ବାରବାଟୀ କ୍ରିକେଟ ଷ୍ଟାଡିୟମର ନବୀକରଣ ନେଇ ଓଡ଼ିଶା ବିଧାନସଭାରେ ପ୍ରଶ୍ନ ଉଠାଇଲେ କଟକ ବିଧାୟିକା ସୋଫିଆ ଫିରଦୋସ କ୍ରୀଡ଼ା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ସୂଚନା ଦେଇ କହିଛନ୍ତି ଯେ, ବାରବାଟୀ କ୍ରିକେଟ ଷ୍ଟାଡିୟମର ନବୀକରଣ ପାଇଁ ସରକାରଙ୍କ କୌଣସି ପ୍ରସ୍ତାବ ନାହିଁ
ଭୁବନେଶ୍ୱର ୦୭-୦୩-୨୦୨୫ (ପିପିଏସ ) : ବାରବାଟୀ କ୍ରିକେଟ ଷ୍ଟାଡିୟମର ନବୀକରଣ ନେଇ ଓଡ଼ିଶା ବିଧାନସଭାରେ ପ୍ରଶ୍ନ ଉଠାଇଲେ କଟକ ବିଧାୟିକା ସୋଫିଆ ଫିରଦୋସ କ୍ରୀଡ଼ା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ସୂଚନା ଦେଇ କହିଛନ୍ତି ଯେ, ବାରବାଟୀ କ୍ରିକେଟ ଷ୍ଟାଡିୟମର ନବୀକରଣ ପାଇଁ ସରକାରଙ୍କ କୌଣସି ପ୍ରସ୍ତାବ ନାହିଁ।କଟକର ଐତିହାସିକ ଷ୍ଟାଡିୟମର ନବୀକରଣ ପାଇଁ ସରକାରଙ୍କ ଯୋଜନା ବିଷୟରେ ଜାଣିବା ପାଇଁ କଟକ ବିଧାୟିକା ସୋଫିଆ ଫିରଦୋସ ବିଧାନସଭାରେ ଏକ ପ୍ରଶ୍ନ ଉଠାଇଥିଲେ।ସୋଫିଆ ଏକ ଲିଖିତ ପ୍ରଶ୍ନରେ ପଚାରିଥିଲେ, କ୍ରୀଡା ଏବଂ ଯୁବ ସେବା ମନ୍ତ୍ରୀ ଏହା ଜଣାଇବେ ଯେ, ବାରବାଟୀ ଷ୍ଟାଡିୟମର ଐତିହାସିକ ଗୁରୁତ୍ୱ ଏବଂ ଗତ ଅନ୍ତର୍ଜାତୀୟ ମ୍ୟାଚ୍ ସମୟରେ ଜନସାଧାରଣଙ୍କ ଅତ୍ୟଧିକ ପ୍ରତିକ୍ରିୟାକୁ ବିଚାର କରି, ସରକାର ଏକ ବ୍ୟାପକ ନବୀକରଣ ଯୋଜନା କରିବେ କି? ନିୟମିତ ମ୍ୟାଚ୍ ଏବଂ ଖେଳାଳିଙ୍କ ସୁବିଧା ପାଇଁ ଏହାର ଭିତ୍ତିଭୂମିକୁ ଉନ୍ନତ କରିବା ପାଇଁ କ’ଣ ପଦକ୍ଷେପ ନିଆଯାଉଛି? ସରକାର ଷ୍ଟାଡିୟମର ନବୀକରଣ ଯୋଜନାକୁ କେବେ ଚୂଡ଼ାନ୍ତ ଏବଂ କାର୍ଯ୍ୟକାରୀ କରିବେ?”କଟକ ବିଧାୟକଙ୍କ ପ୍ରଶ୍ନର ଉତ୍ତର ଦେଇ ମନ୍ତ୍ରୀ କହିଥିଲେ, ବାରବାଟୀ କ୍ରିକେଟ ଷ୍ଟାଡିୟମ୍ ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ), କଟକ ଦ୍ୱାରା ପରିଚାଳିତ ହେଉଛି। ବର୍ତ୍ତମାନ ସୁଦ୍ଧା, କଟକର ବାରବାଟୀ କ୍ରିକେଟ୍ ଷ୍ଟାଡିୟମ୍ ନବୀକରଣ ପାଇଁ ସରକାରଙ୍କ ପାଖରେ ଏପରି କୌଣସି ପ୍ରସ୍ତାବ ନାହିଁ।ବଜେଟ ଅଧିବେଶନର ଦ୍ୱିତୀୟ ପର୍ଯ୍ୟାୟ ପାଇଁ ଆଜି ଓଡ଼ିଶା ବିଧାନସଭା ପୁନର୍ବାର ବସିଛି। ବିଜୁ ପଟ୍ଟନାୟକଙ୍କୁ ହୋଇଥିବା ଅସମ୍ମାନର ପ୍ରତିବାଦରେ ବିରୋଧୀ ଦଳ ସଦସ୍ୟମାନେ ଗୃହର ୱେଲ୍କୁ ଆସି ହୋହଲ୍ଲା କରିଥିଲେ ଏବଂ ପରବର୍ତ୍ତୀ ସମୟରେ ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବି ରଖାଯାଇଥିଲା। ଏହାପରେ ସ୍ଥିତି ନ ସୁଧୁରିବାରୁ ବାଚସ୍ପତି ସୁରମା ପାଢ଼ୀ ଗୃହକୁ ସୋମବାର ପର୍ଯ୍ୟନ୍ତ ମୁଲତବି ଘୋଷଣା କରିଥିଲେ।
