ଭୁବନେଶ୍ୱର,୯୲୭(ଉଦୟ): ରମାଦେବୀ ମହିଳା ବିଶ୍ୱବିଦ୍ୟାଳୟରେ ନିକଟରେ ଘଟିଥିବା ଛାତ୍ରୀ ଅଶାନ୍ତି ଘଟଣାକୁ ନେଇ ରାଜନୈତିକ ପରିବେଶ ତୀବ୍ର ହୋଇଯାଇଛି। ଛାତ୍ର ସଂଗଠନ ଏବିଭିପି ଓ ବିଜୁ ଛାତ୍ର ଜନତା ଦଳ (ବିସିଜେଡି) ପୃଥକ୍ ପୃଥକ୍ ସାମ୍ବାଦିକ ସମ୍ମିଳନୀ କରି ପରସ୍ପର ଉପରେ ଗୁରୁତର ଅଭିଯୋଗ ଆଣିବା ସହ ଦୋଷୀଙ୍କ ବିରୋଧରେ କଠୋର ପଦକ୍ଷେପ ଦାବି କରିଛନ୍ତି। ଆବଶ୍ୟକ କାର୍ଯ୍ୟାନୁଷ୍ଠାନ ନ ହେଲେ ଆନ୍ଦୋଳନକୁ ତୀବ୍ର କରାଯିବ ବୋଲି ଉଭୟ ସଂଗଠନ ଚେତାବନୀ ଦେଇଛନ୍ତି।
ଘଟଣା ପରେ ବିଶ୍ୱବିଦ୍ୟାଳୟ କ୍ୟାମ୍ପସରେ ପୁଲିସ ମୁତୟନ ରହିଛି। ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ବେଳେ ନାମଲେଖା ପ୍ରକ୍ରିୟା ପାଇଁ ଆସୁଥିବା ଛାତ୍ରୀମାନଙ୍କ ପରିଚୟ ଯାଞ୍ଚ କରିବା ପରେ ହିଁ କ୍ୟାମ୍ପସକୁ ପ୍ରବେଶ ଅନୁମତି ଦିଆଯାଉଛି। ଏବେ କ୍ୟାମ୍ପସରେ ଶିକ୍ଷାକାର୍ଯ୍ୟ ସ୍ୱାଭାବିକ ଭାବେ ଚାଲିଥିବା ସୂଚନା ମିଳିଛି।
ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ବିଜେଡି ନେତୃତ୍ୱ ଦାବି କରିଛି ଯେ ବିଶ୍ୱବିଦ୍ୟାଳୟ ପରିସରକୁ କିଛି ଯୁବକ ପ୍ରବେଶ କରି ଛାତ୍ରୀମାନଙ୍କୁ ଭୟଭୀତ କରିଥିଲେ। ଏହି ଘଟଣାରେ ସମ୍ପୃକ୍ତ ବ୍ୟକ୍ତିଙ୍କୁ ତୁରନ୍ତ ଗିରଫ କରିବା ସହ ମହିଳା ସୁରକ୍ଷା ପ୍ରତି ସରକାର ଗୁରୁତ୍ୱ ଦେଉନଥିବା ଅଭିଯୋଗ ମଧ୍ୟ କରାଯାଇଛି। ପୁଲିସ ନିଷ୍ପକ୍ଷ ଭାବେ କାର୍ଯ୍ୟ କରୁନଥିବା ବୋଲି ବିଜେଡି ପକ୍ଷରୁ କୁହାଯାଇଛି।
ଅନ୍ୟପଟେ ଏବିଭିପି ପକ୍ଷରୁ କୁହାଯାଇଛି ଯେ ସେମାନଙ୍କ ସଂଗଠନର ଜଣେ ଛାତ୍ରୀଙ୍କ ଉପରେ ଆକ୍ରମଣ ଘଟିଥିବା ବେଳେ ବିଶ୍ୱବିଦ୍ୟାଳୟ ପ୍ରଶାସନ ତୁରନ୍ତ କୌଣସି ପଦକ୍ଷେପ ନେଇନଥିଲା। ବିସିଜେଡି ସହ ସମ୍ପୃକ୍ତ ଥିବା ଜଣେ ଅଣଛାତ୍ରୀ ଏହି ଘଟଣାରେ ସଂପୃକ୍ତ ଥିବା ଅଭିଯୋଗ ମଧ୍ୟ ଏବିଭିପି କରିଛି। ସମଗ୍ର ଘଟଣାର ନିରପେକ୍ଷ ତଦନ୍ତ କରିବା ସହ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବାକୁ ସଂଗଠନ ଦାବି କରିଛି।
ଉଭୟ ପକ୍ଷର ପରସ୍ପର ବିରୋଧୀ ଅଭିଯୋଗ ମଧ୍ୟରେ ଘଟଣାର ପ୍ରକୃତ ସତ୍ୟାସତ୍ୟ ଜାଣିବା ପାଇଁ ନିରପେକ୍ଷ ତଦନ୍ତର ଆବଶ୍ୟକତା ଅନୁଭୂତ ହେଉଛି। ବିଶ୍ୱବିଦ୍ୟାଳୟରେ ଶାନ୍ତିପୂର୍ଣ୍ଣ ଶିକ୍ଷା ପରିବେଶ ବଜାୟ ରଖିବା ସହ ଛାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ଏବେ ପ୍ରଶାସନ ପାଇଁ ପ୍ରମୁଖ ଆହ୍ୱାନ ପାଲଟିଛି।
Leave a Reply