ପଶ୍ଚିମବଙ୍ଗ ସ୍କୁଲ୍ ବହିରେ ହେବ ପରିବର୍ତ୍ତନ

ନୂଆଦିଲ୍ଲୀ : ପଶ୍ଚିମବଙ୍ଗର ସରକାରୀ ସ୍କୁଲ୍ରେ ପଢ଼ାଯାଉଥିବା ବଙ୍ଗଳା ଭାଷା ବହିରେ ଖୁବ୍ଶୀଘ୍ର ବଡ଼ ପରିବର୍ତ୍ତନ ହୋଇପାରେ। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସରକାର ଗଠନ କରିଥିବା ପାଠ୍ୟକ୍ରମ ସମୀକ୍ଷା କମିଟି ବହିରେ ବ୍ୟବହୃତ କିଛି ଶବ୍ଦ ବଦଳାଇବା ସହ ଇତିହାସ ପାଠ୍ୟକ୍ରମରେ ସଂଶୋଧନ କରିବାକୁ ସୁପାରିସ କରିଛି। ପ୍ରସ୍ତାବ ଅନୁସାରେ, ବଙ୍ଗଳା ବହିରେ ‘ପାଣି’ ବଦଳରେ ‘ଜଳ’ ଏବଂ ‘ଆବ୍ବା’ ବଦଳରେ ‘ବାବା’ ଭଳି ଶବ୍ଦ ବ୍ୟବହାର କରାଯିବ। ଏହା ସହ ହିନ୍ଦୁ ରାଷ୍ଟ୍ରବାଦୀ ନେତା ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀଙ୍କ ଜୀବନୀକୁ ପାଠ୍ୟକ୍ରମରେ ସାମିଲ କରିବା ଏବଂ ମୋଗଲ ଶାସନ ଓ ମାର୍କ୍ସବାଦୀ ଚିନ୍ତାଧାରା ସହ ଜଡ଼ିତ କିଛି ପାଠକୁ କମାଇବା ପାଇଁ ମଧ୍ୟ ପ୍ରସ୍ତାବ ରହିଛି। କଲ୍ୟାଣୀ ବିଶ୍ୱବିଦ୍ୟାଳୟର ପ୍ରଫେସର ଦେବାଶିଷ ଚାଟାର୍ଜୀ ଏହି ପାଠ୍ୟକ୍ରମ ଓ ପାଠ୍ୟପୁସ୍ତକ ସମୀକ୍ଷା କମିଟିର ମୁଖ୍ୟ ଅଛନ୍ତି। ତାଙ୍କ କହିବା ଅନୁସାରେ, ବଙ୍ଗଳା ଭାଷା ବହିରୁ ‘ପାଣି’, ‘ଆବ୍ବା’ ଓ ‘ଆମ୍ମି’ ଭଳି ଶବ୍ଦ ହଟାଇବାକୁ ନିଷ୍ପତ୍ତି ହୋଇଛି। ଏହା ବଦଳରେ ‘ଜଳ’, ‘ବାବା’ ଓ ‘ମା’ ଭଳି ଶବ୍ଦ ବ୍ୟବହାର କରାଯିବ। କମିଟିର ଲକ୍ଷ୍ୟ ହେଉଛି ୨୦୨୭ ଜାନୁଆରୀ ସୁଦ୍ଧା ନୂଆ ପାଠ୍ୟପୁସ୍ତକର ପ୍ରଥମ ସଂସ୍କରଣ ପ୍ରସ୍ତୁତ କରିବା। କମିଟିର ଜଣେ ବରିଷ୍ଠ ଅଧିକାରୀଙ୍କ ଅନୁସାରେ, ଇତିହାସ ବହିରୁ ମୋଗଲ ଶାସନ, ଭାରତରେ ବ୍ରିଟିଶ ଔପନିବେଶିକ ଶାସନ ଏବଂ ମାର୍କ୍ସବାଦ ସହ ଜଡ଼ିତ କିଛି ବିଷୟବସ୍ତୁ କମାଯିବ। ଅନ୍ୟପଟେ, ରବୀନ୍ଦ୍ରନାଥ ଟାଗୋରଙ୍କ କବିତା ‘ଶିବାଜୀ ଉତ୍ସବ’ ଓ ଦ୍ୱିଜେନ୍ଦ୍ରଲାଲ ରାୟଙ୍କ ନାଟକ ‘ମେୱାଡ଼ ପତନ’କୁ ବହିରେ ସାମିଲ କରିବାକୁ ପ୍ରସ୍ତାବ ରହିଛି। ଏହା ସହ ସିରାଜୁଦ୍ଦୌଲାଙ୍କ ଉପରେ ଆଧାରିତ ନାଟକ ଓ ଟାଗୋରଙ୍କ କବିତା ‘ଆଫ୍ରିକା’କୁ ପାଠ୍ୟକ୍ରମରୁ ହଟାଇବା ପାଇଁ ମଧ୍ୟ ପ୍ରସ୍ତାବ ରହିଛି।