ଧାମନଗର (ପି ପି ଏସ) ଧାମନଗରରେ ଖୋଲିଲା ଜଳସେଚନ ଡିଭିଜନ କାର୍ଯ୍ୟାଳୟ। ପୂର୍ବ ସରକାର ସମୟରେ ଧାମନଗରର ତତ୍କାଳୀନ ବିଧାୟକ ମୁକ୍ତିକାନ୍ତ ମଣ୍ଡଳ ଆଖୁଆପଦା ଜଳ ସମ୍ପଦ ବିଭାଜନର ଅଧିକ୍ଷଣ ଯନ୍ତ୍ରୀଙ୍କ କାର୍ଯ୍ୟାଳୟ ଧାମନଗରରେ ସ୍ଥାପନ ପାଇଁ ସରକାରଙ୍କ ପକ୍ଷରୁ ମଞ୍ଜୁର କରାଇଥିଲେ। ମାତ୍ର ତତ୍କାଳୀନ ଭଣ୍ଡାରିପୋଖରୀ ବିଧାୟକ ତଥା ରାଜ୍ୟ ସରକାରରେ ବରିଷ୍ଠ ମନ୍ତ୍ରୀ ପ୍ରଫୁଲ୍ଲ ସାମଲ ଚାପ ପ୍ରୟୋଗ କରି ଏହା ଧାମନଗରରେ କରାଇ ଦେଇନଥିଲେ। ବର୍ତ୍ତମାନ ସମୟ ବଦଳିବା ସହ ସରକାର ମଧ୍ଯ ବଦଳିଛି। ଏବେ ଧାମନଗରର ଯୁବ ବିଧାୟକ ରାଜ୍ୟ ସରକାରରେ ଗୁରୁତ୍ୱ ପୂର୍ଣ୍ଣ ବିଭାଗରେ ମନ୍ତ୍ରୀ ଅଛନ୍ତି। ତାଙ୍କ ପ୍ରଚେଷ୍ଟାରେ ଆଖୁଆପଦା ଠାରେ ଥିବା ଜଳ ସମ୍ପଦର ଅଧିକ୍ଷଣ ଯନ୍ତ୍ରୀଙ୍କ କାର୍ଯ୍ୟାଳୟ ଗତ ୨ ତାରିଖରେ ଧାମନଗରରେ ଖୋଲିବା ସହ ୩ ତାରିଖ ଠାରୁ କାର୍ଯ୍ୟକ୍ଷମ ହୋଇଛି। ଏହି କାର୍ଯ୍ୟାଳୟରେ ଅଧିକ୍ଷଣ ଯନ୍ତ୍ରୀ ଭାବେ ଶରତ ଚନ୍ଦ୍ର ଘଡାଇଙ୍କୁ ନିଯୁକ୍ତି ଦିଆଯାଇଛି।ଏହି କାର୍ଯ୍ୟାଳୟ ଧାମନଗରରେ ଖୋଲିବା ନେଇ ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ ବିଧାନ ସଭାରେ ଘୋର ବିରୋଧ କରିବା ସହ ଆବଶ୍ୟକ ହେଲେ ଆନ୍ଦୋଳନ କରିବାକୁ ସୂଚନା ଦେଇଛନ୍ତି। ତେବେ ଧାମନଗରରେ କାର୍ଯ୍ୟକ୍ଷମ ହୋଇଥିବା ନୂତନ ଜଳସମ୍ପଦ କାର୍ଯ୍ୟାଳୟ ନିର୍ମାଣ ପାଈଁ ୮ କୋଟି ବ୍ୟୟ ଅଟକଳ ହୋଇଥିବା ବେଳେ ଖୁବ୍ ଶୀଘ୍ର କାର୍ଯ୍ୟାରମ୍ଭ ହେବ ବୋଲି ସୂଚନା ମିଳିଛି। ତେବେ ଏତାଦୃଶ ପଦକ୍ଷେପ ପାଇଁ ଧାମନଗର ବାସୀଙ୍କ ପକ୍ଷରୁ ଓଡ଼ିଶାର ମାନ୍ୟବର ଉଚ୍ଚଶିକ୍ଷା, କ୍ରୀଡ଼ା ଯୁବ ସେବା ଭାଷା ସାହିତ୍ୟ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୁରଜ ସ୍ଥିତପ୍ରଜ୍ଞଙ୍କୁ ଶୁଭେଚ୍ଛା ଓ ଶୁଭକାମନା ଜଣା ଯାଇଛି।
