ବାଲିଗୁଡ଼ା,୨୫-୧୦-୨୦୨୪(ପିପିଏସ) : କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ମିଡିଆକିଆ ପଞ୍ଚାୟତର ଶେଷାରଗାଁ ଜଙ୍ଗଲରେ ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳିବିନିମୟ । ସୁରକ୍ଷା କର୍ମୀଙ୍କ ଗୁଳିରେ ଜଣେ ମାଓବାଦୀ ମୃତୁ୍ୟବରଣ କରିଥିବା ଜଣାପଡ଼ିଛି । ସୂଚନା ପ୍ରକାରେ ବାଲିଗୁଡ଼ା ଥାନା ଅଞ୍ଚଳରେ ଗତ କିଛିଦିନ ହେବ ଲାଲ୍ ବାହିନୀ ପୋଷ୍ଟର ବ୍ୟାନର ଜାରି କରି ଅଞ୍ଚଳରେ ନିଜର ସ୍ଥିତି ଜାହିର କରି ଆସୁଛି । ଏଭଳି ସ୍ଥିତିରେ ଗୁଇନ୍ଦା ସୂଚନାକୁ ଆଧାର କରି କନ୍ଧମାଳ ପୋଲିସ୍ ପକ୍ଷରୁ ମାଓ ଗତିବିଧି ଉପରେ ତିକ୍ଷ୍ଣ ନଜର ରଖିବା ସହ କୁମ୍ବିଂ ଅପରେସନକୁ ଯୋରଦାର କରାଇଥିଲା । ଆଜି ସକାଳ ପ୍ରାୟ ୯ ଘଣ୍ଟିକା ସମୟରେ ବାଲିଗୁଡ଼ା ଥାନା ଅନ୍ତର୍ଗତ ମିଡିଆକିଆ ପଞ୍ଚାୟତର ଶେଷାରଗାଁ ନିକଟସ୍ଥ ଜଙ୍ଗଲରେ ସୁରକ୍ଷାକର୍ମୀଙ୍କ ସହ ମାଓବାଦୀ ମୁହାଁମୁହିଁ ହେବାପରେ ଉଭୟଙ୍କ ମଧ୍ୟରେ ଗୁଳିବିନିମୟ ଘଟିଥିଲା । ଦୀର୍ଘ ସମୟଧରି ଉଭୟଙ୍କ ମଧ୍ୟରେ ଗୁଳିବିନିମୟ ପରେ ସୁରକ୍ଷାକର୍ମୀଙ୍କ ଗୁଳିମାଡ଼ରେ ଜଣେ ପୁରୁଷ ମାଓବାଦୀ ମୃତୁ୍ୟବରଣ କରିଥିବା ବେଳେ ସମ୍ପୃକ୍ତ ଜଙ୍ଗଲରୁ ବନ୍ଧୁକ ସମେତ ବିଭିନ୍ନ ମାଓ ସାମଗ୍ରୀ ଜବତ ହୋଇଥିବା ବିଶ୍ବସ୍ତ ସୂତ୍ରରୁ ସୂଚନା ମିଳିଛି । ଘଟଣା ପରେ ସମ୍ପୃକ୍ତ ଅଞ୍ଚଳରେ ପୋଲିସ୍ ପକ୍ଷରୁ ସର୍ଚ୍ଚ ଅପରେସନକୁ ଯୋରଦାର କରାଯାଇଥିବା ଜଣାପଡ଼ିଛି ।
