ନୂଆଦିଲ୍ଲୀ, ୭/୮: ବାଂଲାଦେଶରେ ଦେଖାଦେଇଥିବା ଇନ୍ଧନ ସଙ୍କଟ ମଧ୍ୟରେ ଭାରତ ପକ୍ଷରୁ ପ୍ରାୟ ୫,୦୦୦ ମେଟ୍ରିକ ଟନ୍ ଡିଜେଲ ପଠାଯାଉଛି। ବାଂଲାଦେଶ-ଭାରତ ଫ୍ରେଣ୍ଡଶିପ ପାଇପଲାଇନ ମାଧ୍ୟମରେ ଏହି ଡିଜେଲ ଯୋଗାଣ କରାଯାଉଛି। ପଶ୍ଚିମ ଏସିଆରେ ବଢ଼ୁଥିବା ଉତ୍ତେଜନା ଯୋଗୁ ବିଶ୍ୱବ୍ୟାପୀ ଇନ୍ଧନ ଯୋଗାଣ ପ୍ରଭାବିତ ହୋଇଥିବାବେଳେ ବାଂଲାଦେଶରେ ମଧ୍ୟ ଇନ୍ଧନ ଅଭାବ ଦେଖାଦେଇଛି।
ବାଂଲାଦେଶ ପେଟ୍ରୋଲିୟମ କର୍ପୋରେସନ୍ (BPC)ର ଅଧିକାରୀଙ୍କ ସୂଚନା ଅନୁସାରେ, ଗୁରୁବାର ଅପରାହ୍ନ ୩ଟା ୨୦ ମିନିଟରୁ ଆସାମସ୍ଥିତ ନୁମାଲିଗଡ଼ ରିଫାଇନେରୀ ଲିମିଟେଡ୍ରୁ ଡିଜେଲ ପମ୍ପିଂ ଆରମ୍ଭ ହୋଇଥିଲା। ପାଇପଲାଇନ ମାଧ୍ୟମରେ ଏହି ଇନ୍ଧନ ପ୍ରାୟ ୪୪ ଘଣ୍ଟା ମଧ୍ୟରେ ଦିନାଜପୁରର ପାର୍ବତୀପୁର ଡିପୋରେ ପହଞ୍ଚିବ ବୋଲି ଆଶା କରାଯାଉଛି।
BPCର କମର୍ସ ଓ ଅପରେସନ୍ସ ବିଭାଗର ଜେନେରାଲ ମ୍ୟାନେଜର ମହମ୍ମଦ ମୋର୍ଶେଦ ହୁସେନ ଆଜାଦଙ୍କ କହିବାନୁସାରେ, ପ୍ରତି ଘଣ୍ଟାରେ ପ୍ରାୟ ୧୧୩ ମେଟ୍ରିକ ଟନ୍ ଡିଜେଲ ପମ୍ପ କରାଯାଉଛି। ସମ୍ପୂର୍ଣ୍ଣ ଖେପ ଶୁକ୍ରବାର ସନ୍ଧ୍ୟା ସୁଦ୍ଧା ପାର୍ବତୀପୁର ଡିପୋରେ ପହଞ୍ଚିବା ନେଇ ଆଶା କରାଯାଉଛି।
୧୩୧ କିମି ପାଇପଲାଇନ
ଭାରତ-ବାଂଲାଦେଶ ଫ୍ରେଣ୍ଡଶିପ ପାଇପଲାଇନର ଲମ୍ବ ପ୍ରାୟ ୧୩୧ କିଲୋମିଟର। ଏହା ଭାରତର ସିଲିଗୁଡ଼ି ମାର୍କେଟିଂ ଟର୍ମିନାଲକୁ ଉତ୍ତର ବାଂଲାଦେଶର ପାର୍ବତୀପୁର ଡିପୋ ସହ ସଂଯୋଗ କରିଛି। ଇନ୍ଧନ ପରିବହନକୁ ଦ୍ରୁତ ଓ ଖର୍ଚ୍ଚସାପେକ୍ଷ କରିବା ଉଦ୍ଦେଶ୍ୟରେ ୨୦୨୩ରେ ଏହି ପାଇପଲାଇନର ଔପଚାରିକ ଉଦ୍ଘାଟନ କରାଯାଇଥିଲା।
