କିମ୍ବଦନ୍ତୀ କଣ୍ଠଶିଳ୍ପୀ ଏସ୍. ଜାନକୀଙ୍କ ପରଲୋକ: ସଙ୍ଗୀତ ଜଗତରେ ଏକ ଯୁଗର ଅବସାନ

ମହୀଶୂର, ୧୧ ଜୁଲାଇ: ଭାରତୀୟ ସଙ୍ଗୀତ ଜଗତ ପାଇଁ ଏକ ଦୁଃଖଦ ଖବର। ସମଗ୍ର ଦେଶକୁ ନିଜ ସୁମଧୁର ସ୍ୱରରେ ବାନ୍ଧି ରଖିଥିବା ପ୍ରସିଦ୍ଧ ପ୍ଲେବ୍ୟାକ୍ ଗାୟିକା ଏସ୍. ଜାନକୀ (ସିସ୍ତଲା ଜାନକୀ)ଙ୍କର ୮୮ ବର୍ଷ ବୟସରେ ମହୀଶୂରଠାରେ ପରଲୋକ ଘଟିଛି। ଶନିବାର ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କ ମୃତ୍ୟୁ ଖବର ପ୍ରସାରିତ ହେବା ପରେ ସଙ୍ଗୀତ ପ୍ରେମୀ ଏବଂ ସିନେ ଜଗତରେ ଗଭୀର ଶୋକର ଛାୟା ଖେଳିଯାଇଛି।

ତାଙ୍କ ନାତୁଣୀ ଅପ୍‌ସରା ବୈଦ୍ୟୁଲା ସୋସିଆଲ ମିଡିଆ (ଇନଷ୍ଟାଗ୍ରାମ)ରେ ଏହି ଦୁଃଖଦ ଖବର ସୂଚନା ଦେଇ ଲେଖିଛନ୍ତି, “ଅତ୍ୟନ୍ତ ଦୁଃଖର ସହ ମୁଁ ଜଣାଉଛି ଯେ ମୋର ପ୍ରିୟ ଆଈ ତଥା କିମ୍ବଦନ୍ତୀ ଗାୟିକା ଶ୍ରୀମତୀ ଏସ୍. ଜାନକୀ ଆମକୁ ଛାଡି ଚାଲିଯାଇଛନ୍ତି। ସେ ପରିବାର ଗହଣରେ ଶାନ୍ତିପୂର୍ଣ୍ଣ ଭାବେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଆମ ହୃଦୟ ଭାରାକ୍ରାନ୍ତ, କିନ୍ତୁ ସେ ଜୀବନସାରା ନିଜ କାଳଜୟୀ ସଙ୍ଗୀତ ମାଧ୍ୟମରେ କୋଟି କୋଟି ଲୋକଙ୍କୁ ଯେଉଁ ଆନନ୍ଦ ଦେଇଛନ୍ତି, ସେଥିପାଇଁ ଆମେ କୃତଜ୍ଞ।” ଏହି କଠିନ ସମୟରେ ପରିବାରର ଗୋପନୀୟତାକୁ ସମ୍ମାନ ଦେବା ପାଇଁ ସେ ଅନୁରୋଧ ମଧ୍ୟ କରିଛନ୍ତି।

ଆନ୍ଧ୍ରରୁ ଚେନ୍ନାଇ ଓ ସଙ୍ଗୀତ ସଫର: ୨୩ ଅପ୍ରେଲ ୧୯୩୮ରେ ଆନ୍ଧ୍ରପ୍ରଦେଶର ଗୁଣ୍ଠୁର ଜିଲ୍ଲା ପଲ୍ଲାପଟଲା ଗ୍ରାମରେ ଜାନକୀ ଜନ୍ମଗ୍ରହଣ କରିଥିଲେ। ତାଙ୍କ ପିତା ଶ୍ରୀରାମମୂର୍ତ୍ତି ଜଣେ ଆୟୁର୍ବେଦ ଚିକିତ୍ସକ ଓ ଶିକ୍ଷକ ଥିଲେ। ସିରିସିଲାରେ ପିଲାଦିନ କାଟିଥିବା ଜାନକୀ ମାତ୍ର ୯ ବର୍ଷ ବୟସରେ ପ୍ରଥମେ ମଞ୍ଚରେ ଗୀତ ଗାଇଥିଲେ। ସେ କୌଣସି ଶାସ୍ତ୍ରୀୟ ସଙ୍ଗୀତର ଆନୁଷ୍ଠାନିକ ଶିକ୍ଷା ଗ୍ରହଣ କରିନଥିଲେ ମଧ୍ୟ ନାଦସ୍ୱରମ୍ ବିଦ୍ୱାନ ପାଇଡିସ୍ୱାମୀଙ୍କଠାରୁ ସଙ୍ଗୀତର ପ୍ରାଥମିକ ଶିକ୍ଷା ଲାଭ କରିଥିଲେ।

୨୦ ବର୍ଷ ବୟସରେ ନିଜ ମାମୁଙ୍କ ପରାମର୍ଶ କ୍ରମେ ସେ ଚେନ୍ନାଇ ଯାଇ ଏଭିଏମ୍ ଷ୍ଟୁଡିଓରେ ସଙ୍ଗୀତ ନିର୍ଦ୍ଦେଶକ ଆର୍. ସୁଦର୍ଶନମଙ୍କ ସହ କାମ କରିବା ଆରମ୍ଭ କରିଥିଲେ। ୧୯୫୭ ମସିହାରେ ତାମିଲ ଚଳଚ୍ଚିତ୍ର ‘ବିଧିୟିନ ବିଲାୟାତ୍ତୁ’ ଏବଂ ପରେ ତେଲୁଗୁ ଚଳଚ୍ଚିତ୍ର ‘ଏମ୍.ଏଲ୍.ଏ.’ ପାଇଁ ସେ ପ୍ରଥମେ କଣ୍ଠଦାନ କରିଥିଲେ।

ଓଡ଼ିଆ ସଙ୍ଗୀତ ଓ ଭାଷା ପ୍ରେମ: ଜାନକୀ କେବଳ ଦକ୍ଷିଣ ଭାରତ ନୁହେଁ, ବରଂ ଓଡ଼ିଆ ସଙ୍ଗୀତ ଜଗତରେ ମଧ୍ୟ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ। ସେ ଓଡ଼ିଆରେ ଅସଂଖ୍ୟ ସୁପରହିଟ୍ ଏବଂ କାଳଜୟୀ ଗୀତ ଗାଇ ଓଡ଼ିଶାର ଘରେ ଘରେ ପରିଚିତ ଥିଲେ। ଓଡ଼ିଆ ବ୍ୟତୀତ ସେ ତେଲୁଗୁ, ତାମିଲ, କନ୍ନଡ, ମାଲାୟାଲମ୍, ହିନ୍ଦୀ, ସଂସ୍କୃତ, ତୁଳୁ, ଉର୍ଦ୍ଦୁ, ପଞ୍ଜାବୀ, ବାଦାଗା, ବେଙ୍ଗଲୀ ଏବଂ କୋଙ୍କଣୀ ଭଳି ୨୦ଟି ଭାରତୀୟ ଭାଷା ସହ ଇଂରାଜୀ, ଜାପାନୀ, ଜର୍ମାନ ଓ ସିଂହଳୀ ଭଳି ବିଦେଶୀ ଭାଷାରେ ମଧ୍ୟ ଗୀତ ଗାଇଛନ୍ତି। ତାଙ୍କର ଏହି ଅତୁଳନୀୟ ଅବଦାନ ପାଇଁ ତାଙ୍କୁ ୪ଟି ଜାତୀୟ ଚଳଚ୍ଚିତ୍ର ପୁରସ୍କାର ଏବଂ ବିଭିନ୍ନ ରାଜ୍ୟରୁ ୩୩ଟି ରାଜ୍ୟ ଚଳଚ୍ଚିତ୍ର ପୁରସ୍କାର ମିଳିଥିଲା।

ବ୍ୟକ୍ତିଗତ ଜୀବନର ଦୁଃଖ: ୧୯୫୯ ମସିହାରେ ସେ ଭି. ରାମପ୍ରସାଦଙ୍କୁ ବିବାହ କରିଥିଲେ, ଯିଏ କି ତାଙ୍କୁ କ୍ୟାରିୟର ଗଢ଼ିବାରେ ସର୍ବଦା ପ୍ରେରଣା ଦେଇଥିଲେ। ତେବେ ୧୯୯୭ରେ ହୃଦ୍‌ଘାତ ଯୋଗୁଁ ତାଙ୍କ ସ୍ୱାମୀଙ୍କର ଦେହାନ୍ତ ହୋଇଥିଲା। ଚଳିତ ବର୍ଷ ଜାନୁଆରୀ ମାସରେ ତାଙ୍କ ଏକମାତ୍ର ପୁତ୍ର ମୂରଲୀ କ୍ରିଷ୍ଣାଙ୍କର ମଧ୍ୟ ପରଲୋକ ଘଟିଥିଲା, ଯାହା ତାଙ୍କ ପାଇଁ ଏକ ବଡ଼ ଶକ୍ତ ଧକ୍କା ଥିଲା।