ପାକିସ୍ତାନ ଆକାଶରେ ଭାରତୀୟ ବିମାନ ପାଇଁ ନୋ ଏଣ୍ଟ୍ରି

ନୂଆଦିଲ୍ଲୀ : ଭାରତ ଓ ପାକିସ୍ତାନ ମଧ୍ୟରେ ଜାରି ରହିଥିବା ଉତ୍ତେଜନା ମଧ୍ୟରେ ପାକିସ୍ତାନ ପୁଣି ଭାରତୀୟ ବିମାନ ପାଇଁ ନିଜ ଆକାଶପଥ ବନ୍ଦ ରଖିବାର ସମୟସୀମା ବଢ଼ାଇଛି। ଭାରତରେ ପଞ୍ଜୀକୃତ ବିମାନ ଏବଂ ଭାରତୀୟ ବିମାନ କମ୍ପାନୀର ବିମାନଗୁଡ଼ିକୁ ନିଜ ଆକାଶପଥରେ ପ୍ରବେଶ ଅନୁମତି ନଦେବା ନିଷ୍ପତ୍ତିକୁ ଆଉ ଏକ ମାସ ପାଇଁ ବଢ଼ାଇଛି ପାକିସ୍ତାନ। ଏବେ ଏହି କଟକଣା ୨୪ ନଭେମ୍ବର ୨୦୨୬ ପର୍ଯ୍ୟନ୍ତ ବଳବତ୍ତର ରହିବ। ଏୟାରପୋର୍ଟସ୍ ଅଥରିଟି (PAA) ପକ୍ଷରୁ ଜାରି କରାଯାଇଥିବା ଏକ ନୂତନ ବିଜ୍ଞପ୍ତି (NOTAM – Notice to Airmen) ଅନୁଯାୟୀ, ଏହି ପ୍ରତିବନ୍ଧକକୁ ଆଉ ଏକ ମାସ ପାଇଁ ବଢ଼ାଇ ଦିଆଯାଇଛି।  ପିଏଏ ଶନିବାର ସୋସିଆଲ୍ ମିଡିଆ ପ୍ଲାଟଫର୍ମ Xରେ ଏକ ପୋଷ୍ଟ ମାଧ୍ୟମରେ ଏହି ସୂଚନା ଦେଇଛି। ଏହି  କଟକଣା କେବଳ ସାଧାରଣ ଯାତ୍ରୀବାହୀ ବିମାନ ପାଇଁ ନୁହେଁ, ବରଂ ସାମରିକ ବିମାନ ଉଡ଼ାଣ ପାଇଁ ମଧ୍ୟ ଲାଗୁ ହେବ। ନୂଆ ସମୟସୀମା ଅନୁଯାୟୀ ୨୪ ନଭେମ୍ବର ୨୦୨୬ ସକାଳ ୪ଟା ୫୯ ମିନିଟ୍ (ସ୍ଥାନୀୟ ସମୟ) ପର୍ଯ୍ୟନ୍ତ ଏହି କଟକଣା ଜାରି ରହିବ। ଏହା ପରେ କଟକଣା ହଟିବ କିମ୍ବା ପୁଣି ବଢ଼ାଯିବ, ସେନେଇ ପରବର୍ତ୍ତୀ ସମୟରେ ନିଷ୍ପତ୍ତି ନିଆଯିବ। ଏହା ପାକିସ୍ତାନର ଉଭୟ କରାଚି ଏବଂ ଲାହୋରକୁ ସମ୍ପୂର୍ଣ୍ଣ ରୂପେ ବାରଣ କରିବ। ଏହି ବିବାଦର ମୂଳ ୨୦୨୫ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କୀ ଆକ୍ରମଣ ସହ ଜଡ଼ିତ। ଏହି ଘଟଣା ପରେ ଭାରତ ଓ ପାକିସ୍ତାନ ପରସ୍ପରର ବିମାନ ପାଇଁ ନିଜ ନିଜ ଆକାଶପଥ ବନ୍ଦ କରିଥିଲେ। ଆକ୍ରମଣରେ ପାକିସ୍ତାନର ଭୂମିକା ଥିବା ଭାରତ ଅଭିଯୋଗ କରିଥିବା ବେଳେ ପାକିସ୍ତାନ ଏହାକୁ ଖଣ୍ଡନ କରିଥିଲା। ଏହା ପରେ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କ ଆହୁରି ତିକ୍ତ ହୋଇଥିଲା ଏବଂ ସାମରିକ ଉତ୍ତେଜନା ମଧ୍ୟ ବଢ଼ିଥିଲା। ପାକିସ୍ତାନର ନିଷ୍ପତ୍ତିର ଜବାବରେ ଭାରତ ମଧ୍ୟ ୩୦ ଏପ୍ରିଲ ୨୦୨୫ରେ ପାକିସ୍ତାନୀ ବିମାନ କମ୍ପାନୀଗୁଡ଼ିକ ପାଇଁ ନିଜ ଆକାଶପଥ ବନ୍ଦ କରିଥିଲା। ଏହା ଫଳରେ ଉଭୟ ଦେଶର ବିମାନଗୁଡ଼ିକ ପରସ୍ପରର ଆକାଶପଥ ବ୍ୟବହାରକୁ ବନ୍ଦ ରଖିଛନ୍ତି।