ଇସଲାମାବାଦ, ୧୪/୮: ପାକିସ୍ତାନର ସ୍ୱାଧୀନତା ଦିବସ ପୂର୍ବ ସନ୍ଧ୍ୟାରେ ଭାରତ ବିରୋଧରେ ଆକ୍ରମଣାତ୍ମକ ବୟାନ ଦେଇଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ। ସିନ୍ଧୁ ଜଳ ଚୁକ୍ତିକୁ ନେଇ ଭାରତ ଉପରେ ଅସନ୍ତୋଷ ପ୍ରକାଶ କରି ସେ କହିଛନ୍ତି, ପାକିସ୍ତାନ ନିଜ ଅଧିକାରର ପାଣି ପ୍ରସଙ୍ଗରେ କୌଣସି ସାଲିସ କରିବ ନାହିଁ ଏବଂ ଆବଶ୍ୟକ ପଡ଼ିଲେ ‘ସିଧାସଳଖ ଜବାବ’ ଦେବ।
ପାକିସ୍ତାନର ଏକ କାର୍ଯ୍ୟକ୍ରମରେ ଶେହବାଜ ସରିଫ କହିଛନ୍ତି ଯେ ଦେଶର ପ୍ରତ୍ୟେକ ବୁନ୍ଦା ପାଣି ତାଙ୍କ ପାଇଁ ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗ। ଏହାକୁ ସେ ‘ରେଡ୍ ଲାଇନ’ ଭାବେ ଦର୍ଶାଇବା ସହ କୌଣସି ପ୍ରକାର ଆପୋଷ ବୁଝାମଣା ହେବ ନାହିଁ ବୋଲି ମତ ଦେଇଛନ୍ତି।
ପହଲଗାମ ଆକ୍ରମଣ ପରେ ସିନ୍ଧୁ ଜଳ ଚୁକ୍ତି ସ୍ଥଗିତ
୨୦୨୫ ଏପ୍ରିଲ ୨୨ରେ ଜମ୍ମୁ-କାଶ୍ମୀରର ପହଲଗାମରେ ଘଟିଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ପରେ ଭାରତ ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିଥିଲା। ସୀମାପାର ଆତଙ୍କବାଦକୁ ପାକିସ୍ତାନ ସମ୍ପୂର୍ଣ୍ଣ ଓ ସ୍ଥାୟୀ ଭାବେ ବନ୍ଦ ନ କରିବା ପର୍ଯ୍ୟନ୍ତ ଏହି ନିଷ୍ପତ୍ତିରେ ପରିବର୍ତ୍ତନ ହେବ ନାହିଁ ବୋଲି ଭାରତ ପୂର୍ବରୁ ସ୍ପଷ୍ଟ କରିଛି।
ଆଭ୍ୟନ୍ତରୀଣ ସଙ୍କଟ ମଧ୍ୟରେ ଭାରତ ବିରୋଧୀ ସ୍ୱର
ପାକିସ୍ତାନରେ ଏହି ସମୟରେ ବିଭିନ୍ନ ଆଭ୍ୟନ୍ତରୀଣ ସମସ୍ୟା ଦେଖାଦେଇଥିବା ବେଳେ ଭାରତ ବିରୋଧୀ ବୟାନ ପୁଣି ଚର୍ଚ୍ଚାକୁ ଆସିଛି। ବିଶେଷକରି ବାଲୁଚିସ୍ତାନରେ ହିଂସା ଓ ଅସ୍ଥିରତା ଜାରି ରହିଛି। ସେଠାରେ ସେନା କାର୍ଯ୍ୟାନୁଷ୍ଠାନକୁ ନେଇ ମଧ୍ୟ ସରକାର ବିରୋଧୀ ଅସନ୍ତୋଷ ପ୍ରକାଶ ପାଉଛି।
ବାଲୁଚିସ୍ତାନରେ ହୋଇଥିବା ଏକ ସାମରିକ ବିମାନ ଆକ୍ରମଣରେ ଶିଶୁଙ୍କ ସମେତ ଅନେକ ଲୋକ ମୃତାହତ ହୋଇଥିବା ଦାବି ହୋଇଛି। ଏହାକୁ ନେଇ ସ୍ଥାନୀୟ ନେତା ଓ ମାନବାଧିକାର କର୍ମୀମାନେ ପାକିସ୍ତାନୀ ସେନାର ଭୂମିକା ଉପରେ ପ୍ରଶ୍ନ ଉଠାଇଛନ୍ତି।
ଖାଇବର ପଖ୍ତୁନ୍ଖ୍ବା ଓ ପିଓକେରେ ମଧ୍ୟ ଅସ୍ଥିରତା
କେବଳ ବାଲୁଚିସ୍ତାନ ନୁହେଁ, ଖାଇବର ପଖ୍ତୁନ୍ଖ୍ବାରେ ମଧ୍ୟ ହିଂସା ଓ ଆତଙ୍କବାଦୀ ଘଟଣା ବଢ଼ିଥିବା ଖବର ଆସୁଛି। ସେହିପରି ପାକିସ୍ତାନ ଅଧିକୃତ କାଶ୍ମୀରରେ ମଧ୍ୟ ବିଭିନ୍ନ ପ୍ରସଙ୍ଗକୁ ନେଇ ଅସନ୍ତୋଷ ଓ ବିକ୍ଷୋଭର ପରିସ୍ଥିତି ଦେଖାଦେଇଛି।
ଏଭଳି ଆଭ୍ୟନ୍ତରୀଣ ଚାପ ମଧ୍ୟରେ ଶେହବାଜ ସରିଫଙ୍କ ଭାରତ ବିରୋଧୀ ବୟାନ ପୁଣି ଥରେ ଦୁଇ ଦେଶ ମଧ୍ୟରେ ଜଳ ବଣ୍ଟନ ଓ ସୁରକ୍ଷା ପ୍ରସଙ୍ଗକୁ ଚର୍ଚ୍ଚାର କେନ୍ଦ୍ରକୁ ଆଣିଛି। ତେବେ ସିନ୍ଧୁ ଜଳ ଚୁକ୍ତିକୁ ନେଇ ଭାରତର ଆଭିମୁଖ୍ୟ ଏବଂ ପାକିସ୍ତାନର ପ୍ରତିକ୍ରିୟା ଉପରେ ଏବେ ଅନ୍ତର୍ଜାତୀୟ ମହଲର ନଜର ରହିଛି।
