- ବିଜେଡି କର୍ମୀଙ୍କୁ ଖୁସି କରିବାକୁ ଚୟନ ହୋଇଛି ଅନେକ ପ୍ରକଳ୍ପ
* ଅଧା କାମ କରି ପୁରା ବିଲ ନେଇଗଲେ ଠିକାଦାର
* ଏସ୍ଟିମେଟ ଠାରୁ କମ କାମରେ ହୋଇଛି ସମ୍ପୂର୍ଣ୍ଣ ବିଲ - କେନ୍ଦୁଝର,୧୧/୮/୨୪(ପିପିଏସ) : କେନ୍ଦୁଝର ଜିଲ୍ଲାରେ “ଆମ ଓଡିଶା ନବୀନ ଓଡିଶା”ର ଅନେକ ପ୍ରକଳ୍ପ ଅଧପନ୍ତରିଆ ହୋଇ ରହିଥିବାବେଳେ ଅଧିକାଂଶ ପ୍ରକଳ୍ପ ଆରମ୍ଭ ନ ହୋଇ କେବଳ ନାମ ଫଳକରେ ସୀମିତ ରହିଛି । ଅଧିକାଂଶ ପ୍ରକଳ୍ପ ଆରମ୍ଭ ହୋଇନଥିବା ବେଳେ ସରକାର ପରିବର୍ତ୍ତନ ହେବା ପରେ କେଉଁ ଦଳର କର୍ମୀ କାମ କରିବେ ତାହାକୁ ନେଇ ବିବାଦ ଆରମ୍ଭ ହୋଇଛି । ନିର୍ବାଚନ ଫଳାଫଳ ବାହାରିବା ପରେ “ଆମ ଓଡିଶା ନବୀନ ଓଡିଶା” ଯୋଜନା ଅନିଶ୍ଚିତତାରେ ରହିଥିବା ବେଳେ ବିଡିଓ ହାତ ବାନ୍ଧି ଜିଲ୍ଲାସ୍ତରୀୟ ଅଧିକାରୀଙ୍କ ନିର୍ଦ୍ଦେଶକୁ ଅପେକ୍ଷା କରି ରହିଛନ୍ତି । ଆଦୌ କାମ ଆରମ୍ଭ ହୋଇନଥିବା ପ୍ରକଳ୍ପ ଗୁଡିକ ଏବେ ଶାସକ ଦଳର କର୍ମୀ କାମ କରିବାକୁ ଅଡି ବସିବାରୁ ବିଡିଓ ମାନେ ହରଡଘଣାରେ ପଡିଛନ୍ତି । ଯେଉଁ ପ୍ରକଳ୍ପ ଗୁଡିକ କାମ ଶେଷ ହୋଇ ବିଲ ପଇଠ ହୋଇଛି ତାହାର କାମ ପୁନଃ ଯାଂଚ କରିବାକୁ ଦାବୀ ଉଠିଲାଣି । ବିଶେଷ କରି ଝୁମ୍ପୁରା ଏବଂ ସଦର ବ୍ଲକରେ ଏଷ୍ଟିମେଟ ଠାରୁ କମ କାମ ହୋଇ ବିଲ ଦିଆଯାଇଛି । କାମ ଚାଲିଥିବାବେଳେ ବିଭାଗୀୟ ଯନ୍ତ୍ରୀ କାମର ମାନ ଯାଂଚ କରିନାହାଁନ୍ତି । ଅଧିକାଂଶ ପ୍ରକଳ୍ପରେ କାମ ଆରମ୍ଭ ହେବା ପୂର୍ବରୁ ସୂଚନା ଫଳକ ଲାଗିନାହିଁ । ଯେଉଁଠାରେ କାମର ଆବଶ୍ୟକତା ନାହିଁ ସେଠାରେ ପ୍ରକଳ୍ପ କରାଯାଇଛି । ବିଜେଡି କର୍ମୀଙ୍କୁ ଖୁସି କରିବାକୁ ଅନେକ ପ୍ରକଳ୍ପ ଚୟନ କରାଯାଇଥିବା ଅଭିଯୋଗ ହୋଇଛି । ଯାହାକି ବିଡିଓ ମାନେ କ୍ଷେତ୍ର ପରିଦର୍ଶନ କରିନାହାଁନ୍ତି । ଯନ୍ତ୍ରୀଙ୍କ ନାମରେ କାର୍ଯ୍ୟାଦେଶ ଦିଆଯାଇଥିବା ବେଳେ ସହକାରୀ ନିର୍ବାହୀ ଯନ୍ତ୍ରୀ ଏବଂ ବିଡିଓ ଏହାର ସଠିକ୍ ତଦାରଖ କରିନଥିବା ଅଭିଯୋଗ ହୋଇଛି । ସାଧାରଣ ଲୋକଙ୍କ ଉନ୍ନତକଳ୍ପେ ତିଆରି ହେବାକୁ ଥିବା ଏହି ପ୍ରକଳ୍ପଗୁଡିକ ଠିକ ସମୟରେ ନ ସରିଲେ ଲୋକେ ଏହାର ଉପକାର ପାଇପାରିବେ ନାହିଁ । ସଠିକ୍ ତଦାରଖ ଅଭାବରୁ ଅନେକ ପ୍ରକଳ୍ପକୁ ସମ୍ପୂର୍ଣ୍ଣ ଦେଖାଇ ଫାଇନାଲ ବିଲ ଠିକାଦାର ନେଇଗଲେଣି । ଗ୍ରାମାଂଚଳରେ ଭିତ୍ତିଭୂମିର ବିକାଶ, ଉନ୍ନୟନ ଓ ଐତିହ୍ୟର ପୁନରୁଦ୍ଧାର ପାଇଁ ନବୀନ ପଟ୍ଟନାୟକଙ୍କ ଶେଷ ପାଳିରେ ଆରମ୍ଭ ହୋଇଥିବା “ଆମ ଓଡିଶା ନବୀନ ଓଡିଶା” କାର୍ଯ୍ୟକ୍ରମରେ ଚରମ ବିଫଳତା ଦେଖାଦେବା ସହିତ ବସ୍ତୁତଃ ଏହି ଯୋଜନା ଫଳବତୀ ହୋଇ ନ ଥିବା ଜଣାପଡିଛି । ପୂର୍ବରୁ ଥିବା “ଆମ ଗାଁ ଆମ ବିକାଶ” କାର୍ଯ୍ୟକ୍ରମର ନାମ ପରିବର୍ତ୍ତନ କରାଯାଇ “ଆମ ଓଡିଶା ନବୀନ ଓଡିଶା” କରାଯାଇଥିବାବେଳେ କେନ୍ଦୁଝରରେ ୨୦୨୩ ମସିହା ଅକ୍ଟୋବର ୧୦ ତାରିଖ ଦିନ ଏହି କାର୍ଯ୍ୟକ୍ରମ ଆରମ୍ଭ କରାଯାଇଥିଲା । ଜିଲ୍ଲାକୁ ଏଥିପାଇଁ ୧୩ଗୋଟି ବ୍ଲକରେ ୩୫୬୨ଟି ପ୍ରକଳ୍ପ ମଂଜୁର ହୋଇଥିବା ବେଳେ ମିଶନ ଶକ୍ତି ଗୃହ ନିର୍ମାଣ, ପ୍ରାଥମିକ ବିଦ୍ୟାଳୟର ଉନ୍ନତିକରଣ, ମନ୍ଦିର ଓ ଐତିହ୍ୟର ପୁନରୁଦ୍ଧାର କାର୍ଯ୍ୟ କରାଯିବାକୁ ପ୍ରସ୍ତାବ ଗୃହୀତ ହୋଇଥିଲା l ଏଥିମଧ୍ୟରୁ ମାତ୍ର ୮୮୦ଟି ପ୍ରକଳ୍ପ ପୁର୍ଣ୍ଣାଙ୍ଗ ହୋଇଥିବାେବେଳ ଅବଶିଷ୍ଟ ୨୬୮୨ଟି ପ୍ରକଳ୍ପ ଶେଷ ହୋଇ ନ ଥିବା ସରକାରୀ ଭାବେ ଜଣାପଡିଛି । କେନ୍ଦୁଝର ସଦର ବ୍ଲକକୁ ଜିଳ୍ଲାର ସର୍ବାଧିକ ୩୨୫ଟି ପ୍ରକଳ୍ପ ମଂଜୁର ହୋଇଥିବାବେଳେ ୧୧୪ଟି ପ୍ରକଳ୍ପ ଶେଷ ହୋଇଥିବାବେଳେ ୨୧୧ଟି ପ୍ରକଳ୍ପ ଶେଷ ହୋଇନାହିଁ । ଯୋଡା ବ୍ଲକରେ ସର୍ବାଧିକ ପ୍ରକଳ୍ପ ଶେଷ ହୋଇ ନ ଥିବାବେଳେ ଏଥିପାଇଁ ଆବଶ୍ୟକୀୟ ଲୋକ କାମ କରିବା ପାଇଁ ଏହି ବ୍ଲକରେ ମିଳୁ ନ ଥିବା କଥା ଜଣାପଡିଛି । ଯୋଡା ବ୍ଲକ ପାଇଁ ୧୫୦ଟି ପ୍ରକଳ୍ପକୁ ମଂଜୁରୀ ଦିଆଯାଇଥିବାବେଳେ ମାତ୍ର ୩୪ଟି ପ୍ରକଳ୍ପ ଶେଷ ହୋଇଛି,୧୧୬ଟି ପ୍ରକଳ୍ପ ଅଧାପନ୍ତରିଆ ଭାବେ ପଡିରହିଛି । ଆନନ୍ଦପୁର ବ୍ଲକରେ ୧୬୫ଟି ପ୍ରକଳ୍ପ ମଂଜୁର ହୋଇଥିବାବେଳେ ୪୬ଟି ପ୍ରକଳ୍ପ କାମ ଶେଷ ହୋଇଛି ଓ ୧୧୯ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ବାଂଶପାଳ ବ୍ଲକରେ ୨୩୦ଟି ପ୍ରକଳ୍ପ ମଂଜୁର ହୋଇଥିବାବେଳେ ୮୭ଟି ପ୍ରକଳ୍ପ କାମ ଶେଷ ହୋଇଛି ଓ ୧୪୩ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ଚମ୍ପୁଆ ବ୍ଲକରେ ୨୧୧ ପ୍ରକଳ୍ପ ମଂଜୁର ହୋଇଥିବାବେଳେ ୪୮ଟି ପ୍ରକଳ୍ପ କାମ ଶେଷ ହୋଇଛି ଓ ୧୬୩ଟି ପ୍ରକଳ୍ପ କାମ ସରି ନ ଥିବା ସରକାରୀ ଭାବେ ଜଣାପଡିଛି । ଘଷିପୁରା ବ୍ଲକରେ ୩୩୫ଟି ପ୍ରକଳ୍ପ ମଂଜୁର ହୋଇଥିବାବେଳେ ୯୬ଟି ପ୍ରକଳ୍ପ କାମ ଶେଷ ହୋଇଛି ଓ ୨୩୯ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ଘଟଗାଁ ବ୍ଲକରେ ୩୧୮ଟି ପ୍ରକଳ୍ପ ମଂଜୁର ହୋଇଥିବାବେଳେ ୮୫ଟି ପ୍ରକଳ୍ପ କାମ ଶେଷ ହୋଇଛି ଓ ୨୩୩ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ହରିଚନ୍ଦନପୁର ବ୍ଲକରେ ୩୨୬ଟି ପ୍ରକଳ୍ପ ମଂଜୁର ହୋଇଥିବାବେଳେ ୫୪ଟି ପ୍ରକଳ୍ପ କାମ ଶେଷ ହୋଇଛି ଓ ୨୭୨ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ହାଟଡିହି ବ୍ଲକରେ ୪୫୨ଟି ପ୍ରକଳ୍ପ ମଂଜୁର ହୋଇଥିବାବେଳେ ୭୫ଟି ପ୍ରକଳ୍ପ କାମ ଶେଷ ହୋଇଛି ଓ ୩୭୭ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ଝୁମ୍ପୁରା ବ୍ଲକରେ ୨୭୧ଟି ପ୍ରକଳ୍ପ ମଂଜୁର ହୋଇଥିବାବେଳେ ୬୨ଟି ପ୍ରକଳ୍ପ କାମ ଶେଷ ହୋଇଛି ଓ ୨୦୯ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ପାଟଣା ବ୍ଲକରେ ୨୩୯ଟି ପ୍ରକଳ୍ପ ମଂଜୁର ହୋଇଥିବାବେଳେ ୯୧ଟି ପ୍ରକଳ୍ପ କାମ ଶେଷ ହୋଇଛି ଓ ୧୪୮ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ସାହାରପଡା ବ୍ଲକରେ ୨୩୭ଟି ପ୍ରକଳ୍ପ ମଂଜୁର ହୋଇଥିବାବେଳେ ୫୦ଟି ପ୍ରକଳ୍ପ କାମ ଶେଷ ହୋଇଛି ଓ ୧୮୭ ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ତେଲକୋଇ ବ୍ଲକରେ ୩୦୩ଟି ପ୍ରକଳ୍ପ ମଂଜୁର ହୋଇଥିବାବେଳେ ୩୮ଟି ପ୍ରକଳ୍ପ କାମ ଶେଷ ହୋଇଛି ଓ ୨୬୫ଟି ପ୍ରକଳ୍ପ କାମ ସରି ନ ଥିବା ଜଣାପଡିଛି । ସାହାରପଡା ଏବଂ ପାଟଣା ବ୍ଳକରେ ଅଧିକାଂଶ ପ୍ରକଳ୍ପ ଅଧପନ୍ତରିଆ ଏବଂ କାର୍ଯ୍ୟ ନିମ୍ନମାନର ହୋଇଥିବା ଅଭିଯୋଗ ହୋଇଛି । ସାହାରପଡା ବ୍ଲକରେ କିଛି କନିଷ୍ଠ ଯନ୍ତ୍ରୀ ଦୀର୍ଘ ବର୍ଷ ଧରି ରହିଥିବାରୁ ଅନେକ ଅଭିଯୋଗ ହୋଇଆସୁଛି । ଏ ନେଇ ଆଡିସନାଲ ପିଡି(ଆଡମିନ) ରବିନ୍ଦ୍ର କୁମାର ମଲ୍ଲିକଙ୍କ ସହ ଯୋଗାଯୋଗ କରିବାରୁ ସେ ଏ ସମ୍ପର୍କରେ କିଛି ଜାଣି ନଥିବା କହିଛନ୍ତି । ଏନେଇ ନିରପେକ୍ଷ ତଦନ୍ତ ଦାବି ହୋଇଛି l
