ୱାଶିଂଟନ, ୫।୮: ଆମେରିକାରେ ଚିନ୍ତା ବଢ଼ାଇଛି ଏକ ଘାତକ ଫଙ୍ଗସ୍ ସଂକ୍ରମଣ ‘କ୍ୟାଣ୍ଡିଡା ଅରିସ୍’ (Candida auris)। ୨୦୨୬ରେ ଦେଶର ୨୩ଟି ରାଜ୍ୟରେ ଏହି ଫଙ୍ଗସ୍ ସଂକ୍ରମଣର ମାମଲା ଚିହ୍ନଟ ହୋଇଥିବା ରିପୋର୍ଟ ଆସିଛି। ଜୁଲାଇ ୧୮ ପର୍ଯ୍ୟନ୍ତ ଆମେରିକାରେ ୩,୦୦୦ରୁ ଅଧିକ କ୍ଲିନିକାଲ୍ ମାମଲା ରେକର୍ଡ ହୋଇଥିବା କୁହାଯାଇଛି।
ରିପୋର୍ଟ ଅନୁସାରେ, ଟେକ୍ସାସରେ ୭୦୬ଟି ମାମଲା ଥିବା ବେଳେ ମିଚିଗାନରେ ୫୦୩ ଏବଂ ଇଲିନୋଇସରେ ୩୬୬ଟି ମାମଲା ଚିହ୍ନଟ ହୋଇଛି। ତେବେ ମାମଲା ବଢ଼ିବାର ଅର୍ଥ ଏହା ନୁହେଁ ଯେ ଘର, ସ୍କୁଲ୍ କିମ୍ବା ସାଧାରଣ ସ୍ଥାନରେ ବ୍ୟାପକ ଭାବେ ଏହା ସଂକ୍ରମିତ ହେଉଛି।
କ’ଣ ଏହି Candida auris?
Candida auris ଏକ ପ୍ରକାର ଫଙ୍ଗସ୍, ଯାହା ହସ୍ପିଟାଲ୍ ଓ ଦୀର୍ଘକାଳୀନ ଚିକିତ୍ସା କେନ୍ଦ୍ରରେ ବିଶେଷ ଭାବେ ସମସ୍ୟା ସୃଷ୍ଟି କରିପାରେ। ଏହା ହସ୍ପିଟାଲ୍ର ବିଭିନ୍ନ ପୃଷ୍ଠରେ ଦୀର୍ଘ ସମୟ ରହିପାରେ ଏବଂ କେତେକ ଆଣ୍ଟିଫଙ୍ଗାଲ୍ ଔଷଧ ପ୍ରତି ପ୍ରତିରୋଧୀ ହୋଇପାରେ।
କିପରି ବ୍ୟାପେ?
ଏହି ଫଙ୍ଗସ୍ ସାଧାରଣତଃ ହସ୍ପିଟାଲ୍, ନର୍ସିଂହୋମ୍ ଏବଂ ଦୀର୍ଘକାଳୀନ ଚିକିତ୍ସା କେନ୍ଦ୍ର ଭଳି ସ୍ୱାସ୍ଥ୍ୟସେବା ସ୍ଥାନରେ ବ୍ୟାପିଥାଏ। ବିଶେଷକରି ଭେଣ୍ଟିଲେଟର, କ୍ୟାଥେଟର, ଫିଡିଂ ଟ୍ୟୁବ୍ କିମ୍ବା ଶିରା ମାଧ୍ୟମରେ ଚିକିତ୍ସା ନେଉଥିବା ଗୁରୁତର ଅସୁସ୍ଥ ରୋଗୀଙ୍କଠାରେ ଝୁମ୍ପ ଅଧିକ ରହିଥାଏ।
ଲକ୍ଷଣ ଓ ଚିକିତ୍ସା
Candida auris ଶରୀରର କେଉଁ ଅଂଶକୁ ସଂକ୍ରମିତ କରିଛି, ତାହା ଅନୁସାରେ ଲକ୍ଷଣ ଭିନ୍ନ ହୋଇପାରେ। ରକ୍ତ କିମ୍ବା ଅନ୍ୟ ଅଙ୍ଗରେ ଗୁରୁତର ସଂକ୍ରମଣ ହେଲେ ଏହା ଜୀବନ ପ୍ରତି ବିପଦ ସୃଷ୍ଟି କରିପାରେ। ଚିକିତ୍ସା ପାଇଁ ଡାକ୍ତରମାନେ ଆଣ୍ଟିଫଙ୍ଗାଲ୍ ଔଷଧ ବ୍ୟବହାର କରନ୍ତି, ତେବେ ଔଷଧ ପ୍ରତିରୋଧୀ ପ୍ରଜାତି ଥିବାରୁ ଚିକିତ୍ସା କେତେକ କ୍ଷେତ୍ରରେ ଜଟିଳ ହୋଇପାରେ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ଅନୁସାରେ, ସୁସ୍ଥ ବ୍ୟକ୍ତିଙ୍କ ପାଇଁ Candida auris ଦ୍ୱାରା ଗୁରୁତର ସଂକ୍ରମଣର ଆଶଙ୍କା ସାଧାରଣତଃ କମ୍। ଏହା ମୁଖ୍ୟତଃ ଗୁରୁତର ଅସୁସ୍ଥ ଏବଂ ଚିକିତ୍ସାଧୀନ ରୋଗୀଙ୍କ ପାଇଁ ଅଧିକ ଚିନ୍ତାର ବିଷୟ।
