ନୂଆଦିଲ୍ଲୀ, ୫।୮: ଭାରତ-ମିଆଁମାର ସୀମା ବିବାଦର ସମାଧାନ ପାଇଁ ଜମି ଅଦଳବଦଳ ପ୍ରସ୍ତାବକୁ ନେଇ ଚର୍ଚ୍ଚା ଜୋର ଧରିଛି। ତେବେ ଏହା ଚୂଡ଼ାନ୍ତ ନିଷ୍ପତ୍ତି ନୁହେଁ, ବରଂ ଏକ ପ୍ରସ୍ତାବ ଉପରେ ବିଚାର ଚାଲିଥିବା ରିପୋର୍ଟ ରହିଛି।
ଭାରତ ଓ ମିଆଁମାର ମଧ୍ୟରେ ପ୍ରାୟ ୧,୬୪୩ କିଲୋମିଟର ଲମ୍ବା ଅନ୍ତର୍ଜାତୀୟ ସୀମା ରହିଛି। ଏହା ଅରୁଣାଚଳ ପ୍ରଦେଶ, ନାଗାଲାଣ୍ଡ, ମଣିପୁର ଓ ମିଜୋରାମ ଦେଇ ଯାଇଛି। ଘଞ୍ଚ ଜଙ୍ଗଲ, ପାହାଡ଼ ଓ ନଦୀ ଯୋଗୁଁ ଏହି ସୀମାରେ ସର୍ଭେ ଓ ନିରୀକ୍ଷଣ କାର୍ଯ୍ୟ ଚ୍ୟାଲେଞ୍ଜିଂ ରହିଛି।
୧.୪ ବର୍ଗ ମାଇଲ୍ ଜମି ଅଦଳବଦଳ ପ୍ରସ୍ତାବ?
ରିପୋର୍ଟ ଅନୁସାରେ, ମଣିପୁରର ଚାନ୍ଦେଲ ଜିଲ୍ଲାରେ ବର୍ଡର ପିଲାର ୬୫ରୁ ୬୮ ମଧ୍ୟରେ ସୀମା ନିର୍ଦ୍ଧାରଣ ସମ୍ପୂର୍ଣ୍ଣ କରିବା ପାଇଁ ପ୍ରାୟ ୧.୪ ବର୍ଗ ମାଇଲ୍ ଜମି ଅଦଳବଦଳ ପ୍ରସ୍ତାବ ଉପରେ ଭାରତ ସରକାର ବିଚାର କରୁଛନ୍ତି। ଏହି ଅଞ୍ଚଳ ମିଆଁମାରର ସାଗାଇଙ୍ଗ ଅଞ୍ଚଳର କବାଓ ଉପତ୍ୟକା ସହ ଲାଗିଛି।
ଏକ ସରକାରୀ ଦଲିଲ ଆଧାରରେ ପ୍ରକାଶିତ ରିପୋର୍ଟରେ ଏହି ପ୍ରସ୍ତାବର ଉଲ୍ଲେଖ ଥିବା କୁହାଯାଇଛି। ଏହାର ଉଦ୍ଦେଶ୍ୟ ହେଉଛି ଦୀର୍ଘଦିନ ଧରି ଅନିର୍ଦ୍ଧାରିତ ଥିବା ସୀମାର ଏକ ଅଂଶର ଡିମାର୍କେସନ୍ ସମ୍ପୂର୍ଣ୍ଣ କରିବା।
ବଢ଼ିଛି ସୁରକ୍ଷା ଚିନ୍ତା
ମିଆଁମାରରେ ୨୦୨୧ ପରେ ରାଜନୈତିକ ଅସ୍ଥିରତା ଓ ସଂଘର୍ଷ ପରିସ୍ଥିତି ଭାରତର ଉତ୍ତର-ପୂର୍ବ ସୀମା ପାଇଁ ନୂଆ ସୁରକ୍ଷା ଚ୍ୟାଲେଞ୍ଜ ଆଣିଛି। ସୀମାପାର ଅପରାଧ, ମାଦକ ଚୋରାଚାଲାଣ, ଅସ୍ତ୍ର ଚୋରାଚାଲାଣ ଓ ଉଗ୍ରବାଦୀଙ୍କ ଗତିବିଧିକୁ ନେଇ ଦୁଇ ଦେଶ ନିକଟରେ ସୁରକ୍ଷା ସହଯୋଗ ଓ ଗୁଇନ୍ଦା ସୂଚନା ଆଦାନପ୍ରଦାନ ବଢ଼ାଇବାକୁ ସମ୍ମତ ହୋଇଥିଲେ।
ଭାରତ ସମଗ୍ର ୧,୬୪୩ କିମି ସୀମାରେ ସୁରକ୍ଷା ବ୍ୟବସ୍ଥା ଓ ବାଡ଼ ନିର୍ମାଣକୁ ମଧ୍ୟ ଗୁରୁତ୍ୱ ଦେଉଛି। ତେଣୁ ଅନିର୍ଦ୍ଧାରିତ ସୀମା ଅଞ୍ଚଳର ଡିମାର୍କେସନ୍ ଶୀଘ୍ର ସମ୍ପୂର୍ଣ୍ଣ କରିବା ଏହି ପ୍ରକ୍ରିୟାର ଏକ ଗୁରୁତ୍ୱପୂର୍ଣ୍ଣ ଅଂଶ।
ବୈଦେଶିକ ମନ୍ତ୍ରଣାଳୟର ସ୍ପଷ୍ଟୀକରଣ
ଏହି ରିପୋର୍ଟ ମଧ୍ୟରେ ବୈଦେଶିକ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଦୁଇ ଦେଶ ମଧ୍ୟରେ ସୀମାର କିଛି ଅଞ୍ଚଳର ନିର୍ଦ୍ଧାରଣ ଏପର୍ଯ୍ୟନ୍ତ ବାକି ରହିଛି ଏବଂ ସେଗୁଡ଼ିକୁ ନେଇ ଆଲୋଚନା ଚାଲିଛି। ତେଣୁ ଜମି ଅଦଳବଦଳକୁ ନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ଚୁକ୍ତି ହୋଇନାହିଁ।
