ଠପ୍ ହେଲା ମାଇକ୍ରୋସଫ୍ଟ ସେବା: ବିଶ୍ୱବ୍ୟାପୀ ପ୍ରଭାବିତ ହେଲେ ଲକ୍ଷାଧିକ ଉପଭୋକ୍ତା, ଆଉଟଲୁକ୍ ଓ ଟିମ୍ସ୍ କାମ କରିବା ବନ୍ଦ
ନୂଆଦିଲ୍ଲୀ (ପ୍ରଜାତନ୍ତ୍ର ରିପୋର୍ଟ): ବିଶ୍ୱର ପ୍ରମୁଖ ଟେକ୍ନୋଲୋଜି କମ୍ପାନୀ ମାଇକ୍ରୋସଫ୍ଟର (Microsoft) ସେବା ହଠାତ୍ ଠପ୍ ହୋଇଯିବାରୁ ସାରା ବିଶ୍ୱରେ ବ୍ୟବହାରକାରୀମାନେ ଭୀଷଣ ସମସ୍ୟାର ସମ୍ମୁଖୀନ ହୋଇଛନ୍ତି। ଭାରତ ସମେତ ବିଭିନ୍ନ ଦେଶରେ ଲୋକମାନେ ସେମାନଙ୍କର ଆଉଟଲୁକ୍ (Outlook) ଆକାଉଣ୍ଟ୍ ଆକ୍ସେସ୍ କରିପାରି ନାହାନ୍ତି। ଇମେଲ୍ ପଠାଇବା ଏବଂ ଗ୍ରହଣ କରିବାରେ ବାଧା ସୃଷ୍ଟି ହେବାରୁ ବହୁ ବ୍ୟବହାରକାରୀ ହତାଶ ହୋଇପଡ଼ିଥିଲେ। କେବଳ ଇମେଲ୍ ନୁହେଁ, ବରଂ ମାଇକ୍ରୋସଫ୍ଟ ୩୬୫ (Microsoft 365), ଟିମ୍ସ୍ (Teams) ଏବଂ ଏଆଇ ସହାୟକ କୋପାଇଲଟ୍ (Copilot) ପରି ଗୁରୁତ୍ୱପୂର୍ଣ୍ଣ ସେବାଗୁଡ଼ିକ ମଧ୍ୟ ବାଧାପ୍ରାପ୍ତ ହୋଇଥିଲା। ଏପରିକି ମାଇକ୍ରୋସଫ୍ଟ ସର୍ଭର ସହିତ ସଂଯୋଗ ହେଉଥିବା କିଛି ଓପନ୍ଏଆଇ (OpenAI) ଏବଂ ଆନ୍ଥ୍ରୋପିକ୍ ସେବା ମଧ୍ୟ ଏହି ବିଭ୍ରାଟର ପ୍ରଭାବରୁ ବାଦ୍ ପଡ଼ିନଥିଲା।
ଗୁରୁବାର ବିଳମ୍ବିତ ରାତିରେ ଏହି ବୈଷୟିକ ତ୍ରୁଟି ଦେଖାଦେଇଥିଲା। ପ୍ରାରମ୍ଭରେ ସର୍ଭର ଟ୍ରାଫିକରେ ହଠାତ୍ ଅହେତୁକ ବୃଦ୍ଧି ଘଟିଥିବାରୁ ଏଭଳି ସମସ୍ୟା ଉତ୍ପନ୍ନ ହୋଇଛି ବୋଲି ଆକଳନ କରାଯାଇଥିଲା। କିନ୍ତୁ କମ୍ପାନୀର ପ୍ରାରମ୍ଭିକ ତଦନ୍ତରୁ ଏକ ଭିନ୍ନ ଓ ଚାଞ୍ଚଲ୍ୟକର କାରଣ ସାମ୍ନାକୁ ଆସିଛି। ମାଇକ୍ରୋସଫ୍ଟର ଭିତ୍ତିଭୂମିରେ ଥିବା ଅନେକ ସର୍ଭର ହଠାତ୍ ଅନୁପଲବ୍ଧ ହୋଇଯିବା ଫଳରେ ଅବଶିଷ୍ଟ ସର୍ଭରଗୁଡ଼ିକ ଉପରେ ଅତିରିକ୍ତ ଭାର (Load) ବଢ଼ିଯାଇଥିଲା। ଫଳରେ ଉପଭୋକ୍ତାମାନଙ୍କର ଅନୁରୋଧଗୁଡ଼ିକୁ ପରିଚାଳନା କରିବାରେ ଅସୁବିଧା ଉପୁଜିଥିଲା ଏବଂ ସଂଯୋଗରେ ତ୍ରୁଟି ଦେଖାଦେଇଥିଲା।
ମାଇକ୍ରୋସଫ୍ଟ ପକ୍ଷରୁ କୁହାଯାଇଛି ଯେ, ପ୍ରଭାବିତ ସର୍ଭରଗୁଡ଼ିକ ସ୍ୱୟଂଚାଳିତ ଯାଞ୍ଚ (Automated Health Checks)ରେ ବିଫଳ ହେଉଥିଲେ। ସର୍ଭରର ସଠିକ୍ କାର୍ଯ୍ୟକାରିତା ଯାଞ୍ଚ କରିବା ପାଇଁ ଏହି ବ୍ୟବସ୍ଥା ରହିଥାଏ। ସର୍ଭର ଯାଞ୍ଚ ପ୍ରକ୍ରିୟା ସହିତ ଜଡିତ କୌଣସି ଏକ ଉପାଦାନରେ ସମ୍ପ୍ରତି କରାଯାଇଥିବା ପରିବର୍ତ୍ତନ ଯୋଗୁଁ ଏହି ସମସ୍ୟା ଉତ୍ପନ୍ନ ହୋଇଥାଇପାରେ ବୋଲି କମ୍ପାନୀ ସନ୍ଦେହ କରୁଛି। ତେବେ ସମସ୍ୟାର ସମାଧାନ ପାଇଁ ଟେକ୍ନିକାଲ୍ ଟିମ୍ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଜାରି ରଖିଛି।
