ନୂଆଦିଲ୍ଲୀ, ୬/୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଦେଶ ଗସ୍ତକୁ ନେଇ ସଂସଦରେ ଖର୍ଚ୍ଚର ହିସାବ ଦେଇଛନ୍ତି କେନ୍ଦ୍ର ସରକାର। ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ପବିତ୍ର ମାର୍ଗେରିଟା ଗୁରୁବାର ରାଜ୍ୟ ସଭାରେ ଏହି ସୂଚନା ଦେଇଛନ୍ତି।
ସରକାରଙ୍କ ତଥ୍ୟ ଅନୁଯାୟୀ, ୨୦୨୧ରୁ ୨୦୨୬ ପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ ବିଦେଶ ଗସ୍ତରେ ୫୫୦ କୋଟିରୁ ଅଧିକ ଟଙ୍କା ଖର୍ଚ୍ଚ ହୋଇଛି। ଏଥିରେ ୨୦୨୧ରେ ୩୬ କୋଟିରୁ ଅଧିକ, ୨୦୨୨ରେ ୫୫ କୋଟି, ୨୦୨୩ରେ ୯୩ କୋଟି, ୨୦୨୪ରେ ୧୦୯ କୋଟି ଏବଂ ୨୦୨୫ରେ ୧୮୦ କୋଟି ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଛି।
୨୦୨୬ରେ ୭୪.୫ କୋଟି ଟଙ୍କା ଖର୍ଚ୍ଚ ହୋଇଥିବା ସରକାର ସୂଚନା ଦେଇଛନ୍ତି। ଚଳିତ ବର୍ଷ ଫେବୃଆରୀରୁ ଜୁଲାଇ ମଧ୍ୟରେ ପ୍ରଧାନମନ୍ତ୍ରୀ ୧୩ଟି ଦେଶ ଗସ୍ତ କରିଥିବା କୁହାଯାଇଛି। ଏହା ମଧ୍ୟରୁ ମେ ୨୦୨୬ରେ ହୋଇଥିବା ପାଞ୍ଚ-ରାଷ୍ଟ୍ରୀୟ ଗସ୍ତରେ ସର୍ବାଧିକ ୧୭.୪୬ କୋଟି ଟଙ୍କା ଖର୍ଚ୍ଚ ହୋଇଥିଲା।
ତେବେ ସରକାରଙ୍କ ଦ୍ୱାରା ଦିଆଯାଇଥିବା କିଛି ଖର୍ଚ୍ଚ ତଥ୍ୟକୁ ଚୂଡ଼ାନ୍ତ ବୋଲି ଧରାଯାଇନାହିଁ। ତାରା ଚିହ୍ନ (*) ଦିଆଯାଇଥିବା ଗସ୍ତଗୁଡ଼ିକର ବିଲ୍ ସମ୍ପୂର୍ଣ୍ଣ ଭାବେ ସମାଧାନ ହେବା ପରେ ଚୂଡ଼ାନ୍ତ ଖର୍ଚ୍ଚ ଜଣାପଡ଼ିବ।
ସରକାରଙ୍କ କହିବା ଅନୁଯାୟୀ, ପ୍ରଧାନମନ୍ତ୍ରୀଙ୍କ ବିଦେଶ ଗସ୍ତ ଦ୍ୱାରା ବିଭିନ୍ନ ଦେଶ ସହ ଭାରତର ଦ୍ୱିପାକ୍ଷିକ ଓ ବହୁପାକ୍ଷିକ ସମ୍ପର୍କ ମଜବୁତ ହୋଇଛି। ଏହି ଗସ୍ତ ସମୟରେ ପ୍ରଯୁକ୍ତିବିଦ୍ୟା, ବାଣିଜ୍ୟ, ନିବେଶ, ପ୍ରତିରକ୍ଷା, ଶକ୍ତି ଓ ଯୋଗାଣ ଶୃଙ୍ଖଳା ଭଳି କ୍ଷେତ୍ରରେ ବିଭିନ୍ନ ଚୁକ୍ତି ଓ ସହଯୋଗ ହୋଇଥିବା ସରକାର ଦର୍ଶାଇଛନ୍ତି।
ଏହାସହ ଭାରତ ଏପ୍ରିଲ ୨୦୨୧ରୁ ଡିସେମ୍ବର ୨୦୨୫ ମଧ୍ୟରେ ୩୮୧.୮ ବିଲିୟନ ଆମେରିକୀୟ ଡଲାରର ବିଦେଶୀ ପ୍ରତ୍ୟକ୍ଷ ନିବେଶ (FDI) ପାଇଥିବା ସରକାର ସଂସଦରେ ସୂଚନା ଦେଇଛନ୍ତି।
ତେବେ ଚଳିତ ବର୍ଷ ଜୁନ୍ରେ ପ୍ରଧାନମନ୍ତ୍ରୀଙ୍କ ଫ୍ରାନ୍ସ ଗସ୍ତର ଖର୍ଚ୍ଚ ଏହି ପ୍ରକାଶିତ ହିସାବରେ ଅନ୍ତର୍ଭୁକ୍ତ ହୋଇନଥିବା ଜଣାପଡ଼ିଛି।
