ସାରଥି ବାବାଙ୍କ ଭାଇଙ୍କ ସ୍ୱାସ୍ଥ୍ୟାବସ୍ଥାକୁ ଦୃଷ୍ଟିରେ ରଖି ହାଇକୋର୍ଟ ତାଙ୍କୁ କେନ୍ଦ୍ରାପଡ଼ାକୁ ସର୍ତ୍ତମୂଳକ ପ୍ରବେଶ ଅନୁମତି ଦେଇଛନ୍ତି। ତାଙ୍କୁ ବାରିମୂଳରେ ଥିବା ତାଙ୍କ ଆଶ୍ରମରେ ପ୍ରବେଶ ପାଇଁ ପ୍ରତିବନ୍ଧକ ଲଗାଯାଇଛି
କଟକ ୦୫-୦୩-୨୦୨୫(ପିପିଏସ) : ସାରଥୀ ବାବା ଓରଫ ସନ୍ତୋଷ ରାଉଳଙ୍କୁ କେନ୍ଦ୍ରାପଡ଼ାକୁ ସର୍ତ୍ତମୂଳକ ପ୍ରବେଶ ପାଇଁ ଅନୁମତି ଦିଆଯାଇଛି। ତାଙ୍କୁ ବାରିମୂଳରେ ଥିବା ତାଙ୍କ ଆଶ୍ରମରେ ପ୍ରବେଶ ପାଇଁ ପ୍ରତିବନ୍ଧକ ଲଗାଯାଇଛି। ଏନେଇ ହାଇକୋର୍ଟଙ୍କ ପକ୍ଷରୁ ନିର୍ଦ୍ଦେଶ ଜାରି ହୋଇଛି।ବୁଧବାର ଦିନ ଓଡ଼ିଶା ହାଇକୋର୍ଟ ରାୟ ଦେଇଛନ୍ତି ଯେ, ନିଜକୁ ଈଶ୍ୱର ବୋଲି ଘୋଷଣା କରିଥିବା ବିବାଦୀୟ ସାରଥି ବାବା କେନ୍ଦ୍ରାପଡ଼ା ଆସିପାରିବେ କିନ୍ତୁ ସେ ସେଠାରେ ରାତିରେ ରହିପାରିବେ ନାହିଁ। ଏହା ବ୍ୟତୀତ ସେ ପ୍ରତି ଦୁଇ ମାସରେ କେବଳ ଥରେ କେନ୍ଦ୍ରାପଡ଼ା ଆସିପାରିବେ।ସାରଥି ବାବାଙ୍କ ଭାଇଙ୍କ ସ୍ୱାସ୍ଥ୍ୟାବସ୍ଥାକୁ ଦୃଷ୍ଟିରେ ରଖି କୋର୍ଟ ତାଙ୍କୁ ସର୍ତ୍ତମୂଳକ ଗସ୍ତ ଅନୁମତି ଦେଇଛନ୍ତି। ତାଙ୍କ ଭାଇଙ୍କ ସ୍ୱାସ୍ଥ୍ୟାବସ୍ଥା ଭଲ ନାହିଁ। କୋର୍ଟ କହିଛନ୍ତି ଯେ, ସାରଥୀ ବାବା କେନ୍ଦ୍ରାପଡ଼ାରେ ରାତି ବିତାଇ ପାରିବେ ନାହିଁ। ସେ ସକାଳ ସାଢ଼େ ୫ରୁ ସନ୍ଧ୍ୟା ୫ଟା ମଧ୍ୟରେ କେନ୍ଦ୍ରାପଡ଼ାରେ ରହିପାରିବେ। ଏଥିପାଇଁ, ତାଙ୍କୁ ତାଙ୍କ ଗସ୍ତର ସାତ ଦିନ ପୂର୍ବରୁ ଟ୍ରାଏଲ୍ କୋର୍ଟକୁ ଜଣାଇବାକୁ ପଡିବ। ତାଙ୍କୁ ତାଙ୍କ ଗସ୍ତ ବିଷୟରେ ପୁଲିସକୁ ମଧ୍ୟ ଜଣାଇବାକୁ ପଡିବ।ସୂଚନାଯୋଗ୍ୟ, ସାରଥି ବାବା, ଜଣେ ଆତ୍ମଘୋଷିତ ଧର୍ମଗୁରୁ, ଓଡ଼ିଶାର କେନ୍ଦ୍ରାପଡ଼ାରେ ଥିବା ତାଙ୍କ ବାରିମୂଳ ଆଶ୍ରମକୁ ନେଇ ଏକ ବିବାଦରେ ଫସି ଯାଇଥିଲେ। ଯୌନ ଶୋଷଣ, ଆର୍ଥିକ ଅନିୟମିତତା ଏବଂ ଅନ୍ୟାନ୍ୟ ବେଆଇନ କାର୍ଯ୍ୟକଳାପର ଅଭିଯୋଗ ନେଇ କେନ୍ଦ୍ରାପଡ଼ାରେ ବ୍ୟାପକ ଉତ୍ତେଜନା ଏବଂ ବିରୋଧ ସୃଷ୍ଟି ହୋଇଥିଲା। ଯାହା ଫଳରେ କର୍ତ୍ତୃପକ୍ଷ କାର୍ଯ୍ୟାନୁଷ୍ଠାନ ନେବାକୁ ବାଧ୍ୟ ହୋଇଥିଲେ।
