ନୂଆଦିଲ୍ଲୀ, ୧୭/୦୮: ଫୁଟବଲ୍ପ୍ରେମୀଙ୍କ ପାଇଁ ଆସିଛି ଏକ ବଡ଼ ଖବର। ମହାନ ଫୁଟବଲର କ୍ରିଷ୍ଟିଆନୋ ରୋନାଲ୍ଡୋ ନିଜ ଅବସରକୁ ନେଇ ବଡ଼ ସଙ୍କେତ ଦେଇଛନ୍ତି। ୪୧ ବର୍ଷୀୟ ପର୍ତ୍ତୁଗୀଜ୍ ତାରକା କହିଛନ୍ତି, ଆଗାମୀ ସିଜନ୍ ତାଙ୍କ ପେସାଦାର ଫୁଟବଲ୍ କ୍ୟାରିୟରର ଶେଷ ଅଧ୍ୟାୟ ହୋଇପାରେ।
ଦୀର୍ଘ ୨୫ ବର୍ଷର କ୍ୟାରିୟରରେ ରୋନାଲ୍ଡୋ ବିଶ୍ୱ ଫୁଟବଲ୍ରେ ନିଜର ଏକ ଅଲଗା ପରିଚୟ ତିଆରି କରିଛନ୍ତି। ସ୍ପୋର୍ଟିଂ, ମାଞ୍ଚେଷ୍ଟର ୟୁନାଇଟେଡ୍, ରିଅଲ୍ ମାଡ୍ରିଡ୍ ଓ ଜୁଭେଣ୍ଟସ୍ ଭଳି କ୍ଲବ୍ ପରେ ବର୍ତ୍ତମାନ ସେ ସାଉଦି ଆରବର ଅଲ୍ ନାସର ପାଇଁ ଖେଳୁଛନ୍ତି। ତାଙ୍କ ଅଲ୍ ନାସର ଚୁକ୍ତି ୨୦୨୭ ପର୍ଯ୍ୟନ୍ତ ରହିଛି।
‘ଏହା ହୋଇପାରେ ମୋର ଶେଷ ବର୍ଷ’
ନିକଟରେ ଏକ ସାକ୍ଷାତକାରରେ ରୋନାଲ୍ଡୋ ନିଜ ଭବିଷ୍ୟତ ନେଇ ଖୋଲାଖୋଲି ମତ ରଖିଛନ୍ତି। ତାଙ୍କ କଥାରୁ ସ୍ପଷ୍ଟ ଯେ ଫୁଟବଲ୍ରୁ ବିଦାୟ ନେବା ନେଇ ସେ ମାନସିକ ଭାବେ ପ୍ରସ୍ତୁତ ହେଉଛନ୍ତି। ଅବସର ପରେ ପରିବାର ସହ ସମୟ କାଟିବା, ଭ୍ରମଣ କରିବା ଏବଂ ପ୍ୟାଡେଲ୍ ଖେଳିବା ଭଳି କାର୍ଯ୍ୟରେ ସମୟ ଦେବାକୁ ସେ ଚାହୁଁଥିବା ଜଣାଇଛନ୍ତି।
୨୦୨୬ ବିଶ୍ୱକପ୍ ଥିଲା ଶେଷ ବିଶ୍ୱକପ୍
ରୋନାଲ୍ଡୋ ପୂର୍ବରୁ ମଧ୍ୟ କହିଥିଲେ ଯେ ୨୦୨୬ ଫିଫା ବିଶ୍ୱକପ୍ ତାଙ୍କର ଶେଷ ବିଶ୍ୱକପ୍ ହେବ। ଏହା ତାଙ୍କର ଷଷ୍ଠ ବିଶ୍ୱକପ୍ ଥିଲା। ଟୁର୍ଣ୍ଣାମେଣ୍ଟରେ ସେ ୩ଟି ଗୋଲ୍ କରିଥିଲେ, ଯଦିଓ ପର୍ତ୍ତୁଗାଲ୍ ରାଉଣ୍ଡ ଅଫ୍ ୧୬ରେ ସ୍ପେନ୍ଠାରୁ ପରାଜିତ ହୋଇଥିଲା।
ଅଲ୍ ନାସରରେ ଶେଷ ଅଧ୍ୟାୟ?
୨୦୨୫ରେ ରୋନାଲ୍ଡୋ ଅଲ୍ ନାସର ସହ ଚୁକ୍ତି ୨୦୨୭ ପର୍ଯ୍ୟନ୍ତ ବଢ଼ାଇଥିଲେ। ତେଣୁ ତାଙ୍କ ବର୍ତ୍ତମାନର ଚୁକ୍ତିର ଶେଷ ସମୟ ଓ ନିକଟରେ ଦିଆଯାଇଥିବା ଅବସର ସଙ୍କେତକୁ ନେଇ ୨୦୨୬-୨୭ ସିଜନ୍ ତାଙ୍କ କ୍ୟାରିୟରର ଶେଷ ପର୍ଯ୍ୟାୟ ହୋଇପାରେ ବୋଲି ଚର୍ଚ୍ଚା ଜୋର ଧରିଛି।
ରୋନାଲ୍ଡୋଙ୍କ ଫୁଟବଲ୍ ଯାତ୍ରା ଶେଷ ହେବାକୁ ଥିବା ଏହି ସଙ୍କେତ ବିଶ୍ୱର କୋଟି କୋଟି ପ୍ରଶଂସକଙ୍କୁ ଭାବପ୍ରବଣ କରିଛି। ତେବେ ରୋନାଲ୍ଡୋ ଏପର୍ଯ୍ୟନ୍ତ ଏକ ନିର୍ଦ୍ଦିଷ୍ଟ ଅବସର ତାରିଖ ଘୋଷଣା କରିନାହାନ୍ତି।
