ଯୁଦ୍ଧକ୍ଷେତ୍ରରେ ଭାରତର ଶକ୍ତି ବଢ଼ାଇବ ଜାଭେଲିନ୍ ମିସାଇଲ୍! ଆମେରିକାଠାରୁ କିଣିବାକୁ ଯୋଜନା
ନୂଆଦିଲ୍ଲୀ: ଯୁଦ୍ଧକ୍ଷେତ୍ରରେ ନିଜର ଦକ୍ଷତା ପ୍ରମାଣ କରିସାରିଥିବା ଆମେରିକାର ଜାଭେଲିନ୍ ଆଣ୍ଟି-ଟ୍ୟାଙ୍କ ମିସାଇଲ୍ ସିଷ୍ଟମ୍ କିଣିବାକୁ ଭାରତ ଯୋଜନା କରୁଥିବା ଜଣାପଡ଼ିଛି। ଶୁକ୍ରବାର ଭାରତରେ ଥିବା ଆମେରିକାର ରାଷ୍ଟ୍ରଦୂତ ସର୍ଜିଓ ଗୋର୍ ଏନେଇ ସୂଚନା ଦେଇଛନ୍ତି। ଏହି ଅସ୍ତ୍ର ସାମିଲ ହେଲେ ଶତ୍ରୁପକ୍ଷର ଟ୍ୟାଙ୍କ ଓ ଅନ୍ୟାନ୍ୟ ସାମରିକ ଯାନକୁ ମୁକାବିଲା କରିବାରେ ଭାରତୀୟ ସେନାର କ୍ଷମତା ଆହୁରି ବଢ଼ିପାରେ।
ପ୍ରସ୍ତାବିତ କ୍ରୟ ଭାରତର ଅସ୍ତ୍ରଭଣ୍ଡାରରେ ଏକ ଆଧୁନିକ ଓ ନିଖୁଣ ଟାର୍ଗେଟ୍ କରିପାରୁଥିବା ଆଣ୍ଟି-ଆର୍ମର ଅସ୍ତ୍ରକୁ ସାମିଲ କରିବ। ଏହା ଭାରତ-ଆମେରିକା ପ୍ରତିରକ୍ଷା ସହଯୋଗକୁ ମଧ୍ୟ ଆହୁରି ମଜବୁତ କରିବାର ସଙ୍କେତ ଦେଉଛି।
କ’ଣ ଏହି ଜାଭେଲିନ୍?
ଜାଭେଲିନ୍ ହେଉଛି ଏକ ପୋର୍ଟେବଲ୍ ଆଣ୍ଟି-ଟ୍ୟାଙ୍କ ଗାଇଡେଡ୍ ମିସାଇଲ୍। ଏହାକୁ ଜଣେ ସୈନିକ ନିଜେ ବହନ କରିପାରନ୍ତି ଏବଂ ଆବଶ୍ୟକ ସମୟରେ ଶତ୍ରୁପକ୍ଷର ସାମରିକ ଯାନକୁ ଟାର୍ଗେଟ୍ କରିପାରନ୍ତି। ଏହାର ବିଶେଷତ୍ୱ ହେଉଛି ‘ଫାୟାର୍ ଆଣ୍ଡ ଫରଗେଟ୍’ କ୍ଷମତା। ଅର୍ଥାତ୍ ଟାର୍ଗେଟ୍ ଲକ୍ କରି ମିସାଇଲ୍ ଛାଡ଼ିବା ପରେ ସୈନିକଙ୍କୁ ଏହାକୁ ଲଗାତାର ନିୟନ୍ତ୍ରଣ କରିବାକୁ ପଡ଼େ ନାହିଁ।
ମିସାଇଲ୍ ଛାଡ଼ିବା ପରେ ସୈନିକ ତୁରନ୍ତ ସ୍ଥାନ ପରିବର୍ତ୍ତନ କରି ଅପେକ୍ଷାକୃତ ସୁରକ୍ଷିତ ସ୍ଥାନକୁ ଯାଇପାରନ୍ତି। ଏହାର ‘ଟପ୍-ଆଟାକ୍’ କ୍ଷମତା ମଧ୍ୟ ଏହାକୁ ଅନ୍ୟ ଆଣ୍ଟି-ଟ୍ୟାଙ୍କ ଅସ୍ତ୍ରଠାରୁ ବିଶେଷ କରିଥାଏ।
ଜାଭେଲିନ୍ରେ ଆଧୁନିକ ଇମେଜିଂ ଇନ୍ଫ୍ରାରେଡ୍ ସିକର୍ ବ୍ୟବହାର କରାଯାଇଛି। ବିଭିନ୍ନ ଯୁଦ୍ଧ ପରିସ୍ଥିତିରେ କାର୍ଯ୍ୟ କରିପାରିବା ଭଳି ଏହାକୁ ଡିଜାଇନ୍ କରାଯାଇଛି। ଫଳରେ ଟ୍ୟାଙ୍କ ଓ ଅନ୍ୟାନ୍ୟ ଶତ୍ରୁ ସାମରିକ ଯାନର ମୁକାବିଲାରେ ପଦାତିକ ସୈନିକଙ୍କୁ ଏକ ଅତିରିକ୍ତ ବିକଳ୍ପ ମିଳିପାରେ।
ବିଭିନ୍ନ ଯୁଦ୍ଧରେ ଜାଭେଲିନ୍ର ବ୍ୟବହାର ହୋଇଥିବାରୁ ଏହାର ଆଣ୍ଟି-ଆର୍ମର କ୍ଷମତା ନେଇ ଆନ୍ତର୍ଜାତିକ ସ୍ତରରେ ଚର୍ଚ୍ଚା ହୋଇଛି। ବିଶେଷକରି ୟୁକ୍ରେନ୍ ଯୁଦ୍ଧରେ ପୋର୍ଟେବଲ୍ ଆଣ୍ଟି-ଟ୍ୟାଙ୍କ ଅସ୍ତ୍ରର ଗୁରୁତ୍ୱ ସାମ୍ନାକୁ ଆସିଛି।
ଭାରତ ପାଇଁ ଏହି ମିସାଇଲ୍ ସିଷ୍ଟମ୍ ଦେଶରେ ପ୍ରସ୍ତୁତ ଓ ଆମଦାନୀ ହେଉଥିବା ବିଭିନ୍ନ ଆଣ୍ଟି-ଟ୍ୟାଙ୍କ ଅସ୍ତ୍ର ସହ ମିଶି ଭାରତୀୟ ସ୍ଥଳସେନାର ଆଣ୍ଟି-ଆର୍ମର କ୍ଷମତାକୁ ଆହୁରି ଏକ ନୂଆ ସ୍ତରକୁ ନେଇପାରେ। ଦୀର୍ଘ ଓ କଠିନ ସୀମାକୁ ଦୃଷ୍ଟିରେ ରଖି ଏହି ପ୍ରସ୍ତାବିତ ଅସ୍ତ୍ରକୁ ଭାରତୀୟ ସେନା ପାଇଁ ଗୁରୁତ୍ୱପୂର୍ଣ୍ଣ ମନାଯାଉଛି।
