ନୟାଗଡ଼/ଭୁବନେଶ୍ୱର,୧୬-୦୯-୨୦୨୪(ପିପିଏସ) : ନୟାଗଡ଼ ଜିଲ୍ଲା କରଡ଼ାପଲ୍ଲୀ ଛକରେ ଘଟିଛି ଏକ ଅଭାବନୀୟ ଘଟଣା । ବସ୍କୁ ଅପେକ୍ଷା କରି ଛିଡ଼ା ହୋଇଥିଲେ । ମାତ୍ର ଏହି ସମୟରେ ଆଉ ଏକ ବସ୍ ମାଡ଼ିଆସି ମହିଳାଙ୍କ ଉପରେ ଚଢ଼ାଇଦେଲା । ଫଳରେ ଘଟଣାସ୍ଥଳରେ ହିଁ ଚାଲିଗଲା ମହିଳାଙ୍କ ଜୀବନ । ମୃତ ମହିଳାଜଣକ ହେଲେ କରଡ଼ାପଲ୍ଲୀ ଗ୍ରାମର ହୁଲ୍ଲାସୀ ବେହେରା ।
ହୁଲ୍ଲାସୀ ତାଙ୍କ ବୋହୁଙ୍କ ସହିତ ଆଜି ସକାଳେ ଭୁବନେଶ୍ୱର ଯିବାପାଇଁ ବସ୍କୁ ଅପେକ୍ଷା କରି କରଡାପଲ୍ଲୀ ଛକରେ ଛିଡ଼ା ହୋଇଥିଲେ। ଏହି ସମୟରେ ବାଘମାରିରୁ ଖଣ୍ଡପଡା ଅଭିମୁଖେ ଯାଉଥିବା ‘କୁମାର’ ନାମକ ଘରୋଇ ବସ୍ ତାଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିଲା।
ଖବର ପାଇ ଉତ୍ତ୍ୟକ୍ତ ଗ୍ରାମବାସୀ ଘଟଣାସ୍ଥଳରେ ରୁଣ୍ଡ ହୋଇଥିଲେ। ଏହାପରେ କ୍ଷତିପୂରଣ ଦାବିରେ ଉତ୍ତ୍ୟକ୍ତ ଲୋକେ କରଡ଼ାପଲ୍ଲୀ ଛକରେ ରାସ୍ତା ଅବରୋଧ କରିଛନ୍ତି । ଯାହାଫଳରେ ରିପୋର୍ଟ ଲେଖା ହେବା ପର୍ଯ୍ୟନ୍ତ ଯାତାୟତ ସମ୍ପୂର୍ଣ ଠପ ହେବା ସହ ରାସ୍ତାର ଦୁଇ ପାର୍ଶ୍ଵରେ ଅନେକ ଗାଡି ଛିଡା ହୋଇଛି। ଖବର ପାଇ ଘଟଣା ସ୍ଥଳରେ ଫତେଗଡ଼ ପୁଲିସ ପହଞ୍ଚି ଶବକୁ ଜବତ କରିବା ସହିତ ଲୋକମାନଙ୍କୁ ବୁଝାସୁଝା କରୁଛି l ଘଟଣାସ୍ଥଳରେ ପ୍ରବଳ ଉତ୍ତେଜନା ଦେଖାଦେଇଛି।
ଦୁର୍ଘଟଣା ଘଟାଇବା ପରେ ଗାଡ଼ି ଚାଳକ ଫତେଗଡ଼ ଥାନା ଧଳାପଥର ଫାଣ୍ଡିରେ ବସ୍ ସହ ଆତ୍ମସମର୍ପଣ କରିଥଲେ । ବସ୍ କୁ କରିବା ସହିତ ଡ୍ରାଇଭରକୁ ଅଟକ ରଖି ତଦନ୍ତ କରୁଛି ପୁଲିସ ।
