ଆସିଲା ଶବବ୍ୟବଚ୍ଛେଦ ରିପୋର୍ଟ, ସନ୍ଦେହଘେରରେ ଭୁବନେଶ୍ୱରର ଏଏସ୍ଆଇ
କଟକ, ୭|୭ (ବ୍ୟୁରୋ ): କଟକ ଚାଉଳିଆଗଞ୍ଜ ଥାନା ଆଇଆଇସି (IIC) ବିଉଟି ମହାନ୍ତିଙ୍କ ରହସ୍ୟଜନକ ମୃତ୍ୟୁ ମାମଲାରେ ଏକ ବଡ଼ ଖୁଲାସା ହୋଇଛି। ବିଉଟିଙ୍କ ଶବବ୍ୟବଚ୍ଛେଦ ରିପୋର୍ଟ ଆସିବା ପରେ ଜଣାପଡ଼ିଛି ଯେ, ଶ୍ବାସରୁଦ୍ଧ ହେବା କାରଣରୁ ହିଁ ତାଙ୍କର ମୃତ୍ୟୁ ଘଟିଛି। ଅନ୍ୟପଟେ ଘଟଣାର ତଦନ୍ତ କରୁଥିବା କଟକ କମିସନରେଟ୍ ପୁଲିସ ମୃତ ଅଧିକାରୀଙ୍କ ମୋବାଇଲ୍ ଫୋନ୍ରୁ କେତେକ ଗୁରୁତ୍ୱପୂର୍ଣ୍ଣ ସୁରାଗ ହାସଲ କରିଛି, ଯାହା ପରେ ତଦନ୍ତ ପ୍ରକ୍ରିୟା ଆହୁରି ଜୋରଦାର ହୋଇଛି।
ଭୁବନେଶ୍ୱରର ଏଏସ୍ଆଇଙ୍କୁ ଅଜଣା ସ୍ଥାନରେ ଜେରା
ମିଳିଥିବା ସୂଚନା ଅନୁଯାୟୀ, ବିଉଟିଙ୍କ ମୋବାଇଲ୍ କଲ୍ ରେକର୍ଡ (CDR) ଯାଞ୍ଚ କରିବା ପରେ ଭୁବନେଶ୍ବର କମିସନରେଟ୍ ପୁଲିସ ଅଧୀନ ଏକ ଥାନାରେ କାର୍ଯ୍ୟରତ ଜଣେ ଏଏସ୍ଆଇ (ASI) ଙ୍କ ଭୂମିକା ସନ୍ଦେହଘେରକୁ ଆସିଛି। କଟକ କମିସନରେଟ୍ ପୁଲିସର ବରିଷ୍ଠ ଅଧିକାରୀମାନେ ସମ୍ପୃକ୍ତ ଏଏସ୍ଆଇଙ୍କୁ ଏକ ଅଜଣା ସ୍ଥାନରେ ଅଟକ ରଖି ମାରାଥନ୍ ଜେରା ଚଳାଇଛନ୍ତି।
ରେଷ୍ଟରୁମ୍ରୁ ମିଳିଥିଲା ଶବ, ଫରେନ୍ସିକ୍ ଯାଞ୍ଚ ପାଇଁ ଗଲା ମୋବାଇଲ୍-ଲ୍ୟାପଟପ୍
ସୂଚନାଯୋଗ୍ୟ ଯେ, ଆଇଆଇସି ବିଉଟି ମହାନ୍ତି ଥାନା କାର୍ଯ୍ୟାଳୟ ଉପରେ ଥିବା ତାଙ୍କ ରେଷ୍ଟରୁମ୍ରେ ବେକରେ ଓଢ଼ଣି ଲଗାଇ ଝୁଲି ପଡ଼ିଥିଲେ। କଟକ ଆଡିସନାଲ୍ ଡିସିପି ଅମରେନ୍ଦ୍ର ପଣ୍ଡା ଏବଂ ଜୋନ୍-୫ ଏସିପି ସୁଧାଂଶୁ ଜେନାଙ୍କ ଉପସ୍ଥିତିରେ ରେଷ୍ଟରୁମ୍ର କବାଟ ଭଙ୍ଗାଯାଇ ଶବ ଉଦ୍ଧାର କରାଯାଇଥିଲା। ପୁଲିସ କମିସନର୍ଙ୍କ ନିର୍ଦ୍ଦେଶ କ୍ରମେ ଭୁବନେଶ୍ୱର ଡିସିପି ଜଗମୋହନ ମିନା ଘଟଣାସ୍ଥଳରେ ପହଞ୍ଚି ବିଉଟିଙ୍କ ଦୁଇଟି ମୋବାଇଲ୍ ଫୋନ୍, ଲ୍ୟାପଟପ୍ ଏବଂ ଅନ୍ୟାନ୍ୟ ଆସବାବପତ୍ର ଜବତ କରିଥିଲେ।
ବର୍ତ୍ତମାନ ଏହି ସମସ୍ତ ସାମଗ୍ରୀକୁ ଫରେନ୍ସିକ୍ ଲ୍ୟାବ୍କୁ ପଠାଯାଇଛି। ପୁଲିସ ବିଉଟିଙ୍କ ବିଗତ ୪ ମାସର କଲ୍ ରେକର୍ଡ, ହ୍ବାଟ୍ସଆପ୍ ଚାଟିଂ ଏବଂ ଫେସ୍ବୁକ୍ ମେସେଞ୍ଜର୍ କଲ୍ ରେକର୍ଡ ଆଦିକୁ ତନ୍ନ ତନ୍ନ କରି ଯାଞ୍ଚ କରୁଛି। ଏହି ଯାଞ୍ଚ ସମୟରେ ୪ଟି ନିର୍ଦ୍ଦିଷ୍ଟ ସନ୍ଦିଗ୍ଧ ନମ୍ବର ପୁଲିସର ନଜରକୁ ଆସିଛି।
ପରିବାର ସହ ଆଲୋଚନା କଲେ ଡିସିପି
ଏହି ସମ୍ବେଦନଶୀଳ ମାମଲାର ଗମ୍ଭୀରତାକୁ ଦେଖି କଟକ ଡିସିପି ଖିଲାରୀ ଋଷିକେଶ ଦ୍ୟାନଦେଓ ନିଜେ ଚାଉଳିଆଗଞ୍ଜ ଥାନାରେ ପହଞ୍ଚିଛନ୍ତି। ସେ ମୃତ ବିଉଟିଙ୍କ ସ୍ୱାମୀ ଓ ପରିବାର ସଦସ୍ୟଙ୍କ ସହ ଘଟଣାକ୍ରମର ବିଭିନ୍ନ ଦିଗ ଉପରେ ଦୀର୍ଘ ସମୟ ଧରି ଆଲୋଚନା କରିଛନ୍ତି। ବିଉଟି ପୂର୍ବରୁ ପାହାଳ ଥାନାରେ ଆଇଆଇସି ଭାବେ କାର୍ଯ୍ୟରତ ଥିବା ବେଳେ ସେଠାରେ କାହା ସହ କୌଣସି ବିବାଦ ଥିଲା କି ନାହିଁ, ସେ ଦିଗକୁ ମଧ୍ୟ ପୁଲିସ ତଦନ୍ତ ପରିସରଭୁକ୍ତ କରିଛି। ଏହି ଆତ୍ମହତ୍ୟା ପଛର ପ୍ରକୃତ କାରଣ କ’ଣ ଏବଂ ଏଥିପାଇଁ କିଏ ଦାୟୀ, ତାହା ଉପରୁ ଖୁବ୍ଶୀଘ୍ର ପରଦା ହଟିବ ବୋଲି ଆଶା କରାଯାଉଛି।
Leave a Reply