ଭୁବନେଶ୍ୱର,୧୦୲୭(ବ୍ୟୁରୋ): ରାଜ୍ୟରେ ଆଗାମୀ ପଞ୍ଚାୟତ ନିର୍ବାଚନକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ଓଡ଼ିଶାରେ ଏଥର ପଞ୍ଚାୟତ ନିର୍ବାଚନ ପ୍ରକ୍ରିୟା ଆସନ୍ତା ବର୍ଷର ଏପ୍ରିଲ କିମ୍ବା ମେ’ ମାସ ଆଡ଼କୁ ଅନୁଷ୍ଠିତ ହେବା ନେଇ ସଙ୍କେତ ମିଳିଛି। ରାଜ୍ୟ ନିର୍ବାଚନ କମିଶନରଙ୍କ ସଚିବ ସନ୍ତୋଷ କୁମାର ଦାଶ ଏହି ସମ୍ପର୍କରେ ଗଣମାଧ୍ୟମକୁ ଏକ ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛନ୍ତି।
ବର୍ଷା ଋତୁ ପୂର୍ବରୁ ପ୍ରକ୍ରିୟା ଶେଷ କରିବାକୁ ଲକ୍ଷ୍ୟ
ସଚିବଙ୍କ ସୂଚନା ମୁତାବକ, ନିର୍ବାଚନ ପୂର୍ବରୁ ହେବାକୁ ଥିବା ଜରୁରୀ ଏସଆଇଆର (SIR) କାର୍ଯ୍ୟ ଆସନ୍ତା ବର୍ଷ ମାର୍ଚ୍ଚ ମାସର ପ୍ରଥମ ସପ୍ତାହ ପର୍ଯ୍ୟନ୍ତ ଜାରି ରହିବ। ଏହି ପ୍ରକ୍ରିୟା ଶେଷ ହେବା ମାତ୍ରେ ହିଁ ନିର୍ବାଚନ ପାଇଁ ବିଗୁଲ୍ ବାଜିପାରେ। ବିଶେଷ କରି ରାଜ୍ୟରେ ବର୍ଷା ଋତୁ ଆରମ୍ଭ ହେବା ପୂର୍ବରୁ ସମଗ୍ର ନିର୍ବାଚନ ପ୍ରକ୍ରିୟାକୁ ସଫଳତାର ସହ ଶେଷ କରିବାକୁ ନିର୍ବାଚନ କମିଶନ ଲକ୍ଷ୍ୟ ରଖିଛନ୍ତି।
ଜିଲାପାଳ ଓ ଆରଡିସିଙ୍କ ସହ ହେଲା ଗୁରୁତ୍ୱପୂର୍ଣ୍ଣ ବୈଠକ
ଏହି ମେଗା ନିର୍ବାଚନକୁ ଶୃଙ୍ଖଳିତ ଏବଂ ମୁକ୍ତ ଅବାଧ ଭାବେ ପରିଚାଳନା କରିବା ପାଇଁ ରାଜ୍ୟ ପ୍ରଶାସନ ସ୍ତରରେ ପ୍ରସ୍ତୁତି ଆରମ୍ଭ ହୋଇଯାଇଛି। ଏହାର ପ୍ରାକ୍-ପ୍ରସ୍ତୁତି ସ୍ବରୂପ ରାଜ୍ୟର ସମସ୍ତ ଆରଡିସି (RDC) ଏବଂ ସମସ୍ତ ଜିଲାପାଳମାନଙ୍କ ସହ ଏକ ଉଚ୍ଚସ୍ତରୀୟ ବୈଠକ ସମ୍ପନ୍ନ ହୋଇଯାଇଛି। ଏହି ବୈଠକରେ ନିର୍ବାଚନ ସମ୍ବନ୍ଧୀୟ ବିଭିନ୍ନ ପ୍ରାଥମିକ ଦିଗ ଉପରେ ଆଲୋଚନା କରାଯାଇଛି।
୨୧ ତାରିଖରେ ବସିବ ପରବର୍ତ୍ତୀ ବୈଠକ
ପଞ୍ଚାୟତ ନିର୍ବାଚନର ଅଗ୍ରଗତି ଏବଂ ରୋଡମାପ୍ ସମୀକ୍ଷା କରିବା ପାଇଁ ଆସନ୍ତା ୨୧ ତାରିଖରେ ଆଉ ଏକ ରୁଟିନ ବୈଠକ ବସିବାକୁ ଯାଉଛି। ଏହି ବୈଠକରେ ନିର୍ବାଚନ ପ୍ରସ୍ତୁତି ସମ୍ପର୍କିତ ପରବର୍ତ୍ତୀ ରଣନୀତି ଉପରେ ମୋହର ବାଜିବ। ତେବେ କମିଶନଙ୍କ ଏହି ସୂଚନା ପରେ ଏବେଠାରୁ ହିଁ ରାଜ୍ୟର ଗାଁ ଗାଁରେ ରାଜନୈତିକ ଉଷ୍ମତା ବଢ଼ିବାରେ ଲାଗିଛି।
Leave a Reply