ଥିରୁବନନ୍ତପୁରମ, ୭|୭(ବ୍ୟୁରୋ): କେରଳର ୱାୟନାଡ ଜିଲ୍ଲାରେ ଲଗାତାର ପ୍ରବଳ ବର୍ଷା ଯୋଗୁଁ ପରିସ୍ଥିତି ଗୁରୁତର ହୋଇପଡ଼ିଛି। ଅବିରତ ବର୍ଷାର ପ୍ରଭାବରେ କଲ୍ଲାଡି ଟନେଲ ନିର୍ମାଣ ସ୍ଥଳ ନିକଟରେ ଭୂସ୍ଖଳନ ଘଟିଥିବାରୁ ରାସ୍ତା ଅବରୋଧ ହେବା ସହ ଅନେକ ଶ୍ରମିକ ବିପଦରେ ପଡ଼ିଥିଲେ। ଘଟଣା ପରେ ତୁରନ୍ତ ପ୍ରଶାସନ, ଉଦ୍ଧାରକାରୀ ଦଳ ଓ ସ୍ଥାନୀୟ ଲୋକମାନେ ମିଶି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ପ୍ରାଥମିକ ସୂଚନା ଅନୁସାରେ, ଭୂସ୍ଖଳନ ସମୟରେ ପ୍ରାୟ ୧୦ ଜଣ ମାଟି ତଳେ ଫସି ରହିଥିବା ଆଶଙ୍କା କରାଯାଇଥିଲା। ଜରୁରୀକାଳୀନ ଦଳ ପହଞ୍ଚିବା ପୂର୍ବରୁ ସ୍ଥାନୀୟ ଅଞ୍ଚଳବାସୀ ସାହସିକ ଭାବେ ଉଦ୍ଧାର କାମରେ ଯୋଗଦେଇ କେତେକ ଲୋକଙ୍କୁ ସୁରକ୍ଷିତ ସ୍ଥାନକୁ ନେଇଥିଲେ। ପରେ ପହଞ୍ଚିଥିବା ଉଦ୍ଧାରକାରୀ ଦଳ ଅଭିଯାନକୁ ତ୍ୱରାନ୍ୱିତ କରିଥିଲେ। ଉଦ୍ଧାର ହୋଇଥିବା ଆହତମାନଙ୍କୁ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲକୁ ପଠାଯାଇଛି।
PRAJATANTRA
ଏହି ଦୁର୍ଘଟଣାରେ ଦୁଇଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ତେବେ ଅନ୍ୟମାନଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ସମସ୍ତ ସମ୍ଭବ ପ୍ରୟାସ ଜାରି ରହିଛି। ଘଟଣାସ୍ଥଳରେ ଭାରୀ ଯନ୍ତ୍ରପାତି ବ୍ୟବହାର କରାଯାଉଥିବା ବେଳେ ବର୍ଷା ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରୁଛି।
ଅଧିକାରୀମାନଙ୍କ ସୂଚନା ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଏହି ଅଞ୍ଚଳରେ ପ୍ରାୟ ୨୬୫ ମିଲିମିଟର ବର୍ଷା ରେକର୍ଡ କରାଯାଇଛି। ଅତ୍ୟଧିକ ବର୍ଷା ଫଳରେ ପାହାଡ଼ିଆ ଅଞ୍ଚଳର ମାଟି ଦୁର୍ବଳ ହୋଇ ଭୂସ୍ଖଳନ ସୃଷ୍ଟି ହୋଇଥିବା କୁହାଯାଉଛି। ସୌଭାଗ୍ୟବଶତଃ ପ୍ରବଳ ବର୍ଷା ଯୋଗୁଁ ନିର୍ମାଣ କାମ ପୂର୍ବରୁ ବନ୍ଦ ରହିଥିବାରୁ ବଡ଼ ଧରଣର ଜନହାନି ଏଡ଼ାଯାଇଛି।
PRAJATANTRA
Leave a Reply