ଭଦ୍ରକରେ ବଢୁଛି ଚୋରା ମଦ କାରବାର ଅଭିଯୋଗ, ଅବକାରୀ ବିଭାଗର ଭୂମିକା ନେଇ ପ୍ରଶ୍ନ

ଭଦ୍ରକ, (ପିପିଏସ୍): ସରକାରଙ୍କ ପକ୍ଷରୁ ‘ନିଶାମୁକ୍ତ ଓଡ଼ିଶା’ ପାଇଁ ସଚେତନତା ଅଭିଯାନ ଜାରି ରହିଥିବାବେଳେ ଭଦ୍ରକ ସହରର ବିଭିନ୍ନ ଅଞ୍ଚଳରେ ଚୋରା ମଦ କାରବାର ବଢୁଥିବା ନେଇ ଅଭିଯୋଗ ଉଠିଛି। ବିଶେଷକରି ପୁରୁଣାବଜାର, ମିର୍ଜାପୁର ଓ ନାଥସାହି ଅଞ୍ଚଳରେ ଦେଶୀ ମଦର ବେଆଇନ କାରବାର ଚାଲିଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି।

ସ୍ଥାନୀୟ ଅଭିଯୋଗ ଅନୁଯାୟୀ, ଭଦ୍ରକ ପୁରୁଣାବଜାର ଥାନା ଓ ଅବକାରୀ ଥାନା ଅଧୀନର କିଛି ଅଞ୍ଚଳରେ ଘରେ ଘରେ ଚୋରା ଦେଶୀ ମଦ ବିକ୍ରି ହେଉଥିବା କୁହାଯାଉଛି। ମଦ୍ୟପାନ କରି ଲୋକେ ରାସ୍ତାରେ ଅସୁସ୍ଥ ହେବା ସହ ଦୁର୍ଘଟଣାର ଶିକାର ହେଉଥିବା ନେଇ ମଧ୍ୟ ଅଭିଯୋଗ ରହିଛି।

ବେଆଇନ ମଦ ବିକ୍ରିକୁ ବିରୋଧ କରି ସ୍ଥାନୀୟ ଲୋକ ଓ କିଛି ସାମାଜିକ ସଂଗଠନ ପୂର୍ବରୁ ପ୍ରତିବାଦ କରିଥିବା ଜଣାପଡ଼ିଛି। କେତେକ ସମୟରେ ରାସ୍ତା ଅବରୋଧ କରିବା ସହ ପୁଲିସ ଓ ଅବକାରୀ ବିଭାଗର ଦ୍ୱାରସ୍ଥ ହୋଇଥିବା ମଧ୍ୟ ଦାବି କରିଛନ୍ତି ସ୍ଥାନୀୟ ଲୋକେ।

ଅଭିଯୋଗକାରୀଙ୍କ କହିବାନୁସାରେ, ପୁରୁଣାବଜାର ପୁଲିସ ପକ୍ଷରୁ ସମୟ ସମୟରେ ଚଢ଼ାଉ କରାଯାଇ କିଛି ଚୋରା ମଦ ଓ ଗାଡ଼ି ଜବତ କରାଯାଇଛି। ତେବେ ଏହା ସତ୍ତ୍ୱେ ଅଞ୍ଚଳରେ ବେଆଇନ ମଦ କାରବାର ଉପରେ ସମ୍ପୂର୍ଣ୍ଣ ରୋକ୍ ଲାଗିନଥିବା ଅଭିଯୋଗ ହୋଇଛି।

ଅନ୍ୟପକ୍ଷରେ, ଅବକାରୀ ବିଭାଗର କିଛି ଅଧିକାରୀଙ୍କ ଭୂମିକା ନେଇ ମଧ୍ୟ ସ୍ଥାନୀୟ ମହଲରେ ପ୍ରଶ୍ନ ଉଠିଛି। ଅଭିଯୋଗ ମିଳିବା ପରେ ମଧ୍ୟ ପ୍ରଭାବୀ କାର୍ଯ୍ୟାନୁଷ୍ଠାନ ହେଉନଥିବା ନେଇ କିଛି ବୁଦ୍ଧିଜୀବୀ ଅଭିଯୋଗ କରିବା ସହ ଆବଶ୍ୟକ ହେଲେ ଘଟଣାର ନିରପେକ୍ଷ ତଦନ୍ତ କରାଯିବାକୁ ଦାବି କରିଛନ୍ତି।

ପୂର୍ବରୁ ଚୋରା ମଦ କାରବାର ସହ ଜଡ଼ିତ ଏକ ଗାଡ଼ି ଧକ୍କାରେ ପୁରୁଣାବଜାର ଥାନାର ପୁଲିସ ଭ୍ୟାନ୍ କ୍ଷତିଗ୍ରସ୍ତ ହୋଇଥିବା ନେଇ ମଧ୍ୟ ଅଭିଯୋଗ ରହିଛି। ଏଭଳି ଘଟଣା ପରେ ବେଆଇନ ମଦ କାରବାର ବିରୋଧରେ ଅଧିକ କଡ଼ା ପଦକ୍ଷେପ ନେବାକୁ ଦାବି ହୋଇଛି।

ଚୋରା ମଦ କାରବାର ଯୋଗୁଁ ପରିବାରରେ ଅଶାନ୍ତି, ଦୁର୍ଘଟଣା ଓ ସାମାଜିକ ସମସ୍ୟା ବଢୁଥିବାରୁ ଏହା ଉପରେ ରୋକ୍ ଲଗାଇବାକୁ ସ୍ଥାନୀୟ ଲୋକେ ଦାବି କରିଛନ୍ତି। ତେବେ ଅବକାରୀ ଅଧିକାରୀଙ୍କ ବିରୋଧରେ ହୋଇଥିବା ଦୁର୍ନୀତି ସମ୍ପର୍କିତ ଅଭିଯୋଗର ସତ୍ୟତା ସ୍ୱାଧୀନ ତଦନ୍ତ ପରେ ହିଁ ସ୍ପଷ୍ଟ ହେବ।