ପୁଣି ନଗଡ଼ାରେ ଅପପୁଷ୍ଟିର ଛାୟା; ୨ ଶିଶୁ ସାମ୍ ଶ୍ରେଣୀଭୁକ୍ତ
କାଳିଆପାଣି: ନଗଡ଼ାରୁ ଅପପୁଷ୍ଟିର ଚିନ୍ତାଜନକ ଚିତ୍ର ପୁଣି ସାମ୍ନାକୁ ଆସିଛି। ସରକାର ଓ ଜିଲ୍ଲା ପ୍ରଶାସନ ଦୀର୍ଘ ବର୍ଷ ଧରି ନଗଡ଼ାର ବିକାଶ ପାଇଁ ପ୍ରୟାସ କରୁଥିଲେ ମଧ୍ୟ ଶିଶୁଙ୍କ ପୁଷ୍ଟି ସ୍ଥିତିକୁ ନେଇ ପ୍ରଶ୍ନ ଉଠିଛି। ତଳ ନଗଡ଼ାରେ ଦୁଇ ଜୁଆଙ୍ଗ ଶିଶୁ ସାମ୍ (Severe Acute Malnutrition) ଶ୍ରେଣୀରେ ଥିବା ଜଣାପଡ଼ିଛି।
କାନ୍ତ ଓ ମିଟୁ ପ୍ରଧାନଙ୍କ ୩୩ ମାସର ଝିଅ ଜ୍ୟୋତ୍ସ୍ନାରାଣୀ ଏବଂ ଗାଲେ ଓ ମଙ୍ଗୁଳୁ ପ୍ରଧାନଙ୍କ ୧୯ ମାସର ପୁଅ ମହେଶ୍ୱରଙ୍କ ଓଜନ ୪ କିଲୋଗ୍ରାମରୁ କମ୍ ଥିବା କୁହାଯାଇଛି।
ଅପପୁଷ୍ଟି ସହ ଜୁଝୁଛନ୍ତି ଦୁଇ ଶିଶୁ
ସୂଚନା ଅନୁସାରେ, ଦୁଇ ଶିଶୁଙ୍କ ମାଆ ରକ୍ତହୀନତାରେ ପୀଡ଼ିତ। ପର୍ଯ୍ୟାପ୍ତ ମା’କ୍ଷୀର ନ ମିଳିବା ସହ ଉପଯୁକ୍ତ ଶିଶୁ ଆହାରର ଅଭାବ ଯୋଗୁଁ ଦୁଇ ଶିଶୁଙ୍କ ସ୍ୱାସ୍ଥ୍ୟ ଅବସ୍ଥା ଚିନ୍ତାଜନକ ହୋଇପଡ଼ିଥିବା ଅଭିଯୋଗ ହୋଇଛି।
ଜ୍ୟୋତ୍ସ୍ନାରାଣୀଙ୍କୁ ଚିକିତ୍ସା ପାଇଁ ଏକାଧିକ ଥର ସୁକିନ୍ଦା ପୁଷ୍ଟି ସାଧନ କେନ୍ଦ୍ର (ଏନ୍ଆର୍ସି)ରେ ଭର୍ତ୍ତି କରାଯାଇଥିବା ବେଳେ ତାଙ୍କୁ କଟକ ଶିଶୁ ଭବନକୁ ମଧ୍ୟ ପଠାଯାଇଥିଲା। ଶିଶୁଟି ହୃଦ୍ରୋଗରେ ପୀଡ଼ିତ ଏବଂ ହୃଦୟରେ ଛିଦ୍ର ଥିବା ଜଣାପଡ଼ିଛି।
ପ୍ରାୟ ୩ ବର୍ଷ ବୟସ ହୋଇଥିଲେ ମଧ୍ୟ ଜ୍ୟୋତ୍ସ୍ନାରାଣୀ ବସିବା କିମ୍ବା ଚାଲିବାରେ ସକ୍ଷମ ହୋଇନଥିବା କୁହାଯାଇଛି। ସେହିପରି ମହେଶ୍ୱର ମଧ୍ୟ ଠିକ୍ ଭାବେ ଠିଆ ହୋଇପାରୁନାହାନ୍ତି।
ଖାଦ୍ୟ ସୁରକ୍ଷା ଯୋଜନାରୁ ବି ବଞ୍ଚିତ ଅଭିଯୋଗ
ଦୁଇ ପରିବାରର ଆର୍ଥିକ ସ୍ଥିତିକୁ ନେଇ ମଧ୍ୟ ପ୍ରଶ୍ନ ଉଠିଛି। କାନ୍ତ ଓ ମିଟୁ ପ୍ରଧାନଙ୍କ ପରିବାରର ସ୍ୱତନ୍ତ୍ର ରାସନ କାର୍ଡ ନଥିବା ଅଭିଯୋଗ ହୋଇଛି। ଅନ୍ୟପକ୍ଷରେ, ଗାଲେ ଓ ମଙ୍ଗୁଳୁ ପ୍ରଧାନଙ୍କ ୧୧ ଜଣିଆ ପରିବାରକୁ ମାସକୁ ମାତ୍ର ୧୦ କିଲୋ ଚାଉଳ ମିଳୁଥିବା କୁହାଯାଇଛି।
ଏନ୍ଆର୍ସି ନେବାକୁ ଚାଲିଛି ଉଦ୍ୟମ
ମହେଶ୍ୱରଙ୍କୁ ସୁକିନ୍ଦା ଏନ୍ଆର୍ସିକୁ ନେଇ ଚିକିତ୍ସା କରାଇବା ପାଇଁ ସ୍ୱାସ୍ଥ୍ୟ ବିଭାଗ ପକ୍ଷରୁ ନିୟମିତ ଉଦ୍ୟମ କରାଯାଉଥିବା କୁହାଯାଇଛି। ତେବେ ପରିବାର ପକ୍ଷରୁ ସହଯୋଗ ମିଳୁନଥିବା ଅଭିଯୋଗ ରହିଛି।
ଏହି ପରିବାରର ପୂର୍ବରୁ ମଧ୍ୟ ଅନେକ ଶିଶୁ ସାମ୍ ଶ୍ରେଣୀରେ ଥିବା କୁହାଯାଇଛି। ୨୦୨୪ ଫେବ୍ରୁଆରିରେ ଅନୁସୟା ନାମକ ଜଣେ ଶିଶୁର ମୃତ୍ୟୁ ଘଟିଥିବା ମଧ୍ୟ ଉଲ୍ଲେଖ କରାଯାଇଛି।
ଅଙ୍ଗନବାଡ଼ିରେ ମଧ୍ୟ ଅନେକ ଦୁର୍ବଳ ଶିଶୁ
ତଳ ନଗଡ଼ା ଅଙ୍ଗନବାଡ଼ି କେନ୍ଦ୍ରରେ ନାମ ଥିବା ୩୫ ଜଣ ଶିଶୁଙ୍କ ମଧ୍ୟରୁ ଅନେକ ଶିଶୁ ଦୁର୍ବଳ ଶ୍ରେଣୀରେ ଥିବା ଜଣାପଡ଼ିଛି। କେତେକ ମାଆ ଶିଶୁମାନଙ୍କୁ ସାଙ୍ଗରେ ନେଇ ତଇଳାରେ କାମ କରିବାକୁ ଯାଉଥିବାରୁ ଶିଶୁଙ୍କ ଯତ୍ନ ଓ ପୁଷ୍ଟିକୁ ନେଇ ମଧ୍ୟ ଚିନ୍ତା ବଢ଼ିଛି।
ନଗଡ଼ାରେ ଅପପୁଷ୍ଟି ରୋକିବା ପାଇଁ ସରକାରୀ ସ୍ତରରେ ବିଭିନ୍ନ ପଦକ୍ଷେପ ସତ୍ତ୍ୱେ ପୁଣି ଦୁଇ ଶିଶୁ ସାମ୍ ଶ୍ରେଣୀରେ ଚିହ୍ନଟ ହେବା ଘଟଣା ପ୍ରଶାସନର ଚିନ୍ତା ବଢ଼ାଇଛି। ଶିଶୁମାନଙ୍କୁ ଠିକ୍ ସମୟରେ ପୁଷ୍ଟିକର ଖାଦ୍ୟ, ଚିକିତ୍ସା ଓ ଆବଶ୍ୟକ ସ୍ୱାସ୍ଥ୍ୟସେବା ମିଳିବା ଏବେ ଗୁରୁତ୍ୱପୂର୍ଣ୍ଣ ହୋଇପଡ଼ିଛି।
