ବ୍ରହ୍ମପୁର/ଭୁବନେଶ୍ୱର ୧୫-୦୯-୨୦୨୪(ପିପିଏସ) : ବଡବଜାର ଥାନା ଅନ୍ତର୍ଗତ ଶାସ୍ତ୍ରୀନଗର ୪ର୍ଥ ଲାଇନରେ ଥିବା ଏକ ନକଲି ନଡ଼ିଆ ତେଲ ଓ ରାଶି ତେଲ ଫ୍ୟାକ୍ଟ୍ରି ରେ ପୁଲିସ ପକ୍ଷରୁ ଚଢଉ କରାଯାଇଛି l ସେଠାରୁ ବିଭିନ୍ନ କମ୍ପାନୀ ନାଁକୁ ନକଲ କରି ପ୍ରସ୍ତୁତ ହୋଇଥିବା ନକଲି ନଡିଆ ତେଲ ବୋତଲ ଓ ପାଉଚ ଜବତ କରାଯାଇଛି l ସେହିପରି ସେଠାରୁ ତେଲ ପ୍ରସ୍ତୁତ ପାଇଁ ରଖାଯାଇଥିବା କଞ୍ଚାମାଲ ଓ ମେସିନ ମଧ୍ୟ ଜବତ ହୋଇଛି l ଏହି ତେଲ ଫ୍ରାକ୍ଟ୍ରିର ମାଲିକ ରଞ୍ଜନ ପାତ୍ରଙ୍କୁ ଅଟକ ରଖି ପୁଲିସ ପଚରାଉଚରା ଜାରି ରଖିଛି l
ମିଳିଥିବା ସୂଚନା ଅନୁସାରେ, ଶାଲିମାର କମ୍ପାନୀର ନଡିଆ ତେଲ ବୋତଲ ଭଳି ଦିଶୁଥିବା ତେଲ ବୋତଲ ବଜାରରେ ବିକ୍ରି ହେଉଥିବା କମ୍ପାନୀର କର୍ମଚାରୀମାନେ ଜାଣିବାକୁ ପାଇଥିଲେ l ଏ ନେଇ ସେମାନେ ବଡବଜାର ପୁଲିସକୁ ଖବର ଦେଇଥିଲେ l ସୂଚନା ପାଇ ପୁଲିସ ଆଜି ସନ୍ଧ୍ୟାରେ ଶାସ୍ତ୍ରୀନଗର ୪ର୍ଥ ଲାଇନରେ ଥିବା ଏହି ନକଲି ତେଲ ଫ୍ୟାକ୍ଟ୍ରିରେ ଅଚାନକ ଚଢଉ କରିଥିଲା l ଚଢଉ ବେଳେ ସେହି ଘର ଭିତରେ ଶାଲିମାର ବିଭିନ୍ନ ନାମିଦାମୀ କମ୍ପାନୀର ପ୍ରଡକ୍ଟ ଭଳି ଦେଖାଯାଉଥିବା ନଡିଆ ତେଲ ବୋତଲ ପ୍ରସ୍ତୁତ କରାଯାଉଥିଲା l ସେହି ଘରୁ ଶହ ଶହ ଛୋଟ ନଡିଆ ତେଲ ଓ ରାଶି ତେଲ ବୋତଲ, ଅଧ କେଜିଆ ପାଉଚ, ଶହ ଶହ କାର୍ଟୁନ, ବସ୍ତାରେ ରଖଯାଇଥିବା ହଜାର ହଜାର ଖାଲି ବୋତଲ, ଠିପି, ଲେବଲ, ଏକାଧିକ ମେସିନ ଜବତ କରାଯାଇଥିଲା l
ଲିକ୍ୱିଡ ପାରାଫିନ ଓ ଅନ୍ୟାନ୍ୟ ପୋଡା ତେଲ ଓ ସୁଗନ୍ଧ ମିଶାଇ ଏହି ନକଲି ନଡିଆ ତେଲ ଓ ରାଶି ତେଲ ପ୍ରସ୍ତୁତ କରାଯାଉଥିଲା l ସେଠାରୁ ଏସଏ ବ୍ରାଣ୍ଡ, ରଞ୍ଜନ ଟିଲ ଅଏଲ, ଶିବାନୀ କୋକୋନଟ ଅଏଲ ନାମରେ ତିଆରି ହୋଇ ରଖାଯାଇଥିବା ନଡିଆ ତେଲ ଓ ରାଶି ତେଲ ବୋତଲ ଓ କାର୍ଟୁନ ଜବତ ହୋଇଥିଲା l ଏଠାରେ ଅନେକ ଦିନ ହେବ ନକଲି ନଡିଆ ତେଲ ପ୍ରସ୍ତୁତି ପରେ ବ୍ରହ୍ମପୁର ସମେତ ଆଖପାଖ ଅଞ୍ଚଳରେ ବିକ୍ରି ପାଇଁ ପଠାଯାଉଥିଲା l ଚଢଉ ବେଳେ ବଡବଜାର ଥାନାର ଏସଆଇ ରଞ୍ଜିତ ଦାଶ ଓ ଏସଆଇ ଶସ୍ମୀତା ବେହେରା ସମେତ ଅନ୍ୟ କର୍ମଚାରୀ ସାମିଲ ଥିଲେ l
