ଧର୍ମେନ୍ଦ୍ର ପ୍ରଧାନଙ୍କ ପ୍ରତିକ୍ରିୟା; କହିଲେ ଛାତ୍ର-ଛାତ୍ରୀଙ୍କୁ ହାତ ବାରିଶି କରୁଚି ବିରୋଧୀ ଦଳ

ନୂଆଦିଲ୍ଲୀ, ୨୨/୭: ସଂସଦର ମୌସୁମୀ ଅଧିବେଶନ ଚାଲିଥିବା ବେଳେ ବିରୋଧୀ କଂଗ୍ରେସ ଓ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ସୋସିଆଲ ମିଡିଆ ମାଧ୍ୟମରେ କଡ଼ା ସମାଲୋଚନା କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଛାତ୍ରଛାତ୍ରୀଙ୍କ ସମସ୍ୟାକୁ ମୁଦ୍ଦା କରି କଂଗ୍ରେସ ସେମାନଙ୍କୁ ନିଜର ରାଜନୈତିକ ହାତବାରିସି ଭାବେ ବ୍ୟବହାର କରୁଛି ଏବଂ ଗୃହରେ କେବଳ ବିଶୃଙ୍ଖଳା ସୃଷ୍ଟି କରୁଛି ବୋଲି ଶ୍ରୀ ପ୍ରଧାନ ନିଜ ‘ଏକ୍ସ’ (X) ପୋଷ୍ଟରେ ଅଭିଯୋଗ କରିଛନ୍ତି।

ଗଣମାଧ୍ୟମ ଶିରୋନାମା ପାଇଁ ‘ରାଜନୈତିକ ନାଟକ’

କେନ୍ଦ୍ରମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ବାସଭବନ ଆଗରେ ଧାରଣା ଦେଇ ସୁରକ୍ଷା ନିୟମ ଭଙ୍ଗ କରିବା ଏବଂ ସାଧାରଣ ଜନତାଙ୍କ ପାଇଁ ହଇରାଣ ପରିସ୍ଥିତି ସୃଷ୍ଟି କରିବା ବିରୋଧୀଙ୍କର ଏକ ରାଜନୈତିକ ନାଟକବାଜି ସଦୃଶ। ସରକାର ‘ନିଟ୍’ (NEET) ପରୀକ୍ଷା ଏବଂ ଯୁବବର୍ଗଙ୍କ ପ୍ରତ୍ୟେକଟି ସମସ୍ୟା ଉପରେ ସଂସଦରେ ଗ୍ରହଣଯୋଗ୍ୟ ଓ ସମ୍ପୂର୍ଣ୍ଣ ଆଲୋଚନା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି। କିନ୍ତୁ କଂଗ୍ରେସ ଗଣତାନ୍ତ୍ରିକ ଚର୍ଚ୍ଚାରୁ ଓହରି କେବଳ ଗଣମାଧ୍ୟମରେ ଶିରୋନାମା ସାଉଁଟିବାକୁ ଚେଷ୍ଟା କରୁଛି।

ସରକାର ୧୦୦% ପ୍ରତିଶ୍ରୁତିବଦ୍ଧ

ଶ୍ରୀ ପ୍ରଧାନ ନିଜ ପୋଷ୍ଟରେ ଦୃଢ଼ତାର ସହ ସ୍ପଷ୍ଟ କରିଛନ୍ତି ଯେ, ନିଟ୍ ପରୀକ୍ଷା ଓ ଯୁବବର୍ଗଙ୍କ ପ୍ରତ୍ୟେକ ଯୁକ୍ତିଯୁକ୍ତ ଚିନ୍ତା ପ୍ରକାଶ କରିବା ପାଇଁ ସରକାର ଗୃହରେ ସମ୍ପୂର୍ଣ୍ଣ ଚର୍ଚ୍ଚା କରିବାକୁ ୧୦୦% ପ୍ରତିଶ୍ରୁତିବଦ୍ଧ।ଛାତ୍ରଛାତ୍ରୀଙ୍କ ପାଇଁ ଶିକ୍ଷାମନ୍ତ୍ରୀଙ୍କ ଆଭିମୁଖ୍ୟ:ଅନିଶ୍ଚିତତା ବଦଳରେ ସ୍ଥିରତା: ଦେଶର ଛାତ୍ରଛାତ୍ରୀମାନେ ଅନିଶ୍ଚିତତାର ବାତାବରଣ ବଦଳରେ ସ୍ଥିରତା ଚାହାନ୍ତି।ସମାଧାନ: ନାରାବାଜି କିମ୍ବା ରାଜନୀତି ନୁହେଁ, ବରଂ ସେମାନଙ୍କୁ ସମସ୍ୟାର ସଠିକ୍ ସମାଧାନ ଦରକାର।ଦାୟିତ୍ୱବାନ ଆଚରଣ: ବିଶୃଙ୍ଖଳା ବଦଳରେ ନେତାମାନଙ୍କଠାରୁ ଦାୟିତ୍ୱବାନ ଆଚରଣ ପାଇବାର ହକ୍‌ ସେମାନଙ୍କର ରହିଛି।

ଯୁବବର୍ଗଙ୍କ ଭବିଷ୍ୟତ ସହ ହେବନି ବୁଝାମଣାସରକାର ସବୁପ୍ରକାର ଚର୍ଚ୍ଚା ପାଇଁ ଦ୍ୱାର ଖୋଲା ରଖିଥିଲେ ସୁଦ୍ଧା ରାହୁଲ ଗାନ୍ଧୀ ଏବଂ କଂଗ୍ରେସ କେବଳ ବିବାଦ ଓ ମୁହାଁମୁହିଁ ପରିସ୍ଥିତି ସୃଷ୍ଟି କରିବାକୁ ଚାହୁଁଛନ୍ତି। କଂଗ୍ରେସ ପାଇଁ ଏହା ଛାତ୍ରସମସ୍ୟାର ସମାଧାନ ନୁହେଁ, ବରଂ ନିଜ ରାଜନୈତିକ ଫାଇଦା ପାଇଁ କଳିଝଗଡ଼ା ସୃଷ୍ଟି କରିବାର ଏକ ମାଧ୍ୟମ। ମାତ୍ର କେନ୍ଦ୍ର ସରକାର ଯୁବବର୍ଗଙ୍କ ଭବିଷ୍ୟତ ସହ କୌଣସି ବୁଝାମଣା ନକରି ସେମାନଙ୍କୁ ସ୍ୱଚ୍ଛତା, ପରୀକ୍ଷା ପ୍ରଣାଳୀରେ ସଂସ୍କାର ଏବଂ ନ୍ୟାୟ ଦେବା ପାଇଁ ନିରନ୍ତର କାର୍ଯ୍ୟ କରୁଛନ୍ତି ବୋଲି ଶ୍ରୀ ପ୍ରଧାନ ପ୍ରକାଶ କରିଛନ୍ତି।