ଆମେରିକାରେ ଭାରତକୁ ସମ୍ମାନ: ଅଗଷ୍ଟ ୧୫କୁ ‘ଭାରତ ଦିବସ’ ଘୋଷଣା କଲେ ମାସାଚୁସେଟ୍ସ ରାଜ୍ୟପାଳ

ୱାଶିଂଟନ: ଭାରତର ସ୍ୱାଧୀନତା ଦିବସକୁ ସମ୍ମାନ ଜଣାଇ ଆମେରିକାର ମାସାଚୁସେଟ୍ସ ରାଜ୍ୟରେ ଅଗଷ୍ଟ ୧୫କୁ ‘ଭାରତ ଦିବସ’ ଭାବେ ଘୋଷଣା କରାଯାଇଛି। ରାଜ୍ୟପାଳ ମୌରା ହେଲି ଏନେଇ ଏକ ଘୋଷଣାପତ୍ର ଜାରି କରିଛନ୍ତି। ମାସାଚୁସେଟ୍ସର ବିକାଶରେ ଭାରତୀୟ-ଆମେରିକୀୟ ସମୁଦାୟର ଅବଦାନକୁ ସ୍ୱୀକୃତି ଦେବା ସହ ସ୍ୱାଧୀନତା ଦିବସ ପାଳନରେ ରାଜ୍ୟବାସୀଙ୍କୁ ସାମିଲ ହେବାକୁ ସେ ଆହ୍ୱାନ ଦେଇଛନ୍ତି।

ଅଗଷ୍ଟ ୧ ତାରିଖରେ ଜାରି ଘୋଷଣାପତ୍ରରେ ଭାରତୀୟ-ଆମେରିକୀୟ ସମୁଦାୟର ସାମାଜିକ ସେବା, ସାଂସ୍କୃତିକ ଆଦାନପ୍ରଦାନ ଓ ନାଗରିକ ସମ୍ପର୍କ ସୁଦୃଢ଼ କରିବାରେ ଥିବା ଭୂମିକାକୁ ପ୍ରଶଂସା କରାଯାଇଛି। ଏହା ସହ ମାସାଚୁସେଟ୍ସର ସାମାଜିକ ଓ ଅର୍ଥନୈତିକ ବିକାଶରେ ଭାରତୀୟ ସମୁଦାୟର ଅବଦାନକୁ ମଧ୍ୟ ଉଲ୍ଲେଖ କରାଯାଇଛି।

୭୯ତମ ସ୍ୱାଧୀନତା ଦିବସ

ଘୋଷଣାପତ୍ରରେ ଭାରତ ୧୯୪୭ରେ ବ୍ରିଟିଶ ଶାସନରୁ ସ୍ୱାଧୀନତା ହାସଲ କରିଥିବା କଥା ଉଲ୍ଲେଖ କରାଯାଇଛି। ଚଳିତବର୍ଷ ଅଗଷ୍ଟ ୧୫ରେ ଭାରତ ୭୯ତମ ସ୍ୱାଧୀନତା ଦିବସ ପାଳନ କରିବ। ବିଭିନ୍ନ ଧର୍ମ, ଭାଷା, ସଂସ୍କୃତି ଓ ପରମ୍ପରାର ବିବିଧତା ମଧ୍ୟରେ ଭାରତର ଏକତାକୁ ମଧ୍ୟ ଘୋଷଣାପତ୍ରରେ ପ୍ରଶଂସା କରାଯାଇଛି।

ମାସାଚୁସେଟ୍ସରେ ଭାରତୀୟଙ୍କ ବଡ଼ ଅବଦାନ

ଘୋଷଣାପତ୍ର ଅନୁସାରେ, ମାସାଚୁସେଟ୍ସର ଭାରତୀୟ-ଆମେରିକୀୟ ସମୁଦାୟ ଚିକିତ୍ସା, ବିଜ୍ଞାନ, ପ୍ରଯୁକ୍ତି, ଶିକ୍ଷା, ବ୍ୟବସାୟ ଓ ସାର୍ବଜନୀନ ସେବା ଭଳି ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଭୂମିକା ନେଇଛନ୍ତି। ଏହି ଅବଦାନ ରାଜ୍ୟର ସାମାଜିକ, ସାଂସ୍କୃତିକ ଓ ଅର୍ଥନୈତିକ ଜୀବନକୁ ସମୃଦ୍ଧ କରିଛି।

ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ, ଗଣତାନ୍ତ୍ରିକ ମୂଲ୍ୟବୋଧ ଏବଂ ଶାନ୍ତି ଓ ପ୍ରଗତି ପ୍ରତି ଭାରତର ପ୍ରତିବଦ୍ଧତାକୁ ସମ୍ମାନ ଜଣାଇବା ପାଇଁ ଏହି ଦିବସ ପାଳନ କରାଯିବ ବୋଲି ଘୋଷଣାପତ୍ରରେ କୁହାଯାଇଛି।

ବୋଷ୍ଟନରେ ମଧ୍ୟ ‘ଭାରତ ଦିବସ’

ଏହି ସମୟରେ ବୋଷ୍ଟନ ସହରର ମେୟର ମିଶେଲ ଉ ମଧ୍ୟ ଅଗଷ୍ଟ ୧୫କୁ ‘ଭାରତ ଦିବସ’ ଭାବେ ଘୋଷଣା କରିଥିବା ସୂଚନା ମିଳିଛି। ବୋଷ୍ଟନରେ ନୂଆ ଭାରତୀୟ କନସୁଲେଟ୍ ଖୋଲିବାକୁ ସେ ସ୍ୱାଗତ କରିଛନ୍ତି। ଏହା ସହ ‘ସେଲ୍ ବୋଷ୍ଟନ-୨୫୦’ କାର୍ଯ୍ୟକ୍ରମରେ ଭାରତୀୟ ନୌସେନାର ଜାହାଜ ଆଇଏନଏସ୍ ସୁଦର୍ଶିନୀର ଆଗମନକୁ ମଧ୍ୟ ପ୍ରଶଂସା କରିଛନ୍ତି।