ଭାରତ ଗସ୍ତରେ ଆସୁଛନ୍ତି ରୁଷ୍ ରାଷ୍ଟ୍ରପତି ପୁଟିନ୍, ମୋଦୀଙ୍କ ସହ ହେବ ଦ୍ୱିପାକ୍ଷିକ ବୈଠକ
ନୂଆଦିଲ୍ଲୀ: ଦୁଇ ଦିନ ପରେ ଭାରତ ଆସୁଛନ୍ତି ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ୍। ଦିଲ୍ଲୀରେ ବ୍ରିକ୍ସ ଶିଖର ସମ୍ମିଳନୀ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ପୁଟିନ୍ଙ୍କ ଦ୍ୱିପାକ୍ଷିକ ବୈଠକ ହେବ। କ୍ରେମ୍ଲିନ୍ ଏହି ବୈଠକକୁ ନିଶ୍ଚିତ କରିବା ସହ ଭାରତକୁ ରୁଷ୍ର ଜଣେ ‘ରଣନୈତିକ ସହଯୋଗୀ’ ବୋଲି କହିଛି।
ବୈଠକରେ ଭାରତ-ରୁଷ୍ ସମ୍ପର୍କ, ପ୍ରତିରକ୍ଷା, ଶକ୍ତି, ପରମାଣୁ ପ୍ରକଳ୍ପ ଓ ବାଣିଜ୍ୟ ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଆଲୋଚନା ହୋଇପାରେ। ଏଥିସହ ରୁଷ୍-ୟୁକ୍ରେନ୍ ଯୁଦ୍ଧ ଓ ଶାନ୍ତି ପ୍ରୟାସ ମଧ୍ୟ ଆଲୋଚନାରେ ସ୍ଥାନ ପାଇପାରେ।
କ୍ରେମ୍ଲିନ୍ ପ୍ରବକ୍ତା ଦିମିତ୍ରି ପେସ୍କୋଭ୍ଙ୍କ କହିବା ଅନୁଯାୟୀ, ମୋଦୀ ଓ ପୁଟିନ୍ଙ୍କ ମଧ୍ୟରେ ଖୋଲା ଏବଂ ବ୍ୟବହାରିକ ଆଲୋଚନା ହେବ। ବିଶ୍ୱ ରାଜନୀତି ସହ ଉଭୟ ଦେଶର ସମ୍ପର୍କ ସଂପର୍କିତ ସମ୍ବେଦନଶୀଳ ପ୍ରସଙ୍ଗ ମଧ୍ୟ ଆଲୋଚନା ହୋଇପାରେ।
ବ୍ରିକ୍ସକୁ ନେଇ ମଧ୍ୟ ରୁଷ୍ ନିଜର ଆଭିମୁଖ୍ୟ ସ୍ପଷ୍ଟ କରିଛି। ପେସ୍କୋଭ୍ଙ୍କ ଅନୁସାରେ, ବ୍ରିକ୍ସର ମୁଖ୍ୟ ଫୋକସ୍ ରାଜନୀତି ଓ ସୁରକ୍ଷା, ଅର୍ଥନୀତି ଓ ଆର୍ଥିକ ସହଯୋଗ ଏବଂ ସାଂସ୍କୃତିକ ଓ ମାନବୀୟ ସମ୍ପର୍କ ଉପରେ ରହିଛି। ଏଥିସହ ଆମେରିକାର ପ୍ରସ୍ତାବିତ ରୁଷ୍ ତୈଳ ଆମଦାନୀ ସମ୍ପର୍କିତ ପ୍ରତିବନ୍ଧକ ଉପରେ ମଧ୍ୟ ରୁଷ୍ର କଡ଼ା ଆଭିମୁଖ୍ୟ ଦେଖିବାକୁ ମିଳିଛି।
ବ୍ରିକ୍ସ ଦେଶଗୁଡ଼ିକ ମଧ୍ୟରେ ପ୍ରାୟ ୯୦ ପ୍ରତିଶତ ଦେୟ ଜାତୀୟ ମୁଦ୍ରାରେ ହେଉଥିବା ପେସ୍କୋଭ୍ ଦାବି କରିଛନ୍ତି। ଏବେ ପୁଟିନ୍ଙ୍କ ଭାରତ ଗସ୍ତ ଏବଂ ମୋଦୀ-ପୁଟିନ୍ ସାକ୍ଷାତକାର ଉପରେ ସମଗ୍ର ବିଶ୍ୱର ନଜର ରହିଛି। ବଦଳୁଥିବା ବିଶ୍ୱ ରାଜନୈତିକ ପରିସ୍ଥିତିରେ ଏହି ବୈଠକ ଭାରତ-ରୁଷ୍ ସମ୍ପର୍କର ଆଗାମୀ ଦିଗ ସମ୍ପର୍କରେ ଗୁରୁତ୍ୱପୂର୍ଣ୍ଣ ସଙ୍କେତ ଦେଇପାରେ।
