାପକ ହେଉଥିଲେ ହେଁ ଖାଦ୍ୟ ସୁରକ୍ଷା ବିଭାଗ ଓ ପୁରୀ ଜିଲ୍ଲା ଖାଦ୍ୟ ନିରୀକ୍ଷକ କୌଣସି ଦୃଢ଼ ପଦକ୍ଷେପ ନ ନେବା ସନ୍ଦେହ ସୃଷ୍ଟି କରିଛି। ବିଭାଗୀୟ ଚଢ଼ାଉ ଓ ନମୁନା ପରୀକ୍ଷାର ଅଭାବ ଯୋଗୁଁ ଅସାଧୁ ବ୍ୟବସାୟୀମାନେ କୌଣସି ଭୟ ନରଖି କାରବାର ଚଳାଇଛନ୍ତି।
ଖାଉଟିଙ୍କ ଦାବି
ଏହି ଖବର ସ୍ଥାନୀୟ ଲୋକଙ୍କ ଅଭିଯୋଗ ଆଧାରରେ ଆସିଥିବାରୁ କ୍ଷୀରର ପ୍ରକୃତ ସତ୍ୟାସତ୍ୟ ଯାଞ୍ଚ ପାଇଁ ତୁରନ୍ତ ସରକାରୀ ତଦନ୍ତ ଆବଶ୍ୟକ। ଖାଉଟି ମହଲ ପକ୍ଷରୁ ନିମ୍ନଲିଖିତ ଦାବି କରାଯାଇଛି:
- ଆଳସାହି ସମେତ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକରେ ତୁରନ୍ତ ଖାଦ୍ୟ ସୁରକ୍ଷା ବିଭାଗ ଚଢ଼ାଉ କରୁ।
- ସନ୍ଦିଗ୍ଧ କ୍ଷୀରର ନମୁନା ସଂଗ୍ରହ କରି ଲ୍ୟାବ୍ (Lab) କୁ ପରୀକ୍ଷା ପାଇଁ ପଠାଯାଉ।
- ଅସାଧୁ ବ୍ୟବସାୟୀଙ୍କ ଲାଇସେନ୍ସ ରଦ୍ଦ କରାଯାଇ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ନିଆଯାଉ।
ତୁରନ୍ତ ସରକାରୀ ସ୍ତରରେ କାର୍ଯ୍ୟାନୁଷ୍ଠାନ ଗ୍ରହଣ କରା ନଗଲେ, ସ୍ଥାନୀୟ ଜନସାଧାରଣ ରାଜରାସ୍ତାକୁ ଓହ୍ଲାଇବାକୁ ଚେତାବନୀ ଦେଇଛନ୍ତି।
