ଅସ୍ତରଙ୍ଗରେ ମଦ ମାଫିଆଙ୍କ ରାଜ୍: ଥାନା ସାମ୍ନାରେ ଚୋରା ଚାଲାଣ, ପୋଲିସ ଓ ଅବକାରୀ ବିଭାଗ ନିଷ୍କ୍ରିୟ

ଅସ୍ତରଙ୍ଗ: ୨୩/୦୭: ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଏବେ ମଦ ମାଫିଆଙ୍କ ପ୍ରାଦୁର୍ଭାବରେ କବଳିତ। ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ଅସ୍ତରଙ୍ଗ ମୁଖ୍ୟ ବଜାର ଆଜି ନିଶା କାରବାରର ଏକ ବଡ଼ ଆଡ୍ଡା ସ୍ଥଳୀରେ ପରିଣତ ହୋଇଛି, ଯାହା ଅଞ୍ଚଳର ଆଇନ ଶୃଙ୍ଖଳା ପରିସ୍ଥିତିକୁ ବିପନ୍ନ କରୁଛି।

ସରକାରୀ ନିୟମକୁ ଖୁଲମଖୁଲ୍ଲା ଉଲ୍ଲଂଘନ

ବଜାରର ମୁଖ୍ୟ ପ୍ରବେଶ ପଥରେ ସରକାରୀ ସ୍ୱୀକୃତି ପ୍ରାପ୍ତ ବିଦେଶୀ ମଦ ଦୋକାନ (ତ୍ରିଭୁଜ ଆକୃତି) ଅବସ୍ଥିତ। ଏପରିକି, ସାପ୍ତାହିକ ହାଟ ଭିତରେ ମଧ୍ୟ ସରକାରୀ ଦେଶୀ ମଦ ଦୋକାନ (“ଆସ୍କା ୪୦”) ଖୋଲାଯାଇଛି। କାଗଜପତ୍ରରେ ସବୁ ନିୟମ ଅନୁଯାୟୀ ଚାଲିଥିବା ଦର୍ଶାଯାଉଥିଲେ ବି, ବାସ୍ତବରେ ଏଠାରେ ସରକାରୀ ନିୟମର ଖୋଲା ଉଲ୍ଲଂଘନ ପୂର୍ବକ ଲୁଟ୍ ଚାଲିଛି।

ଥାନା ଆଗରେ ଚୋରା ଚାଲାଣ: ପୋଲିସ ନିରବ

ଅଞ୍ଚଳବାସୀଙ୍କ ସବୁଠାରୁ ବଡ଼ ଅଭିଯୋଗ ହେଉଛି ଯେ, ଏହି ସରକାରୀ ମଦ ଦୋକାନଗୁଡ଼ିକରୁ ଦିନରାତି ସ୍କୁଟି ଯୋଗେ ଦେଶୀ ଓ ବିଦେଶୀ ମଦର ଚୋରା ଚାଲାଣ ହେଉଛି। ଆଶ୍ଚର୍ଯ୍ୟର କଥା, ଏହି ଚାଲାଣ ଅସ୍ତରଙ୍ଗ ଥାନା ସମ୍ମୁଖ ଦେଇ ହିଁ ଚାଲିଛି। ଥାନାଠାରୁ ମାତ୍ର କିଛି ପାଦ ଦୂରରେ ଅବାଧରେ ମଦ ବୁହାଯାଉଥିଲେ ମଧ୍ୟ ପୋଲିସ ପ୍ରଶାସନ ରହସ୍ୟଜନକ ଭାବେ ନିରବ ରହିଛି।

ପ୍ରଶାସନର ଲୋକଦେଖାଣିଆ କାର୍ଯ୍ୟାନୁଷ୍ଠାନ

ଅବକାରୀ ବିଭାଗର କାର୍ଯ୍ୟାଳୟ ନିମାପଡ଼ାରେ ଥିବାରୁ ଏହାର ଫାଇଦା ମାଫିଆମାନେ ଉଠାଉଛନ୍ତି। ମାସକୁ ଥରେ ନିମାପଡ଼ାରୁ ଅବକାରୀ ଟିମ୍ ଆସି କିଛି ଛୋଟ କୋଚିଆଙ୍କୁ ଧରି, ଫଟୋ ଉଠାଇ ନିଜ କର୍ତ୍ତବ୍ୟ ଶେଷ କରୁଛନ୍ତି। ସେହିପରି ଅସ୍ତରଙ୍ଗ ଥାନା, କାକଟପୁର ଥାନା ଓ ନୂଆଗଡ଼ ସାମୁଦ୍ରିକ ଥାନା ପକ୍ଷରୁ କରାଯାଉଥିବା ଚଢ଼ାଉ କେବଳ ଲୋକଦେଖାଣିଆ ବୋଲି ଅଭିଯୋଗ ହେଉଛି। ମୋଟା ଅଙ୍କର ପିସି କାରବାର ଯୋଗୁଁ ଅବକାରୀ ଓ ପୋଲିସ ବିଭାଗ ବଡ଼ ବ୍ୟବସାୟୀଙ୍କୁ ଛୁଉଁନାହାନ୍ତି ବୋଲି ସ୍ଥାନୀୟ ଲୋକେ ପ୍ରକାଶ କରିଛନ୍ତି।

ଗ୍ରାମାଞ୍ଚଳରେ ନିଶାର କରାଳ ଛାୟା

ପ୍ରଶାସନିକ ଉଦାସୀନତାର ସୁଯୋଗ ନେଇ ଅସ୍ତରଙ୍ଗ ବ୍ଲକର ପ୍ରତି ଗ୍ରାମାଞ୍ଚଳକୁ ଏବେ ଚୋରା ମଦ କାରବାର ବ୍ୟାପିଯାଇଛି। ପାନ ଦୋକାନଠାରୁ ଆରମ୍ଭ କରି ଗ୍ରୋସରୀ ଦୋକାନ ପର୍ଯ୍ୟନ୍ତ ସବୁଠି ହାତ ପାହାନ୍ତାରେ ଦେଶୀ ଓ ବିଦେଶୀ ମଦ ଉପଲବ୍ଧ ହେଉଛି। ଫଳରେ, ସ୍କୁଲ-କଲେଜ ପିଲାଙ୍କଠାରୁ ଆରମ୍ଭ କରି ବୃଦ୍ଧ ପର୍ଯ୍ୟନ୍ତ ସମସ୍ତେ ନିଶାର ଶିକାର ହେଉଛନ୍ତି। ଘରେ ଘରେ ପାରିବାରିକ କଳହ ଓ ମାରପିଟ୍ ନିତ୍ୟଦିନର ଘଟଣା ପାଲଟିଛି।

ସୁରକ୍ଷା ନା ସୁରକ୍ଷା: ଉଠିଲା ପ୍ରଶ୍ନ

ଗୋଟିଏ ବ୍ଲକରେ ୩ଟି ଥାନା ଥାଇ ବି ଯଦି ଥାନା ସମ୍ମୁଖରେ ଚୋରା ମଦ ଚାଲାଣ ବନ୍ଦ ହୋଇପାରୁନି, ତେବେ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ସାପ୍ତାହିକ ହାଟକୁ ଆସୁଥିବା ହଜାର ହଜାର ମହିଳା ଅସୁରକ୍ଷିତ ମନେ କରୁଛନ୍ତି ଏବଂ ଅସାମାଜିକ କାର୍ଯ୍ୟକଳାପ ବଢ଼ୁଥିବାରୁ ଅଭିଭାବକମାନେ ଭୟଭୀତ ଅଛନ୍ତି। ସରକାରଙ୍କ “ନିଶା ମୁକ୍ତ ଓଡ଼ିଶା” ନାରା ଅସ୍ତରଙ୍ଗରେ “ନିଶା ଯୁକ୍ତ ଓଡ଼ିଶା” ରେ ପରିଣତ ହୋଇଛି।

ଜନ ଆନ୍ଦୋଳନର ଚେତାବନୀ

ଅଞ୍ଚଳବାସୀ ତୁରନ୍ତ ନିମ୍ନଲିଖିତ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି:

୧. ସରକାରୀ ମଦ ଦୋକାନରୁ ସ୍କୁଟି ଯୋଗେ ହେଉଥିବା ଚୋରା ଚାଲାଣ ତୁରନ୍ତ ବନ୍ଦ କରାଯାଉ।

୨. ଥାନା ସମ୍ମୁଖ ଦେଇ ହେଉଥିବା ମଦ ପରିବହନ ଉପରେ ରୋକ୍ ଲଗାଯାଉ।

୩. ବଡ଼ ମଦ ବ୍ୟବସାୟୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ।

୪. ଲାଞ୍ଚୁଆ ଓ ମାଫିଆଙ୍କ ସହ ସମ୍ପୃକ୍ତ ପୋଲିସ ଅଧିକାରୀ/ଅଧିକାରିଣୀଙ୍କୁ ତୁରନ୍ତ ବଦଳି କରାଯାଉ।

ଯଦି ଏହି ଦାବିଗୁଡ଼ିକ ତୁରନ୍ତ ପୂରଣ ନହୁଏ, ତେବେ ଅସ୍ତରଙ୍ଗ ବ୍ଲକର ଜନସାଧାରଣ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବେ ଏବଂ ଏଥିପାଇଁ ଜିଲ୍ଲା ପୋଲିସ ଓ ଅବକାରୀ ବିଭାଗ ସମ୍ପୂର୍ଣ୍ଣ ଦାୟୀ ରହିବେ ବୋଲି ଚେତାବନୀ ଦିଆଯାଇଛି।